ހޯރަފުށީގައި އިންޓަރނޭޝަނަލް ސްކޫލެއް ހިންގާނެ ބަޔަކު ހޯދަނީ
މި ސްކޫލް ހިންގުމަށް ދޫކުރާނީ 5 އަހަރާ 15 އަހަރާ ދެމެދުގެ މުއްދަތަކަށް
ހއ. ހޯރަފުށި
ހއ. ހޯރަފުށީގައި ބިނާކޮށްފައިވާ އެ ރަށު ކައުންސިލްގެ ސްކޫލް އިމާރާތުގައި އިންޓަރނޭޝަނަލް ސްކޫލެއް ހިންގާނެ ފަރާތެއް ހޯދަން އިއުލާންކޮށްފިއެވެ.
ހޯރަފުށީ ކައުންސިލުން ބުނެފައިވާ ގޮތުގައި މި ސްކޫލް ހިންގުމަށް އެދި ހުށަހެޅޭނީ ވިޔަފާރި ރަޖިސްޓްރީ ކުރުމުގެ ގާނޫނުގެ ދަށުން ވިޔަފާރި ރަޖިސްޓްރީ ކޮށްފައިވާ ފަރާތްތަކަށެވެ. މިކަމަށް ޝައުގުވެރިވާ ފަރާތްތަކުން މި މަހުގެ 27 ވަނަ ދުވަހުގެ މެންދުރު 1:00ގެ ކުރިން އޮންލައިންކޮށް ކައުންސިލަށް އެކަން އަންގަންޖެހޭނެއެވެ. 27 ޑިސެމްބަރުގައި، ބީލަމާގުޅޭ މައުލޫމާތު ސެޝަނާއި ސައިޓް ވިޒިޓިންގ ކުރިއަށްދާނެ ކަމަށްވެސް އެ ރަށު ކައުންސިލުން ބުނެއެވެ.
އިންޓަނޭޝަނަލް ސްކޫލް ހިންގުމަށް ބިޑު ހުށަހެޅުން ކުރިއަށްދާނީ 10 ޖެނުއަރީ 2023ގައެވެ. އެގޮތުން ޕާޓްނަރޝިޕް ގާނޫނުގެ ދަށުން ރަޖިސްޓްރީކޮށްފައިވާ ޕާޓްނަރޝިޕްތަކަށާއި، ކޯޕަރޭޓިވް ސޮސައިޓީގެ ގާނޫނުގެ ދަށުން ރަޖިސްޓްރީ ކުރެވިފައިވާ ކޯޕަރޭޓިވް ސޮސައިޓީތަކަށާއި، އަމިއްލަ ފަރުދުންގެ ވިޔަފާރީގެ ގާނޫނުގެ ދަށުން ރަޖިސްޓްރީ ކުރެވިފައިވާ އަމިއްލަ ފަރުދުންގެ ވިޔަފާރިތަކަށާއި، ފޮރިން އިންވެސްޓްމެންޓްގެ ގޮތުގައި އިކޮނޮމިކް މިނިސްޓްރީގައި ރަޖިސްޓްރީކޮށްފައިވާ ކުންފުނިތަކަށާއި، އެޑިއުކޭޝަން މިނިސްޓްރީގައި ރަޖިސްޓްރީކޮށްގެން މިހާރުވެސް ތައުލީމީ ޚިދުމަތް ދޭ ފަރާތްތަކަށް ބިޑް ޕްރޮޕޯސަލް ހުށަހެޅޭނެކަމަށް ހޯރަފުށީ ކައުންސިލުން ބުންޏެވެ.
