އިންތިޚާބުގެ ކެންޕޭނާއި ގުޅިގެން އިދާރީ ގޮތުން ކުރަންޖެހުނު ބައެއް ކަންތައްތަކަށް ފަރުވާ ކުޑަކުރެވިފައިވޭ: ރައީސް ސާލިހު
ވޯޓުދޭނެ ކަމަށް ބެލެވުނު ގިނަ ބަޔަކު ވޯޓުލާން ގޮސްފައިނުވޭ
ފަށާއިރު ޕްރޮގްރާމްގައި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވާހަކަފުޅު ދައްކަވަނީ
ރިޔާސީ އިންތިޚާބުގެ ކެންޕޭނާއި ގުޅިގެން އިދާރީ ގޮތުން ކުރަންޖެހުނު ބައެއް ކަންތައްތަކަށް ފަރުވާ ކުޑަކުރެވިފައިވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމަށް ދެއްވި ޚާއްސަ ފޯނު އިންޓަވިޔުއެއްގައި ރައީސް ސާލިހު ވިދާޅުވީ ވަރަށް ގިނަ މައްސަލަތައް ފާހަގަކުރެއްވިފައިވާ ކަމަށާއި، ފުރަތަމަ ބުރުގެ ނަތީޖާއަކީ އުންމީދުކުރެއްވި ނަތީޖާއެއް ނޫން ކަމަށެވެ. ވޯޓުދޭނެ ކަމަށް ބެލެވުނު ގިނަ ބަޔަކު ވޯޓުލާން ގޮސްފައިނުވާ ކަމަށާއި، ބައެއް ރަށްރަށުން 400 ނުވަތަ 300 މީހުން ވޯޓު ނުލާ ކަމަށް ރައީސް ސާލިހު ވިދާޅުވިއެވެ.
ފާހަގަކުރެއްވުނު ބައެއް މައްސަލަތަކަށް އިޝާރާތް ކުރައްވައި ރައީސް ސާލިހު ވިދާޅުވީ ވޯޓުލާ ވަގުތު 4:00 ގައި ބަންދުކުރުމުން ބައެއް މީހުންނަށް ވޯޓު ނުލެވިފައިވާކަމަށް ބައެއް މީހުން ބުނެފައިވާ ކަމަށެވެ. އަދި ވޯޓު ލުމަށް މީހުން ނެރުމުގެ މަސައްކަތް ކުރުމުގައި ޓީމްތަކުން އެކަށީގެންވާ ވަރަށް މަސައްކަތް ކުރެވިފައިނުވާ ކަމަށް އެމަނިކުފާނު ވިދާޅުވިއެވެ.
ރައީސް ސާލިހު ވިދާޅުވީ އިންތިޚާބާއި ގުޅިގެން ފާހަގަކުރެއްވުނު މައްސަލަތަކަށް މަޝްވަރާ ކުރައްވަމުން ގެންދަވާ ކަމަށާއި، މިކަންކަން ބަދަލުކޮށް މަސައްކަތް ކުރުމުން ދެވަނަ ބުރުގެ އިންތިޚާބު ކާމިޔާބު ނުވާނެ ކަމަށް ނުބެލެވޭ ކަމަށެވެ. އަދި އުންމީދު ބޮޑު ކަމަށް ވެސް އެމަނިކުފާނު ވިދާޅުވިއެވެ.
