ބޭރުގެ ސިފައިންނާއި ގުޅުވައިގެން ދައްކަނީ ދޮގުވާހަކަ، މިފަހަރުގެ ކެންޕޭންގައި މިކަންކަން ރައްޔިތުންނަށް ސާފުކޮށްދޭނަން: ރައީސް ސާލިހު

ބޭރުގެ ސިފައިންނާއި ގުޅުވައިގެން އިދިކޮޅު ފަރާތްތަކުން ދައްކަމުންދަނީ ހަގީގަތެއް ނެތް ވާހަކަތަކެއް ކަމަށާއި، ރިޔާސީ އިންތިޚާބުގެ ދެވަނަ ބުރަށް ނުކުންނަވާއިރު މިކަންކަން ރައްޔިތުންނަށް ސާފުކޮށްދެއްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމަށް ދެއްވި ޚާއްސަ ފޯނު އިންޓަވިޔުއެއްގައި ރައީސް ސާލިހު ވިދާޅުވީ ރިޔާސީ އިންތިޚާބުގެ ކެންޕޭންގެ ތެރޭގައި ސާރުކާރާއި ދެކޮޅަށް ވަރަށް ގިނަ ދޮގު ވާހަކަތައް ދައްކާފައިވާ ކަމަށެވެ. އޭގެ ތެރޭގައި ބޭރުގެ ސިފައިންނާއި ގުޅުވައި ދައްކާ ވާހަކަތަކާއި، ގައުމުގެ މިނިވަންކަމާއި، އިސްތިގުލާލު ގެއްލުވާލުމަށް މަސައްކަތްކޮށްފައިވާކަމަށް ބުނެ ފަތުރާފައިހުރި ވާހަކަތައް ދައްކާފައިވަނީ ރައްޔިތުންނަށް ވަރަށް ބޮޑަށް ގަބޫލުކުރެވޭ ގޮތަށް ރައީސް ސާލިހު ވިދާޅުވިއެވެ. އަދި ވިދާޅުވީ އެއީ ހަގީގަތެއް ނޫން ކަމަށާއި، އެކަންކަން ރައްޔިތުންނަށް މިފަހަރުގެ ކެންޕޭން ތެރޭގައި އޮޅުންފިލުއްވައިދެއްވާނެ ކަމަށެވެ.

ރިޔާސީ އިންތިޚާބުގެ ކެންޕޭން ފުރަތަމަ ފެށިގެން ދިޔައިރުގައި އިދިކޮޅު ފަރާތްތަކުން ދައްކަމުންދިޔަ ދޮގު ވާހަކަތަކަށް، ރައްޔިތުންނަށް އޮޅުންފިލުވާ ދެވޭވަރަށް ކެންޕޭން ތެރޭގައި މަސައްކަތް ކުރެވިފައިނުވާ ކަމަށް ވެސް އެމަނިކުފާނު ވިދާޅުވިއެވެ.

ރައީސް ސާލިހު ވިދާޅުވީ ހަގީގަތެއް ނެތް ވާހަކަތަކާއެކު ރައްޔިތުން ތިބީ ވަރަށް ބޮޑު އޮޅުވާލުމެއްގެ ތެރޭގައި ކަމަށެވެ. ރައީސް ސާލިހު ވިދާޅުވީ ރާއްޖޭގެ މިނިވަންކަމާއި، ރާއްޖޭގެ ސަރަހައްދުން ބައެއް ގެއްލޭ ގޮތަށް އެއްވެސް ކަމެއް ކޮށްފައި ނުވާނެ ކަމަށެވެ. އެކަންކަން ރައްޔިތުންނަށް އޮޅުންފިލާވަރަށް ހާމަކޮށްދެއްވާނެ ކަމަށާއި، އެކަންކަން ކިޔާދިނުމުން ރައްޔިތުންނަށް ވިސްނޭނެ ކަމަށް އެމަނިކުފާނު ވިދާޅުވިއެވެ.