ރޯމާގެ ކޯޗުކަމުގައި ހޯސޭ މޮރީނިއޯ ހުންނަން ބޭނުންވާ ކަމަށް އެ ކުލަބުގެ ޑިރެކްޓަރު ތިއާގޯ ޕިންޓޯ ބުނެފި އެވެ.

އޭނާ މިހެން ބުނީ މޮރީނިއޯ އޭނާގެ ޤައުމު ޕޯޗުގަލްގެ ޤައުމީ ޓީމުގެ ކޯޗުކަމާ ހަވާލުވާން އުޅޭ ކަމަށް ރިޕޯޓުތައް ބުނެފައިވާ ވަގުތެއްގަ އެވެ. މިދިޔަ އަހަރުގެ ޑިސެމްބަރު މަހު ނިމުނު ފީފާ ވޯލްޑް ކަޕްގެ ކުއާޓާ ފައިނަލުން ޕޯޗުގަލް ކެޓުމާއެކު، ކޯޗުކަމުން ފެނާންޑޯ ސަންޓޯސް ވަނީ ވަކިކޮށްފަ އެވެ. އަދި ޕޯޗުގަލްގެ އެފްއޭ އިން ބޭނުންވަނީ މޮރީނިއޯ އެ މަގާމަށް ގެނައުމަށް ކަމަށް ރިޕޯޓުތައް ބުނެ އެވެ.

ޕިންޓޯ ބުނީ، ޕޯޗުގަލްގެ ކޯޗުކަމާ ހަވާލުވުމަށް އަބަދު ވެސް މޮރީނިއޯ އަށް ހުށަހެޅުން ލިބެމުން އަންނަ ކަމަށެވެ. އޭނާ ބުނީ އެއީ އަލަށްވާ ކަމެއް ނޫން ކަމަށާއި، އަބަދު ވެސް މޮރީނިއޯ އަށް އެ ހުށަހެޅުން އޮންނަ ކަމަށެވެ. ނަމަވެސް މޮރީނިއޯ ނިންމާނީ އޭނާގެ އަމިއްލަ ނިންމުމެއް ކަމަށާއި، ރޯމާ އިން އެދެނީ މޮރީނިއޯ އެ ކުލަބުގައި އިރުޝާދު ދިނުމުގައި ދެމި ހުރުން ކަމަށެވެ.

މޮރީނިއޯ އަކީ ޔޫރަޕުގެ ބޮޑެތި ކުލަބުތަކަށް އިރުޝާދު ދީފައިވާ މޮޅު ކޯޗެކެވެ. އޭނާ ވަނީ ސްޕެއިންގެ ރެއާލް މެޑްރިޑުގެ އިތުރުން، ޕްރިމިއާ ލީގުގެ ޗެލްސީ، މެންޗެސްޓަރ ޔުނައިޓެޑު އަދި ޓޮޓެންހަމަށް އިރުޝާދު ދީފަ އެވެ. ރޯމާގެ ކޯޗުކަމާ މޮރޯނިއޯ ހަވާލުވީ 2021 ވަނަ އަހަރު އެވެ. އޭނާގެ އިރުޝާދުގެ ދަށުން އެ ކުލަބުން ވަނީ ޔުއެފާ ޔޫރޮޕާ ކޮންފަރެންސް ލީގު ކާމިޔާބުކޮށްފަ އެވެ.