ތަފާތެއް ނެތި ރަށްތައް ބާރުވެރި ކުރުވުން ހަޤީގަތަކަށް!!

ހުރިހާ ރަށެއް ތަރައްޤީކޮށް، އެންމެން އެކުގައި ރީތި ރަށްވެހި ދިރިއުޅުމަކަށް ގެންދިއުމުގެ ވިސްނުމަކީ އެމްޑީޕީން އަބަދުވެސް ވަކާލާތު ކުރަމުންއައި ވިސްނުމެކެވެ. ކޮންމެ ދިވެއްސަކަށްވެސް ރާއްޖޭގައި ތާހިރު ދިރިއުޅުމެއް އުޅެވެން ޖެހޭނެ ކަމަށް އެޕާޓީން އައީ އަބަދުވެސް އަޑުއުފުލަމުންނެވެ. ސުވާލަކީ އެކަން ޙަޤީގަތަކަށް ވެފައިވަނީ ކިހާވަރަކަށް ހެއްޔޭއެވެ.

ރައީސް އިބްރާހީމް މުހައްމަދު ސާލިހުގެ ވިސްނުންފުޅާއި ސިޔާސަތަކީ ހުރިހާ ދިވެހިން ހަމަހަމަކަމުގެ ސިޔާސަތެވެ. އާބާދީ ކުޑަވެގެން އެރަށެއްގެ ރައްޔިތުންނަށް އަސާސީ ޙައްގުތަކުން މަހުރޫމް ވެގެން ނުވާނެ ކަމުގެ ސިޔާސަތެވެ. އެސިޔާސަތުގެ ދަށުން ރައީސް ސާލިހު ގެންދަވަނީ އެކަން ޙަޤީގަތަކަށް ހައްދަވަމުންނެވެ. ރަށްރަށުން ދަނީ އެމަންޒަރު ފެންނަމުންނެވެ.

އެކާވީސް ވަނަ ގަރުނާ ހަމައަށް ދިވެހިން ކަޑައްތުކުރިއިރު ރާއްޖޭގެ ގިނަ ބަޔަކަށް ސާފު ބޯފެނެއް ނުލިބެއެވެ. އަސާސީ ހައްޤުތައް އެންމެނަށް ހަމަހަމަކޮށް ފޯރުކޮށްދޭން ޖެހޭނެކަމަށް ކަޅާހުދުން ލިޔެފައިވީނަމަވެސް މާލެ ފިޔަވައި ރާއްޖޭގެ ގިނަ ރަށްރަށުގައި ގައިން ތާހިރު ވުމަށް ބޭނުންކުރަން ޖެހިފައި އޮތީ ނަޖިސް ފެނެވެ. ރައީސް އިބްރާހީމް މުހައްމަދު ސާލިހު ވިދާޅުވަމުން ގެންދަވަނީ ތަރައްޤީގެ ވާހަކަ ދައްކަން ފެށޭނީވެސް ގައިންތާހިރުވުމަށާއި ބުއިމަށްޓަކައި ސާފު ބޯފެން ލިބިގެން ކަމަށެވެ. އެކަން ކުރުމަށްޓަކައި އެމަނިކުފާނުގެ ޢަމަލީ މަސައްކަތް ފެށްޓެވީ ކުޑަ ރަށެއް ބޮޑު ރަށެއް ތަފާތު ކުރުމެއް ނެތި ހުރިހާ ރަށެއްގައި ފެނާއި ނަރުދަމާ އެޅުމަށެވެ. އެގޮތުން އެވައުދު ފުއްދުމުގެ ގޮތުން ފެނާ ނަރުދަމާގެ 127 މަޝްރޫއު މިހާރު ކުރިއަށްދާއިރު 12 މަޝްރޫއު ވަނީ ނިންމާލާފައެވެ. އަދި މިދައުރު ނިމެންވާއިރަށް ރާއްޖޭގެ ހުރިހާ ރަށެއްގައި ފެނާ ނަރުދަމާ ޤާއިމްކޮށް ނިންމާލެވޭނެ ކަމުގެ ޔަޤީންކަން އެމަނިކުފާނަށް އެބައޮތްކަމަށް އެމަނިކުފާނު ގެންދަވަނީ ތަކުރާރުކޮށް ވިދާޅުވަމުންނެވެ. ކުރިންވެސް ބުނެވުނު ފަދައިން މިކަމުގައި ވަކިރަށެއް ތަފާތު ނުކޮށް އާބާދީގެ ގޮތުން ކުދި ރަށްތަކުގައިވެސް އެމަޝްރޫއު ހިނގަމުންދިއުމުގެ ސަބަބުން ރައްޔިތުންނަށް މިއަދު އިހްސާސްވަމުންދަނީ، ސިޔާސީ މަންފާއަށް ބަލާ އަސާސީ ހިދުމަތްތައް ފޯރުކޮށްދިނުމުގެ ބޭއިންސާފު އާދަ މިހާރު ނައްތާލެއްވިއްޖެކަމެވެ. އަދި މިހާތަނަށް ކުރެވުނު މަސައްކަތުން ސާފު ބޯފެނާއި ނަރުދަމާގެ ނަތީޖާއަކަށް ވެފައިވަނީ މިހާރުވެސް، ނަޖިސްފެނުގެ ޒަރީޢާއިން ޖެހޭ ބަލިތަކުން ރައްޔިތުން ސަލާމަތް ކުރެވެމުންދިއުމެވެ. މިއީ ރައްޔިތުންނަށް ނުހަނު އުފާވެރިކަން ލިއްބައިދޭ ކަމަކަށް ވުމުގެއިތުރުން ޞިއްޙަތަށްވާ ބޮޑު ފައިދާއެކެވެ.

