ބޭނުންވަނީ ބާސެލޯނާގައި މަޑުކުރަންކަމަށް, އެ ޓީމަށް ކުޅެމުން އަންނަ ސާޖީ ރޮބާޓޯ ބުނެފިއެވެ.

އުމުރުން 30 އަހަރުގެ މިޑްފީލްޑަރު ބާސެލޯނާއާއެކު ހަދާފައިވާ އެއްބަސްވުމުގެ މުއްދަތު މި ސީޒަންގެ ނިޔަލަށް ހަމަވާނެއެވެ. އެއްބަސްވުމުގެ މުއްދަތު ހަމަވުމާއެކު ބާސެލޯނާއިން ސާޖީ ރޮބާޓޯގެ އެއްބަސްވުން އައުނުކުރާނެކަމަށް އަޑުތައް ވަނީ ފެތުރިފައެވެ. ނަމަވެސް އެކަމާގުޅިގެން ބާސެލޯނާއިން ރަސްމީކޮށް ވަކި އެއްޗެއް ބުނެފައެއް ނުވެއެވެ. ކުޅިވަރު ޗެނަލަކަށް ދިން އިންޓަވިޔުއެއްގައި ސާޖީ ރޮބާޓޯ ބުނީ އޭނާ ބޭނުންވަނީ ބާސެލޯނާގައި މަޑުކުރަން ކަމަށެވެ. އޭނާ ބުނީ ބޭނުންވަނީ އެއްބަސްވުން އައުކުރަން ކަމަށާއި، އެއީ އޭނާ އެންމެ އިސްކަންދޭ ކަންތައްކަމަށެވެ. ނަމަވެސް އެކަމާ ގުޅޭގޮތުން މިހާތަނަށް ބާސެލޯނާއާއެކު އެއްވެސް މަޝްވަރާއެއް ނުކުރާކަމަށް އޭނާ ބުންޏެވެ.

ސާޖީ ރޮބާޓޯ ބުނީ ބާސެލޯނާގެ ކޯޗު ޒަވީ ހެނާންޑޭޒް ބޭނުންވަނީ އޭނާ ކުލަބުގައި މަޑުކުރަން ކަމަށެެވެ. އަދި އެކަމުގެ ވާހަކަތައް ޒަވީ އޭނާއާ ދެއްކިކަމަށާއި، އެކަން އެގޮތަށް ވާނެކަމަށް އުންމީދުވެސް ކުރާ ކަމަށެވެ. ކޯޗު ބުނިގޮތުގައި އޭނާއަކީ ކޯޗުގެ ޕްލޭންގައި ހިމެނޭ ކުޅުންތެރިޔެއް ކަމަށާއި، ކުލަބާއެކު ކުރިއަށްދާން ކޯޗުވެސް އެދޭކަމަށެވެ.

ބާސެލޯނާއަށް ކުޅެން ސާޖީ ރޮބާޓޯ ފެށީ 2010 ވަނަ އަހަރުއެވެ. އޭގެ ފަހުން މިވީހާތަނަށް އޭނާ ވަނީ އެ ކުލަބަށް ކުޅެދިން 328 މެޗުގައި 14 ލަނޑު ޖަހާފައެވެ. މީގެ އިތުރުން ބާސެލޯނާއާއެކު އޭނާ ވަނީ 19 ތައްޓެއް ކާމިޔާބުކޮށްފައެވެ. އޭގެ ތެރޭގައި ސްޕެނިޝް ލީގާއި، ކޮޕާ ޑެލްރޭއާއި، ސްޕެނިޝް ސުޕަރ ކަޕާއި، ޔުއެފާ ޗެމްޕިއަންސް ލީގާއި، ޔުއެފާ ސުޕަރ ކަޕް އަދި ފީފާ ކުލަބް ވޯލްޑް ކަޕް ހިމެނެއެވެ.