ސްޕެނިޝް ލީގުގައި އެތުލެޓިކޯ މެޑްރިޑު އަތުން ލިބުނީ ހަމައެކަނި ތިން ޕޮއިންޓުގެ މޮޅެއް ނޫން ކަމަށް ބާސެލޯނާގެ ކޯޗު ޒަވީ ހެނާންޑޭޒް ބުނެފި އެވެ.

ލީގުގައި ވާދަވެރި އެތުލެޓިކޯ ބަލިކޮށް ބާސެލޯނާ އިން ވަނީ ތާވަލްގެ އެއް ވަނައިގައި ތިން ޕޮއިންޓުގެ ލީޑެއް ނަގައިފަ އެވެ. އެ މެޗަށްފަހު ވާހަކަ ދައްކަމުން ޒަވީ ބުނީ، އެއީ ހަމައެކަނި ތިން ޕޮއިންޓުގެ މޮޅެއް ނޫން ކަމަށާއި، އެއީ ކުރިއަށް ދިޔުމަށް ލިބުނު އިތުރު ހިތްވަރެއް ކަމަށެވެ. މީގެ އިތުރުން ޒަވީ ބުނީ ބާސެލޯނާ އިން އަންނަނީ ލީގުގެ އެންމެ ކުރީގައި އޮތުމަށް ވަރަށް މަސައްކަތް ކުރަމުން ކަމަށާއި، އެންމެ ފަހުން ރެއާލް މެޑްރިޑު ކުޅުނު މެޗުން އެ ޓީމު ބަލިވުމާއެކު، އެ ފުރުސަތު ފަހިވީ ކަމަށެވެ. ޒަވީ ބުނީ ބާސެލޯނާގެ އެންމެ މުހިންމު އެއް ފޯވާޑް، ޕޮލެންޑުގެ ކެޕްޓަން ރޮބާޓް ލެވަންޑޯސްކީ ނެތި ލިބުނީ މުހިންމު މޮޅެއް ކަމަށެވެ. އަދި ލެވަންޑޯސްކީ ނެތުމުން ފެރާން ޓޮރޭސް އެ މަގާމުގައި ވަރަށް ރަނގަަޅަށް ކުޅުނު ކަމަށާއި، ނަމަވެސް ލެވަންޑޯސްކީ އަކީ މާ މުހިންމު ކުޅުންތެރިޔެއް ކަމަށެވެ.

މީގެ އިތުރުން ޒަވީ ވަނީ މެޗުގައި މުހިންމު ބޯޅަތަކެއް ސަލާމަތްކުރި އުރުގުއޭގެ ރޮނާލްޑު އަރައުހޯގެ ވާހަކަ ވެސް ދައްކައިފަ އެވެ. އެގޮތުން އަރައުހޯ އަކީ ވަރަށް ރަނގަޅު ލީޑަރެއް ކަމަށާއި، އޭނާ ދެއްކީ އާދަޔާ ޚިލާފު މޮޅު ކުޅުމެއް ކަމަށެވެ. ބާސެލޯނާގައި ހިމެނޭ ޖޫލްސް ކޫންޑޭ އާއި އެޑްރިއަން ކްރިސްޓެންސަން އަދި ބާލްޑޭއެކޭ އެއްގޮތަށް އަރައުހޯ ވެސް އަންނަނީ މޮޅަށް ކުޅެމުން ކަމަށާއި، އަރުއުހޯ ހުރީ ރަނގަޅަށް ކަމުގައި ވަނީ ނަމަ، އޭނާގެ އެއްވެސް މައްސަލައެއް ނެތް ކަމަށް ޒަވީ ބުންޏެވެ.

ޒަވީ ބުނީ ކުރިއަށް ކުރަން އޮތް މަސައްކަތް ބޮޑު ކަމަށާއި، ކުޅުންތެރިން އެއް ރޫޙެއްގައި ތިބެއްޖެ ނަމަ، ބާސެލޯނާ އަށް އަމާޒަށް ވާސިލްވެވޭނެ ކަމަށެވެ. އޭނާ ބުނީ ފުޓުބޯޅައިގައި ހުރިހާ ދުވަހު އެއް ފެންވަރެއްގައި އެކަކަށް ވެސް ނުކުޅެވޭނެ ކަމަށާއި، ނަމަވެސް މަސައްކަތް ކުރަން ޖެހޭނީ އެއް ފެންވަރެއްގައި ކުޅުން ހިފަހައްޓަން ކަމަށެވެ.

ބާސެލޯނާ އަށް ދެން ލީގު މެޗެއް އޮންނަނީ މިމަހުގެ 22 ވަނަ ދުވަހު ގެޓާފޭއާ ދެކޮލަށް ކުޅޭ މެޗެވެ. އޭގެ ކުރިން މި މަހުގެ 13 ވަނަ ދުވަހު ސްޕެނިޝް ސުޕަ ކަޕްގެ ސެމީ ފައިނަލްގައި ރެއާލް ބެޓިސްއާ ދެކޮޅަށް ކުޅުމަށްފަހު، ކޮޕަ ޑެލް ރޭގައި އޭޑީ ސެއުޓާއާ ދެކޮޅަށް ކުޅޭނީ މި މަހުގެ 18 ވަނަ ދުވަހު އެވެ.