ރައީސް ސާލިހު ގެންގުޅުއްވާ ހަމަހަމަ ސިޔާސަތާއެކު ރައްޔިތުންނަށް ހާއުފާވެރިކަން ގެނެސްދެމުންދާ އަނެއް ކަމަކީ އެމްޑީޕީން ބުނާ ރަށު ބަންދުން ފިލުވާލުމާއި ދަތުރުފަތުރުން މުޅި ރާއްޖެ ގުޅާލުމެވެ. ރާއްޖެއަށް އެކަށޭނަ ދިވެހިންގެ މާހައުލާއި ބޭނުންތަކަށް ގުޅޭގޮތައް ތައްޔާރު ކުރެވުނު ޒަމާނީ ފެރީތަކުގެ ހިތްގައިމު ކަމެވެ. ހައިސްޕީޑް އެއަރކޯން ލޯންޗްތަކުގައި ކުރެވޭ ދަތުރުފަތުރުގެ ފަސޭހަކަމެވެ. މިއަދު ސަރުކާރާއި ސަރުކާރާއިދިކޮޅު ފަރާތްތަކުންވެސް ޤަބޫލުކުރާ ހަޤީގަތަކީ އާރްޓީއެލް ފެރީނިޒާމްގެ ސަޅިކަމެވެ. އަމުދުން ރައްޔިތުންނަށް ބޮޑު ބުރައަކަށްވެފައިވާ ދަތުރުފަތުރަށް ހައްލެއް ގެނެސްދީފިކަމެވެ.  ދެހާސް ތިންހާސް ރުފިޔާއިން ކުރެވޭ ދަތުރުތައް އެންމެ 175 އެއްހާ ރުފިޔާއިން މިއަދު ނިންމާލެވި ޖީބަށް ބޮޑުތަނުން ލުއިވެއްޖެކަމެވެ. ޒޯނު 1 (ހއ،ހދ،ށ) އަދި ޅ އަތޮޅުން އާރްޓީއެލް ފެށި މިހާތަނަށް 100,000 އަށްވުރެ ގިނަ ފަސިންޖަރުން ދަތުރުކޮށްފައިވާކަން ރެކޯޑްތަކުން ދައްކައެވެ.

ހަމަހަމަކަމާއެކު އަދި އަމިއްލަ ހާލަށް ތެދުވެ ބާރުވެރިވުމަށް ރަށްރަށަށް ލިބުނު އަނެއް ވަސީލަތަކީ ލާމަރުކަޒީ ނިޒާމު މެދުވެރިކޮށް ކަންކަން ނިންމުމުގެ ބާރާއި އިޚްތިޔާރު ރައްޔިތުންނަށް ފުރިހަމައަށް ދޫކޮށްލުމެވެ. ކުރިން ނަމެއްގައި އޮތް ލާމަރުކަޒީ ނިޒާމް އޭގެ ޙަޤީގީ މާނައިގާ ޤާއިމްވެގެން ދާނޭ ފަދަ ގޮތަކަށް ބާރުތައް ދޫކޮށްލުމެވެ. ރަށު ކައުންސިލްތަކާއި އަތޮޅު ކައުންސިލްތަކަށް ފުރިހަމަ އިޚްތިޔާރާއި ބާރުތައް ދިނުމުގެ އިތުރުން އެކަން ކުރާނޭ ބޮޑު ބަޖެޓްވެސް އެމީހުންނަށް ހަވާލުކުރުމެވެ. ފައިސާ ހޯދޭނެގޮތްތައް ފަހިކޮށް ދިނުމަށް ރަށާއި ކައިރި ފަޅުރަށްތަކުގެ ވެރިކަން އެ ކައުންސިލްތަކަށް ދޫކޮށްލުމެވެ. އެރަށްތަކުގެ ނަފާގެ އިތުރުން ކުންފުނިތައް އުފައްދައިގެން އަމިއްލައަށް ފައިސާ ހޯދައިގެން ރަށު ރައްޔިތުން ހަމައިސްކޮޅަށް ތެދުވެވޭނޭފަދަ ގޮތަކަށް ކަންކުރުމަށް ބާރުތައް ދޫކޮށްލުމެވެ.

ކޮންމެއަކަސް މިހާރު ފެންނަމުންދަނީ ތަފާތެއް ނެތި ވަކި އަމާޒަކަށް ރަށްތައް ތަރައްޤީވެ ޢާއްމު ދިރިއުޅުން ފަސޭހަވެގެންދާތަނެވެ. ހާއުފާވެރިކަން ރައްޔިތުންނަށް ލިބެމުންދާތަނެވެ. އާބާދީގެ ކުޑަކަމުން ބާކީވެފައި އޮންނަންޖެހުން މިހާރު މާޒީއާ އެކުވެއްޖެ ކަމެވެ.