އިޓާލިއަން ލީގުގައި ނަޕޯލީއާ ދެކޮޅަށް ކުޅުނު މެޗުން އިންޓަ މިލާން މޮޅުވެއްޖެ އެވެ.

އިންޓަ މިލާންގެ ދަނޑުގައި ކުޅުނު މެޗުން އެ ޓީމު މޮޅުވީ 1-0 އިންނެވެ. މިއީ މި ސީޒަންގެ އިޓާލިއަން ލީގުގައި ނަޕޯލީ ބަލިވި ފުރަތަމަ ފަހަރެވެ. އެ މެޗަށް ކުރިމަތިލީއިރު ނަޕޯލީ ވަނީ ކުޅުނު 15 މެޗުގެ ތެރެއިން 13 މެޗުން މޮޅުވެ، ދެ މެޗުން އެއްވަރިވެފަ އެވެ. މެޗުން ބަލިވި ނަމަވެސް އެ ޓީމު އޮތީ ލީގު ތާވަލްގެ އެއް ވަނަ މަގާމުގަ އެވެ.

މެޗުގެ ތިން ވަނަ މިނެޓުގައި ރޮމެލޫ ލުކާކޫ ހުރަސްކޮށްދިން ބޯޅަ އަކުން އެޑިން ޒެކޯ އަށް ވަނީ ލަނޑު ޖަހާނެ ރަނގަޅު ފުރުސަތެއް ލިބިފަ އެވެ. ނަމަވެސް ޒެކޯ ފޮނުވާލި ބޯޅަ ދިޔައީ ގޯލުގެ ދަނޑި މަތިން ބޭރަށެވެ. އޭގެ ފަހުން 25 ވަނަ މިނެޓުގައި ނަޕޯލީގެ އޭރިޔާ ތެރެއިން ޒެކޯ ދިން ބޯޅައެއް ޑާމިއަން ފޮނުވާލި ނަމަވެސް، އެ ބޯޅަ ވެސް ދިޔައީ ގޯލުގެ ހުރަސް ދަނޑި މަތިން ބޭރަށެވެ. މެޗުގައި އިންޓަ އިން ލަނޑު ޖެހުމަށް ކުރި މަސައްކަތް ކާމިޔާބުވީ 56 ވަނަ މިނެޓުގަ އެވެ. ފެޑެރިކޯ ޑިމާކޯ ހުރަސްކޮށްދިން ބޯޅައެއް ބޮލުން ގޯލަށް ފޮނުވާލައިގެން އިންޓަ އަށް ލީޑު ނަގައިދިނީ ޒެކޯ އެވެ.

މެޗުން މޮޅުވެ އިންޓަ އޮތީ ލީގު ތާވަލްގެ ހަތަރު ވަނައިގަ އެވެ. އެއީ ކުޅުނު 16 މެޗުން 33 ޕޮއިންޓާއެކު އެވެ. މެޗުން ބަލިވި ނަމަވެސް 16 މެޗުން 41 ޕޮއިންޓާއެކު ނަޕޯލީ އޮތީ އެއް ވަނައިގަ އެވެ. ދެ ވަނައިގައި އޮތް އެންމެ ފަހުގެ ޗެމްޕިއަން އޭސީ މިލާނަށް ލިބެނީ 16 މެޗުން 36 ޕޮއިންޓެވެ. ތިން ވަަނައިގައި ޔުވެންޓަސް އޮތީ 34 ޕޮއިންޓާއެކު އެވެ.