ފަލަސްޠީނޭ ބުނުމުން ތާ އަބަދުމެ ހަނގުރާމައާއި މާޔޫސްކަމާއި ހިތްދަތިކަން ސިފަ ކުރެވުނު ކަމުގައި ވީ ނަމަވެސް، އެއީ އަދި މުޅިން ފުރިހަމަ ތަސްވީރެއް ނޫނެވެ. ފަލަސްޠީނުގައިވެސް މުއްސަނދި ޘަޤާފަތަކާއި އާދަތަކެއް އެބަ އޮތެވެ. އެ ކަންކަން ތަޖުރިބާ ކުރުމަށް އެދިގެން، ފަލަސްޠީނަށް ދަތުރު ކުރާ މީހުންވެސް އުޅެއެވެ. އެގޮތުން، ފަލަސްޠީނަށް ދަތުރު ކުރާ މެހެމާނުންނަށް، ފަލަސްޠީނުގެ ރަހަތައް ދައްކާލުމުގެ މަސައްކަތުގައި އެންމެ އިސްކޮށް އުޅޭ އެކަކީ، ޝެފް އިއްޒަލްދީން ބުޚާރީއެވެ.

ޤުދުސްގައި އެންމެ އާޘާރުތައް ގިނަ، އޯލްޑް ސިޓީއޭ ކިއުނު ސަރަޙައްދުގައި އަބޫ ޝުކްރީ ހިންގާ ހަމަސް ރެސްޓޯރަންޓްގައި، ފަތުރުވެރިންނަށް ހެނދުނުގެ ނާސްތާގެ ކަންކަން ހަމަޖައްސާދިނުމުގައި ބުޚާރީ އަވަދިނެތި އުޅެނީ، ހުރިހާ ގޮތަކުންވެސް އެންމެ ފުރިހަމަ ރަހަތަކެއް، ކަސްޓަމަރުންނަށް ފޯރުކޮށްދިނުމުގެ އަޒުމުގައެވެ. އެ ރެސްޓޯރަންޓްގައި އެންމެ ހިނގާ އެއް ޑިޝްއަކީ މެދުއިރުމަތީގެ ގިނަ މަންޒިލްތަކަކަށް މަޝްހޫރު ހަމަސް އެވެ. އެއީ ބޮޑު ސަނާމުގާއި، ޓަހީނީ އަދި ލުނބޯހުތް ބޭނުންކޮށްގެން ތައްޔާރު ކުރާ، އަނގަޔަށް މީރު ޕޭސްޓުގަނޑެކެވެ. ހަމަސް އަކީ ފަލަސްޠީނުގެ އެއްޗެއްތޯ ނުވަތަ ފަލަސްޠީނަށް ވެރިވެގަނެގެން އުޅޭ ޔަހޫދީންގެ އެއްޗެއްތޯ ކުރެވޭ ބަހުސަކީވެސް ހޫނު ބަހުސެކެވެ.

ބުޚާރީ ހާއްސަ ވަނީ ހަމައެކަނި ކެއްކުމަކަށް ނޫނެވެ. ފަލަސްޠީނަށް ޒިޔާރަތް ކުރާ ފަތުރުވެރިން ގޮވައިގެން މަގުތަކުގައި ހިނގާ، އެތައް ސަތޭކަ އަހަރެއްވީ ފަލަސްޠީނުގެ ތާރީޚާ ގުޅިފައިވާ ތަންތަނުގެ މައުލޫމާތު ހިއްސާ ކުރެއެވެ. އެތައް ހާސް އަހަރެއްވީ ރެސިޕީތަކުގެ ވާހަކަތައް އެމީހުންނަށް ކިޔައިދެއެވެ.

އިޒްރޭލުގެ ފިއްތުންތަކާއި ދާޚީލީ ދެބަސްވުންތަކާއި އަވަށްޓެރި ފިއްތުންތަކުގެ ސަބަބުން، ތާއަބަދުމެހެން ހާސްކަމެއްގައި ދިރިއުޅެން ޖެހިފައިވާ ފަލަސްޠީނުގެ ރައްޔިތުންނަށް، ކޭމަކީ އެމީހުންގެ ޘަޤާފަތުގެ މުހިންމު ބައެކެވެ. ފަލަސްޠީނުގެ ވާހަކަ އިތުރު މީހަކަށް ކިޔައިދޭން ފަށައިގަންނަ މައިގަނޑު މައުލޫއަކަށްވެސް ވެފައި އޮންނަނީ ފަލަސްޠީނުގެ ކޭމުގެ ވާހަކައެވެ.

