އަނަންތަރާ އަދި ސޮނޭވާ ބައްދަލު ކުރާ ފައިނަލް މެޗު މިއަދު ކުޅެން ނިންމައިފި

އިންޓަ ރިސޯޓު ވޮލީބޯލްގެ ޒޯން ފަހެއްގައި އަނަންތަރާ ކިހާވަށް އަދި ސޮނޭވާ ފުށި ބައްދަލު ކުރާ ފައިނަލް މެޗު ސޮނޭވާގައި ބުދަ ދުވަހު ހަވީރު ކުޅޭގޮތަށް ހަމަޖައްސައިފި އެވެ.

ވޮލީބޯލް އެސޯސިއޭޝަންގެ މާކެޓިން އެންޑް ޕްރޮމޯޝަން ޑިރެކްޓަރު މުހައްމަދު ޝާފިއު (ޝާފީ) ވިދާޅުވީ، ޓެކްނިކަލް ބައެއް ކަންތައްތައް ދިމާވެގެން ފަސްކުރި އަނަންތަރާ އަދި ސޮނޭވާ ބައްދަލުކުރާ ފައިނަލް މެޗު ބުދަ ދުވަހު ހަވީރު ކުޅުމަށް ހަމަޖެހިފައިވާ ކަމަށާއި، މެޗު ކުޅޭނީ 16:30 ގައި ކަމަށެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ފައިނަލް މެޗު ނުކުޅެ ފަސްކޮށްފައިވަނީ ވީއޭއެމްގެ އެކްސޯގައި ހިމެނޭ އެކްޓިން ޖެނެރަލް ސެކެޓްރީ އަދި ޓެކްނިކަލް ޑައިރެކްޓަރު މުހައްމަދު ޝަރަފު އާއި ޑިސިޕްލިނަރީ ކޮމެޓީގެ ޗެއާމަން އަލީ ލަތީފުގެ އިތުރުން ވީއޭއެމްގެ އޮފިޝަލުން ކަމަށްވާ ޖަމްޝާދު ޖައުފަރު، އަހުމަދު މިޔާން އަދި ނަސީމް އަލީ އަށް ސޮނޭވާ އަށް އަރުވަން ދެކޮޅުހެދުމުންނެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ސޮނޭވާގެ ކޯޗު އިބްރާހިމް ރަޝީދު (ސަތޯ) ވަނީ ވީއޭއެމްގެ އޮފިޝަލުން އަދި އެކްސްކޯގައި ހިމެނޭ ބައެއް މެމްބަރުން ސޮނޭވާއަށް ނޭރުވުމަށް އެ ރިސޯޓަށް އަންގާފައެވެ.

ސަތޯއާ ބޮޑަށް މައްސަލަ ޖެހިފައިވަނީ ވީއޭއެމްގެ އެކްޓިންގް ޖެނެރަލް ސެކެޓްރީ ޝަރަފްއާކަމަށް ވެސް މައުލޫމާތު ލިބެއެވެ. ޝަރަފް އަކީ ފައިނަލް މެޗުގައި ސޮނޭވާއާ އިދިކޮޅަށް ނިކުންނަ އަނަންތަރާގެ ކުރީގެ ކޯޗެވެ. އޭނާ ވަނީ ފާއިތުވެދިޔަ ދެ އަހަރު އެ ރިސޯޓަށް މުބާރާތް ކާމިޔާބުކޮށްދީފައެވެ. އެގޮތުން ޝަރަފް ފައިނަލް މެޗަށް ގެނައުމަށް ސަތޯ ބޭނުންނުވާ ކަމަށް ވެސް މައުލޫމާތު ލިބެއެވެ.

އެހެން ނަމަވެސް މިހާރު އެކްސްކޯ މެމްބަރުން އަދި އޮފިޝަލުން ވެސް ސޮނޭވާ އަށް އަރުވަން ސޮނޭވާ އިން ވަނީ އެއްބަސްވެފައި ކަމަށް ރާއްޖެއެމްވީ އަށް ވަނީ މައުލޫމާތު ލިބިފައެވެ.