އެތުލެޓިކޯ މެޑްރިޑަށް ކުޅެމުން އަންނަ ޕޯޗުގަލްގެ ޒުވާން ފޯވާޑް ޔާއޯ ފެލިކްސް ލޯނު އެއްބަސްވުމެއްގެ ދަށުން ޗެލްސީ އަށް ބަދަލުވުމާ ގާތަށް ޖެހިލާފައިވާ ކަމަށް މީޑިއާ ރިޕޯޓުތައް ބުނެފި އެވެ.
ފެލިކްސް ހޯދުމުގެ މަސައްކަތް ޗެލްސީ އާއި މެންޗެސްޓަރ ޔުނައިޓެޑުން ކުރާ ކަމަށް ރިޕޯޓުތައް ބުނި ނަމަވެސް، ދާއިމީ އެއްބަސްވުމެއްގެ ދަށުން އޭނާ ނުގެންދެވޭނެ ކަމަށް ރިޕޯޓުތައް ބުނެއެވެ. އެހެންކަމުން މިހާރު ޗެލްސީން މަޝްވަރާކުރަމުން އަންނަނީ ލޯނު އެއްބަަސްވުމެއްގެ ދަށުން ފެލިކްސް ހޯދުމަށް ކަމަށް ރިޕޯޓުތަކުގައިވެ އެވެ. އެކަމުގެ މަޝްވަރާތައް ޗެލްސީ އާއި އެތުލެޓިކޯއާ ދެމެދު ކުރެވެމުންދާއިރު، ލޯނު އެއްބަސްވުމުގެ ދަށުން ފެލިކްސް ޗެލްސީ އަށް ބަދަލުވުން ގާތް ކަމަށް ރިޕޯޓުތައް ބުނެ އެވެ. ފެލިކްސް ޗެލްސީ އަށް ބަދަލުވާނީ މިއަހަރުގެ ޖޫން މަހުގެ ނިޔަލަށް ކަމަށާއި، ދާއިމީ އެއްބަސްވުމެއްގެ ދަށުން ގަތުމުގެ ފުރުސަތު ނޯންނާނެ ކަމަށް ވެސް ވަނީ ބުނެފަ އެވެ. ޗެލްސީން ފެލިކްސް ހޯދާނީ 10 މިލިއަން ޔޫރޯގެ ލޯނު އެއްބަސްވުމެއްގެ ދަށުން ކަމަށް ވެސް ރިޕޯޓުތަކުގައިވެ އެވެ.
ޒުވާން ކުޅުންތެރިޔާ ޕޯޗުގަލްގެ ބެންފީކާ ދޫކޮށް އެތުލެޓިކޯ އަށް ބަދަލުވީ 2019 ވަނަ އަހަރު އެވެ. އެތުލެޓިކޯ އިން ފެލިކްސް ހޯދީ އެ ކުލަބަގެ ރެކޯޑު އަގަކަށެވެ. އެއީ 113 މިލިއަން ޕައުންޑަށެވެ. އެތުލެޓިކޯ އަށް ބަދަލުވެ ފެލިކްސް މޮޅު ކުޅުމެއް ދައްކަމުން އައި ނަމަވެސް، މިހާރު އޭނާގެ އަސްލު ކުޅުން ނުދެއްކޭ ކަމަށް ގިނަ ބަޔަކު ބުނެ އެވެ. އެތުލެޓިކޯ އަށް ބަދަލުވެ އެ ކުލަބަކަށް މިހާތަނަށް ކުޅެދިން 130 މެޗުން ފެލިކްސް ވަނީ 34 ލަނޑު ޖަހަައިފަ އެވެ. އެ ކުލަބާއެކު އޭނާ ވަނީ 21-2020 ވަނަ އަހަރުގެ ސްޕެނިޝް ލީގު ކާމިޔާބުކޮށްފަ އެވެ.
