ފީފާ ވޯލްޑް ކަޕް ކާމިޔާބުކުރުމަށްފަހު އާޖެންޓީނާއިން އުފާ ފާޅުކުރުން ކުރިއަށް ގެންދިޔަ ވަގުތުގައި ސޯލްޓް ބޭއާ ދަނޑަށް އަރައި، އެ އުފާ ފާޅުކުރުމުގައި ބައިވެރިވި ގޮތް ފީފާއިން ތަހުގީގުކުރަން ފަށައިފިއެވެ.

ސޯލްޓް ބޭއާއަކީ ތުރުކީއަށް ނިސްބަތްވާ މަޝްހޫރު ޝެފެކެވެ. މުބާރާތުގެ ފައިނަލްގައި ޕެނަލްޓީ ޖަހައިގެން އާޖެންޓީނާއިން ފްރާންސް ބަލިކުރި މެޗަށްފަހު އޭނާ ވަނީ ދަނޑަށް އަރައި އުފާ ފާޅު ކުރުމުގައި ބައިވެރިވެފައެވެ. އަދި މުބާރާތުގެ ތައްޓާއެކު އޭނާ ވަނީ ފޮޓޯ ނަގައި، ގިނަ ވަގުތު ހޭދަކޮށްފައެވެ. ސޯލްޓް ބޭއާ ވަނީ މުބާރާތުގެ ތައްޓާއެކު ފޮޓޯ ނެގުމަށްފަހު، ސޯޝަލް މީޑިއާގައިވެސް ހިއްސާކޮށްފައެވެ. ފީފާގެ ގަވާއިދު ބުނާގޮތުން އެއީ މުޅިން މަނާކަމެކެވެ. އެގޮތުން މުބާރާތުގެ ތަށީގައި އަތްލުމުގެ ހުއްދަ އޮންނަނީ މުބާރާތް ކާމިޔާބުކުރާ ކުޅުންތެރިންނާއި، ގައުމުތަކުގެ ވެރިންގެ އިތުރުން، ފީފާގެ ޚާއްސަ ހުއްދައެއް ލިބޭ ފަރާތްތަކަށް އެކަންޏެވެ. އެހެންކަމުން ސޯލްޓް ބޭއާ ތަށީގައި އަތްލުމުގެ ސަބަބުން ސޯޝަލް މީޑިއާގައިވެސް ގިނަ ބަޔަކު ވަނީ ނުރުހުން ފާޅުކޮށްފައެވެ.

މިކަމާގުޅިގެން ފީފާގެ ތަރުޖަމާނު ވިދާޅުވީ، ޑިސެެމްބަރު މަހުގެ 18 ވަނަ ދުވަހުގެ ކުޅެވުނު ފައިނަލް މެޗަށްފަހު އުފާ ފާޅުުކުރުމުގެ ތެރެއިން ގިނަ ބަޔަކު ފީފާގެ އުސޫލާއި، ގަވާއިދާ ޚިލާފު ކަންތައްތަކެއް ކޮށްފައިވާކަން ފާހަގަކުރެވުނު ކަމަށެވެ. އަދި އެކަންކަމުގެ ތަހުގީގު މިހާރު ފީފާއިން ކުރަމުން އަންނަ ކަމަށްވެސް ތަރުޖަމާނު ވިދާޅުވިއެވެ. ތަރުޖަމާނު ވިދާޅުވީ އެކަންކަމުގެ ފުރިހަމަ ތަހުގީގަށްފަހު ފީފާއިން އެންމެ އެކަށީގެންވާ ފިޔަވަޅުވެސް އަޅާނެކަމަށެވެ.

މިއަހަރުގެ މުބާރާތް އާޖެންޓީނާއިން ކާމިޔާބުކުރީ 36 އަހަރަށްފަހުއެވެ. އެހެންކަމުން މިކަމުގެ އުފާ ފާޅުކުރުމަށް އެ ގައުމުން އަންނަނީ އެކިއެކި ކަންކަން ކުރަމުންނެވެ.