ހޯރަފުށީ ކައުންސިލުން ބުނީ އެ ރަށުގައި އިންޓަރނޭޝަނަލް ސްކޫލެއްގެ ޚިދުމަތް ދޭން ނިންމީ، ޕްރީ ސްކޫލުުގެ މަރުހަލާއިން ފެށިގެން ކީ ސްޓޭޖް 5އާ ދެމެދު، ޒަމާނީ ވަސީލަތްތަކާއެކު ދުނިޔޭގެ ކުރިއަރާފައިވާ ތައުލީމީ ސިސްޓަމްތަކާ އެެއް ފެންވަރެއްގައި، ފެންވަރު ރަނގަޅު، ޒަމާނީ ތައުލީމު ހޯރަފުށީގެ ދަރިވަރުންނަށް ހޯދައިނުމަށް ކަމަށެވެ. އަދި ޚާއްސަކޮށް، ޕްރީ ސްކޫލް މަރުހަލާގައި އެ އުމުރުފުރައިގެ ކުދިންނަށް ބޭނުންވާނޭ ތައުލީމާއި ހުނަރު ލިއްބައިދޭނޭ ފުރުސަތު ހޯރަފުށީ ކައުންސިލްގެ އިސްނެގުމުގެ މަތިން ފޯރުކޮށްދެވޭނޭ މަގު، އެ ރަށުގައި ގާއިމުކުރުމަކީވެސް މި ސްކޫލް ހުޅުވުމުގެ މަގުސަދެއް ކަމަށް އެ ކައުންސިލުން ބުންޏެވެ.
މި ސްކޫލް ހިންގުމަށް، ވަށާ ފާރު ރާނައި ގޭޓް ހަރުކޮށްފައިވާ 11406 އަކަފޫޓުގެ ބިމުގައި ހަދާފައިވާ އިމާރާތާއި، ޕްލޭ ގްރައުންޑް އަދި ގުދަނަކާއި ޕަބްލިކް ފާޚާނާއަކާއި، ދަރިވަރުންނަށް ޚާއްސަ ހަތަރު ފާހާނާ ލިބޭނެއެވެ. އަދި އިންޓަރނޭޝަނަލް ސްކޫލްގެ އިމާރާތުގައި ތިން ކުލާސްރޫމާއި، ޕްރިންސިޕަލް ރޫމާއި، ސްޓާފް ރޫމާއި ރިސެޕްޝަން އޭރިއާއެއް ހިމެނޭނެއެވެ.
މީގެ އިތުރުން، ދަރިވަރުން ކިޔެވުމަށް ބޭނުންކުރާނޭ ގޮޑިއާއި މޭޒު ކައުންސިލުން ފޯރުކޮށްދޭނެއެވެ. އަދި ޕްލޭ ގްރައުންޑްގައި މައިގަނޑު ތަކެތި ހަރުކޮށްދޭނެއެވެ.
ހޯރަފުށީ ކައުންސިލުން މި ސްކޫލް ހިންގުމަށް ދޫކުރާނީ 5 އަހަރާއި 15 އަހަރާ ދެމެދުގެ މުއްދަތަކަށެވެ. ސްކޫލު ހިންގުމަށް ހަވާލުވާ ފަރާތުން އެގްރީމެންޓް ކުރެވޭ މުއްދަތުގައި ސްކޫލު ހިންގުމުގެ ފުރިހަމަކަމާއި، ނަތީޖާ ނެރުމަށް ކުރާ މަސައްކަތް، އަދި ޑިވެލޮޕްމެންޓަލް ޕްލޭނާއި މެނޭޖްމެންޓަލް ޕްލޭނާ އެއްގޮތަށް ގެންދާ ފުރިހަމަކަމަށް ބަލައި (ސްކޫލު ހިންގާ ފަރާތުން މުއްދަތު އިތުރުކުރަން އެދިއްޖެނަމަ) ދެފަރާތުން އެއްބަސްވެވޭ ގޮތެއްގެ މަތިން އިތުރު ފަސް އަހަރުގެ މުއްދަތަށް، ކައުންސިލުގެ ޖަލްސާއަކުން ފާސްކުރާ ނިންމުމަކުން މުއްދަތު އިތުރުކޮށްދެވިދާނެ ކަމަށްވެސް ވަނީ ބުނެފައެވެ.
މި ސްކޫލް ހިންގަން ކައުންސިލުން އެއްވެސް ކުއްޔެއް ނުނަގާނެއެވެ. އެއީ ދަރިވަރުންގެ އަތުން ނަގާ ފީ ނިސްބަތުން ކުޑަކުރުމަށް ނިންމި ނިންމުމެއްކަމަށް އެ ރަށު ކައުންސިލުން ބުނެއެވެ.