ބުޚާރީ ސިފަ ކުރާ ގޮތުގައި، ޕިއްޒާ ފުއްގަނޑު ކަހަލަ ފުއްގަނޑެއްގައި ތައްޔާރު ކުރާ ކީސް ނުވަތަ ކްރާސް ބީދްއަކީ ހަމަ އެކަނި ކޭމެއް ނޫނެވެ. އެއީ އިޖުތިމާޢީ ބަދަހި ގުޅުންތަކުގެ ރަމްޒެކެވެ.

އިރުމަތީ ޤުދުސްގައި ދިރިއުޅެމުންދާ ފަލަސްޠީނުގެ 340000 އަށް ވުރެ ގިނަ ރައްޔިތުންގެ ތެރެއިން ގިނަ ބައެއްގެ އަތުގައި އިޒްރޭލުގެ ރަށްވެހިކަމުގެ ހުއްދަ ނުވަތަ ރެސިޑަންސީ ޕަރމިޓް އޮވެއެވެ. ނަމަވެސް، އިޒްރޭލުގެ ރަށްވެހިކަން އޮންނަނީ މަދު ބައެއްގެ އަތުގައެވެ. އިޒްރޭލުން ވަކާލާތު ކުރާ ގޮތުގައި އިރުމަތީ ޤުދުސްގެ ފުރިހަމަ މިލްކުވެރިންނަކީ އެބައި މީހުންނެވެ.

އިރުމަތީ ޤުދުސްއަށް އިޒްރޭލުން ވެރިވެގަތީ 1967 ވަނަ އަހަރުއެވެ. އޭގެ ފަހުން އިތުރު ބިންތައް ހިޞާރު ކުރަމުންދާ ދިއުމަށް، ބައިނަލްއަޤުވާމީ މުޖުތަމަޢުން މަރުޙަބާ ކިއާފައެއް ނުވެއެވެ. ނަމަވެސް، އެކަން ހުއްޓުވުމަށްވެސް އެދެވޭ މަސައްކަތްތަކެއް ކޮށްފައެއް ނުވެއެވެ.

އިޒްރޭލުގެ ޔަހޫދީންނާއި ފަލަސްޠީނުގެ މުސްލިމުންނާ ދެމެދު ސިލްސިލާ ގޮތެއްގައި ކުރިމަތިލުންތައް ހިންގާ، ހަމަނުޖެހުންތައް ބަންޑުންވެގެންދާ އެއް ސަރަޙައްދަކީ އަލް-އަޤްޞާ މިސްކިތެވެ.

މުއްސަނދި ތާރީޚެއް އޮތް ފަލަސްޠީނުގެ ވާހަކަތައް، ބުޚާރީ ތަފްސީލުކޮށްދެމުން ދާއިރު، ފަލަސްޠީނުގެ ކެއިންބުއިމުގެ އާދަކާދައަށް އައި ބަދަލުތަކުގެ ވާހަކަވެސް އޭނާ ކިޔައިދެއެވެ.

ސިޔާސީ ބަހުސްތަކުން ނުތަނަވަސްކަން ވެރިވެފައިވާ ސުފުރާތަކަށް، ބުޚާރީގެ ވާހަކަތަކުން ލުއިކަން ގެނެސްދެއެވެ. ފަލަސްޠީނުގައި އޮތް ހަމައެކަނި ކަމަކީ ލޭއޮހުރުވުން ކަމަށް ހީވެފައި ތިބި އެތައް ބައެއްގެ ފިކުރުވެސް ބަދަލުކޮށްލައެވެ. ނަމަވެސް، މިކަން ދެމިގެން ދިއުމަށް ބައިނަލްއަޤުވާމީ އެހީ ބޭނުންވެއެވެ. މިކަމަށްވެސް އިޒްރޭލުން ހުރަސް އަޅާނީ ކޮން އިރަކު، ކިހިނެއް ކަމެއް ނޭނގެއެވެ.