ސައޫދީ އަރަބިޔާގެ އަލް ނަޞްރަށް ސޮއިކުރި ޕޯޗްގަލްގެ ކެޕްޓަން ކްރިސްޓިއާނޯ ރޮނަލްޑޯ އެޤައުމަށް ހިނގައްޖެއެވެ.

ފުޓްބޯޅައިގެ ތާރީޚުގައިވެސް އެންމެ މުސާރަ ބޮޑު ކުޅުންތެރިޔާގެ ގޮތުގައި އަލް ނަސްރަށް ސޮއިކުރި ރޮނަލްޑޯ ސައޫދީއަށް ދިޔައީ ރޭ ދަންވަރުގެ ވަގުތެއްގައެވެ. އަދި މިއަދު އެކްލަބްގެ އެތައްހާސް ސަޕޯޓަރުންގެ ކުރިމަތީގައި ކްލަބްގެ ކުޅުންތެރިއެއްގެ ގޮތުގައި ރޮނަލްޑޯ ތަޢާރަފްކުރާނެކަމަށް މީޑިޔާ ރިޕޯރޓްތައް ބުނެއެވެ. ރޮނަލްޑޯ އެކްލަބްގެ ކުޅުންތެރިއެއްގެ ގޮތުގައި ތަޢާރަފްކުރާނީ ވެރިރަށް ރިޔާދުގައެވެ.

ރޮނަލްޑޯ އަލް ނަސްރަށް ސޮއިކުރީ ދެ އަހަރުގެ އެއްބަސްވުމެއްގައެވެ. އޭނާގެ އެއްބަސްވުމުގެ އަގު 213 މިލިއަން ޑޮރަލަށް އަރާކަމަށް ރިޕޯޓުތައް ބުނެއެވެ. 37 އަހަރުގައި ރޮނަލްޑޯ ސައުދީގެ ކްލަބް އަލް ނަސްރަށް ބަދަލުވީ މިސީޒަންގެ ނިޔަލަށް މެންޗެސްޓަރ ޔުނައިޓެޑާއެކު އޮތް އެއްބަސްވުން ނިމުމަކަށް ގެނެސްފައެވެ. އެފަރާތުން ވާހަކަދައްކާ އެއްބަސްވުން ނިމުމަކަށް ގެނައީ ޓީވީ ޝޯވއެއްގައި ޔުނައިޓެޑާ އަދި އެކްލަބްގެ ކޯޗާ މެދު ދެއްކި ވާހަކަތަކާ ގުޅިގެންނެވެ. ރޮނަލްޑޯ އެވާހަކަތައް ދެއްކީ ކްލަބް ބަދަލުކުރަން ބޭނުންވެ ހުރެއެވެ.

ރޮނަލްޑޯ ސައޫދީގައި ހުރީ ލަގްޒަރީ ހޮޓަލެއްގައެވެ. އޭނާއަށް އެހީތެރިވުމަށް އެކަށީގެންވާ ޓީމެއްގެ އިތުރުން ސަލާމަތީ ކަންކަން ބަލަހައްޓަން ސެކިއުރިޓީ ފާމެއް ވަނީ ހަމަޖައްސާފައެވެ.

ރޮނަލްޑޯ އަކީ ދުނިޔެ ދުށް އެންމެ މޮޅު އަދި އެންމެ ކާމިޔާބު އެއް ކުޅުންތެރިޔާއެވެ. އޭނާ ވަނީ ފަސް ފަހަރު ބަލަންޑިއޯ އެވޯޑް ހޯދާފައެވެ. ނަމަވެސް ކެރިއަރުގައި ނުލިބުނު ކާމިޔާބީއަކީ ވަރލްޑްކަޕެވެ. ވާދަވެރި މެސީ ވަނީ އެންމެ ފަހުގެ މުބާރާތް ކާމިޔާބުކޮށް, ތިލަފަތް ބަރުކޮށްފައެވެ.

ރޮނަލްޑޯއަކީ ސައޫދީ ލީގުގައި ކުޅޭނެ އެންމެ ޓޮޕް އެތްލީޓެވެ. އަލް ނަސްރުން ދެކެނީ ރޮނަލްޑޯ އެކްލަބަށް ސޮއިކުރުމަކީ ފުޓްބޯޅަ ތާރީޚު ބަދަލުކޮށްލުން ކަމަށެވެ. އަދި އެއީ އެކްލަބާއި, އެގައުމާއި, އެގައުމުގެ އަންނަން އޮތް ޖީލުތަކަށްވެސް ނަމޫނާއެއްކަމަށެވެ.