ސައުދީ އަރަބިޔާގެ އަލް ނަޞްރުގެ ކުޅުންތެރިޔެެއްގެ ގޮތުގައި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ރަސްމީކޮށް ދައްކާލައިފި އެވެ.
އަންގާރަ ދުވަހުގެ ރޭ ސައުދީގެ ވެރިރަށް ރިޔާދުގައި ރޮނާލްޑޯ އަލް ނަޞްރުގެ ކުޅުންތެރިޔެއްގެ ގޮތުގައި ދައްކާލިއިރު، އެތައް ހާސް ބަޔަކު ވަނީ އެއްވެފަ އެވެ. ރިޕޯޓުތައް ބުނާ ގޮތުން އެ ސްޓޭޑިއަމަށް ގާތްގަނޑަކަށް 30،000 ސަޕޯޓަރުން ވަނީ ވަދެފަ އެވެ. އަލް ނަޞްރަކީ ރޮނާލްޑޯގެ ސީނިއާ ކެރިއަރުގައި އޭނާ ގުޅުނު ފަސް ވަނަ ކުލަބެވެ. މިއީ ރޮނާލްޑޯ ޔޫރަޕުން ބޭރުގެ ކުލަބަކާ ގުޅުނު ފުރަތަމަ ފަހަރެވެ. މީގެ ކުރިން ރޮނާލްޑޯ ވަނީ ޔޫރަޕުގެ ހަތަރު ކުލަބަށް ކުޅެފައެވެ. އޭގެ ތެރޭގައި ސްޕޯޓިން، މެންޗެސްޓަރ ޔުނައިޓެޑް، ރެއާލް މެޑްރިޑް، އަދި ޔުވެންޓަސް ހިމެނެއެވެ.
އަލް ނަޞްރުގެ ކުޅުންތެރިޔެއްގެ ގޮތުގައި ދައްކާލުމަށްފަހު ކުލަބުގެ ސަޕޯޓަރުންނާ ވާހަކަ ދައްކަމުން ރޮނާލްޑޯ ބުނީ، އޭނާ ބޭނުންވަނީ ކުލަބަށް ހުރިހާ ކާމިޔާބަށް ހޯދައިދޭން ކަމަށެވެ. އަދި އޭނާ އަށް ކުލަބުގެ ސަޕޯޓަރުންގެ ފަރާތުން ދައްކާލި ލޯތްބާއި، އިޙުތިރާމަށް ވެސް ރޮނާލްޑޯ ވަނީ ޝުކުރު އަދާކޮށްފަ އެވެ. ރޮނާލްޑޯ ބުނީ އަލް ނަޞްރުގެ ޖާޒީގައި މެޗެއް ކުޅުމަށް ކެތް މެދުވެފައި ހުރި ކަމަށެވެ. މީގެ އިތުރުން ރޮނާލްޑޯ ވަނީ ސައުދީން އޭނާގެ އާއިލާ އަށް އަދާކުރި މެހެމާންދާރީ އާއި ކީ މަރުޙަބާ އަށް ވެސް ޝުކުރު އަދާކޮށްފަ އެވެ. އަލް ނަޞްރުގެ ކުޅުންތެރިޔެއްގެ ގޮތުގައި ދައްކާލުމަށްފަހު ރޮނާލްޑޯ ވަނީ ކުލަބުގެ ބައެއް ކުޅުންތެރިންނާ ވެސް ބައްދަލުކޮށްފަ އެެވެ.
ރޮނާލްޑޯ ބުނީ ސައުދީ ލީގަކީ ވެސް ވަރަށް ވާދަވެރި ލީގެއް ކަމަށާއި، މިހާ ހިސާބުން އޭނާގެ ކެރިއަރު އަދި ނިންމާ ނުލާނެ ކަމަށެވެ. ރޮނާލްޑޯ ވަނީ ބައެއް ސަޕޯޓަރުންނާއެކު ވަގުތު ހޭދަކޮށްފަ އެވެ. އެގޮތުން ރޮނާލްޑޯ ސޮއިކޮށްފައިވާ ބޯޅަތަކެއް އޭނާ ވަނީ ސަޕޯޓަރުންނަށް ހަދިޔާކޮށްފަ އެވެ. ރޮނާލްޑޯ އަލް ނަސްރަށް ސޮއިކުރީ ދެ އަހަރުގެ އެއްބަސްވުމެއްގަ އެވެ. އޭނާގެ އެއްބަސްވުމުގެ އަގު 213 މިލިއަން ޑޮރަލަށް އަރާކަމަށް ރިޕޯޓުތައް ބުނެއެވެ.
