ގާޒީ ޝަކީލް އާއި އާއިލާއިން ރިޝްވަތު ނުނަގާނެ ކަން އެންމެ ރަނގަޅަށް އެނގޭނީ ރައީސް ޔާމީންއާއި އެމަނިކުފާނުގެ މަދަދުގާރުންނަށް: އާއިލާ

ކުރީގެ ރައީސް އަބްދުﷲ ޔާމީންއަށް ކްރިމިނަލް ކޯޓުގެ އިސް ގާޒީ އަހުމަދު ޝަކީލް 11 އަހަރުގެ ހުކުމެއް އިއްވެވީ ރިޝްވަތު ނަންގަވައިގެން ކަމަށްބުނެ އާއިލާއަށް އިންޒާރުދެމުންދާތީ އެ އާއިލާއިން ރައްދު ދީފިއެވެ.

ގާޒީ ޝަކީލްގެ ބޭބެ، ހޯމް މިނިސްޓްރީގެ ޑެޕިއުޓީ މިނިސްޓަރު އަބޫބަކުރު އަބްދުލްކަރީމް "ރާއްޖެ އެމްވީ" އަށް ވިދާޅުވީ ޗެނަލް 13 އިން ގެންނަ "މަޑިސީލަ" ޕްރޮގްރާމުގައި ހާމަކަން ބޮޑު ގޮތެއްގައި ގާޒީ ޝަކީލުގެ އާއިލާއަށް އިންޒާރުދީ އަބުރަށް އަރައިގެންފައިވާ ކަމަށެވެ. އަދި ސޯޝަލް މީޑިއާގެ ވަސީލަތްތައް ބޭނުންކޮށްގެން އެ އާއިލާގެ އެކި މެމްބަރުންނަށް އިންޒާރުގެ މެސެޖުތަކާއި ޖެއްސުން ކުރަމުންދާ ކަމަށް ވެސް އޭނާ ވިދާޅުވިއެވެ.

Advertisement

އޭނާ ވިދާޅުވި ގޮތުގައި އާއިލާއަށް އިންޒާރުތައް ދެމުންދަނީ އެ އާއިލާގެ ގިނަ މެމްބަރުންތައް އެކި މަގާމުތަކުގައި ތިބުމުގެ ސަބަބުން ކަމަށެވެ. ނަމަވެސް ޝަކީލަށް ކްރިމިނަލް ކޯޓުގެ ވަޒީފާ ހަމަޖެހުމުގެ މާ ކުރިން ވެސް އެ އާއިލާގެ ގިނަ ބަޔަކު ތިބީ ސަރުކާރުގެ ވަޒީފާތަކުގައި ކަމަށާއި އެއީ ހުކުމަށް ފަހުން ލިބިގެން އުޅޭ ވަޒީފާތަކެއް ނޫން ކަމަށް އޭނާ ވިދާޅުވިއެވެ.

އަބޫބަކުރު ވިދާޅުވި ގޮތުގައި ސަރުކާރުގައި އަދާކުރާ ވަޒީފާތަކުގައި ނުފޫޒުގައި ޖެހުމަކީ އެ އާއިލާގެ އެއްވެސް މީހަކު ކުރާ ކަމެއް ނޫނެވެ. އަދި އެ އާއިލާއަށް ފްލެޓު ދީފައިވާ ކަމަށް ދެކެވޭ ވާހަކަތަކަށް ރައްދުދެއްވައި އޭނާ ވިދާޅުވީ މި ސަރުކާރުން ދިން އެންމެ ފްލެޓެއް ވެސް ނެތް ކަމަށެވެ. އޮންނަ އުސޫލުގެ ތެރެއިން ހުށަހަޅައި ފްލެޓް ލިބުނީ ކުރީގެ ރައީސް އަބްދުﷲ ޔާމީންގެ ވެރިކަމުގައި ކަމަށް ވެސް އޭނާ ފާހަގަކުރެއްވިއެވެ.

މީގެ އިތުރުން ގެސްޓްހައުސްއެއް ހަދަމުންދާ ކަމަށް ބުނެ ދެކެވޭ ވާހަކަތަކަކީ ވެސް ކަނޑައެޅިގެން ދޮގު ވާހަކަތަކެއް ކަމަށް އަބޫބަކުރު ވިދާޅުވިއެވެ.

އޭނާ ވިދާޅުވި ގޮތުގައި ގާޒީ ޝަކީލް އަދި އޭނާގެ އާއިލާގެ އެއްވެސް މީހަކު ރިޝްވަތު ނުނަގާނެ ކަން އެންމެ ބޮޑަށް އެނގޭނީ ރައީސް ޔާމީން އާއި އެމަނިކުފާނުގެ އަރިސް ބޭފުޅުންނަށެވެ. އަދި އެއީ "ވަރަށް ވާހަކަ" ކަމަށް އޭނާ ވިދާޅުވިއެވެ.