ނެދަލެންޑްސްގެ ޕީއެސްވީ އަށް ކުޅެމުން އަންނަ ކޯޑީ ގަކްޕޯ ޕްރިމިއާ ލީގުގެ މެންޗެސްޓަރ ޔުނައިޓެޑާ މެދު ގެންގުޅޭ ޚިޔާލު ބަދަލު ނުވާ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 23 އަހަރުގެ ގަކްޕޯ ބޭނުންވަނީ ކުރިމަގުގައި ޔުނައިޓެޑަށް ކުޅެން ކަމަށް ވެސް ރިޕޯޓުތައް ބުނެ އެވެ. ޒުވާން ކުޅުންތެރިޔާ ވަނީ މިއަހަރު ޤަތަރުގައި އޮތް ފީފާ ވޯލްޑް ކަޕް މުބާރާތުގައި ވެސް މޮޅު ކުޅުމެއް ދައްކައިފަ އެވެ. ނެދަލެންޑްސްއާއެކު މުބާރާތަށް ކުރިމަތިލައި، ގަކްޕޯ ވަނީ އެ ޓީމު މޮޅު ކޮށްދިނުމުގައި މުހިންމު ދައުރެއް އަދާކޮށްފަ އެވެ. މުބާރާތުގެ ގްރޫޕް ސްޓޭޖުގައި ނެދަލެންޑްސް ކުޅުނު ތިން މެޗުގައި ވެސް ގަކްޕޯ ވަނީ ލަނޑު ޖަހާފަ އެވެ. އެއީ ސެނެގާލް، އިކުއެޑޯ، އަދި ޤަތަރާ ދެކޮޅަށެވެ. މުބާރާތުން ނެދަލެންޑްސް ކެޓީ ކުއާޓާ ފައިނަލްގައި އާޖެންޓީނާ އަތުން ޕެނަލްޓީގަ އެވެ.

ރިޕޯޓުތައް ބުނާ ގޮތުން މިދިޔަ ސީޒަންގައި ވެސް ޔުނައިޓެޑާ ގުޅުމުގެ މަޝްވަރާތައް ކުރި އެވެ. އެ މަޝްވަރާތައް އަދިވެސް އެގޮތުގައި އޮތް ކަމަށާއި، އެކަމާ ގަކްޕޯގެ އެޖެންޓް އަންނަނީ މަސައްކަތް ކުރަމުން ކަމަށް ވެސް ރިޕޯޓުތައް ބުނެ އެވެ. މީގެ އިތުރުން ޔުނައިޓެޑާއި ގަކްޕޯގެ އެޖެންޓާ ދެމެދު މަޝްވަރާތައް ކުރެވެމުން އަންނަ ކަމަށާއި، މަޝްވަރާތަކުގެ ނަތީޖާ ރަނގަޅު ކަމަށް ވެސް ރިޕޯޓުތައް ބުނެ އެވެ. އެކަމާމެދު ގޮތެއް ނިންމުން މިހާރު އޮތީ ޔުނައިޓެޑުގެ އަތް މަތީގައި ކަމަށް ވެސް ރިޕޯޓުތައް ބުނެ އެވެ. ހަމައެއާއެކު ގަކްޕޯގެ ހޯދުމަށް 55 މިލިއަން ނުވަތަ 60 މިލިއަން ޔޫރޯ ޚަރަދުކުރަން ޖެހޭނެ ކަމަށާއި، އެއީ ކިހާ ފެންވަރެއްގެ އިންވެސްޓަކަށްވާނެތޯ ޔުނައިޓެޑުގެ އެތެރޭގައި މަޝްވަރާ ކުރަމުން އަންނަ ކަމަށް ވެސް ބޭރުގެ ރިޕޯޓުތަކުގައިވެ އެވެ.

ޒުވާން ފޯވާޑް އޭނާގެ ސީނިއާ ކެރިއަރު ފެށީ 2016 ވަނަ އަހަރު އެވެ. އެއަށްފަހު އޭނާގެ މިހާރުގެ ކުލަބް ޕީއެސްވީ އަށް ބަދަލުވީ 2021 ވަނަ އަހަރު އެވެ. އެ ކުލަބަށް ބަދަލުވެ އޭނާ ވަނީ މިހާތަނަށް ކުޅެދިން 159 މެޗުގައި 55 ލަނޑު ވެސް ޖާހަފަ އެވެ. އެ ކުލަބާއެކު ހަތަރު ތައްޓެއް ކާމިޔާބުކޮށްފައިވާ ގަކްޕޯ އަަށް ނެދަލެންޑްސް ޤައުމީ ޓީމުން ޖާގަ ލިބުނީ މިދިޔަ އަހަރު އެވެ.