ރާއްޖެއަށް މަސްތުވާތަކެތި އެތެރެ ކުރުމުގެ ކުށުގެ ދައުވާ އުފުލާފައިވާ ތުރުކީ ރައްޔިތަކު، އޭނާ ރާއްޖެ އައީ ބަޔަކު ބިރުދައްކައިގެންކަމަށް ކްރިމިނަލް ކޯޓުގައި ބުނެފިއެވެ.

މި މައްސަލައިގައި ދައުވާ އުފުލާފައިވަނީ ތުރުކީގެ ރައްޔިތެއްކަމަށްވާ އެމްރާހް އިޖާދީގެ މައްޗަށެވެ. އޭނާގެ މައްޗަށް އުފުލާފައިވަނީ ދިވެހިރާއްޖެއަށް މަސްތުވާތަކެތި އެތެރެކުރުމުގެ ކުށުގެ ދައުވާއެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އާދަމް މުޙައްމަދުއެވެ.

އޭނާގެ މައްޗަށް ކުރާ ދައުވާއާއި ގުޅިގެން މީގެ ކުރިން 4 ފަހަރު މައްސަލަ ތާވަލު ކުރިނަމަވެސް، އަދި ބޭއްވިފައިވަނީ 2 އަޑުއެހުމެކެވެ.

މި މައްސަލައިގައި އަންގާރަ ދުވަހު ބޭއްވި އަޑުއެހުމުގައި ދައުލަތުން ވަނީ ދައުވާ ހުށައެޅުން ކުރިއަށް ގެންދަވާފައެވެ. އެގޮތުން ދައުލަތުން ދައުވާ ހުށައަޅަމުން ބުނެފައިވަނީ، 30 މެއި 2022 ވަނަ ދުވަހު އޭނާ ރާއްޖެ އައުމުން އޭނާގެ އަމަލުތަކާމެދު ޝައްކު ކުރެވިގެން ކަސްޓަމްސްއިން އޭނާ ހުއްޓުވައި ފާސްކޮށްފައިވާ ކަމަށެވެ.

އޭނާ ރާއްޖެއަށް ދަތުރު ކޮށްފައިވަނީ ޕާކިސްތާނުގެ ލާހޫރުންނެވެ.

އޭނާ ހޮސްޕިޓަލަށް ގެންގޮސް، އޭނާގެ ހަށިގަނޑުގެ ތެރޭގައި ސްކޭންކޮށް ބެލިއިރު، އެތެރޭގައި އެއްޗެއް ފޮރުވާފައިވާކަމަށް ބެލެވުނު ކަމަށް ދައުލަތުން ދައުވާ ހުށައަޅަމުން ބުނެފައިވެއެވެ.

އޭގެ ފަހުން އޭނާ އެކި ފަހަރުމަތިން ބޮޑުކަމު ދިޔަ ތަކެތި ޓެސްޓު ކުރުމުން މަސްތުވާތަކެތި ރައްކާކޮށްފައިވާ ބުލެޓުތައް ވަނީ ހޯދާފައެވެ. އެގޮތުން ތަހުލީލު ރިޕޯޓުން ދައްކާ ގޮތުގައި އެއީ ޑައިމޯފިންއެވެ.

ދައުލަތުން ބުނާ ގޮތުގައި އޭނާގެ މައްޗަށް ކުރާ ދައުވާއާ ގުޅިގެން އަންނާނެ އަދަބަކީ އުމުރަށް ޖަލަށް ލުމާއެކު، 1 ލައްކައާއި، 10 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ.

އެއަށްފަހު ގާޒީ ވަނީ ދައުވާލިބޭ ފަރާތަށް ލިބިގެންވާ ޙައްޤުތައް ކަށަވަރު ކޮށްދެއްވާފައެވެ.

މި މައްސަލައިގައި ކޮށްފައިވާ ދައުވާއަށް ޖަވާބުދާރީވަމުން އޭނާ ބުނެފައިވާ ގޮތުގައި އޭނާ ރާއްޖެ އައީވެސް މަޖުބޫރީ ޙާލަތެއްގައެވެ. އެގޮތުން ޕާކިސްތާނުގައި ހުރެފައި އޭނާ އަނބުރާ އޭނާގެ ޤައުމުކަމަށްވާ ތުރުކީއަށް ދާން އުޅުމުން، ބަޔަކު އޭނާއަށް ބްލެކްމެއިލްކޮށް އޭނާއަށް ޤައުމަށް ނުދެވޭނެކަމަށް ބުނެ، ބިރުދައްކާފައިވާކަމަށް ވަނީ ބުނެފައެވެ.

ޝަރީއަތުގައި ވާހަކަ ދައްކަމުން އޭނާ ބުނީ، އޭނާ ޕާކިސްތާނަށް ދިޔައީ 2 ފަހަރު ކަމަށާއި، ދެ ފަހަރުވެސް ދިޔައީ ވިޔަފާރިއާ ގުޅޭ ކަމެއްގައިކަމަށެވެ.

އަދި އޭނާއަކީ ޓެޓޫގެ ވިޔަފާރިކުރާ މީހެއް ކަމަށާއި، އަންހެނުންނަކީ ޑޮކްޓަރެއްކަން ފާހަގަކޮށް އޭނާ ބުނީ، އޭނާއަކީ މަސްތުވާތަކެތި ވިއްކައިގެން ފައިސާ ހޯދަން ޖެހޭ ޙާލަތެއްގައި ހުރި މީހެއް ނޫން ކަމަށެވެ.

އަދި އޭނާ މަރާލާނެކަމުގެ އިންޒާރުދީ، ބިރުދެއްކުމުން އޭނާ ރާއްޖެ އައުމަށް އެއްބަސްވީކަން އޭނާ ފާހަގަ ކުރެއެވެ.

އޭނާއަކީ ދުވަހަކުވެސް ރާއްޖެ އައި މީހެއް ނޫން ކަމަށާއި، ރާއްޖޭގައި އޭނާ ދަންނަ މީހެއްވެސް ނުހުންނާނެކަމަށް އޭނާ ބުނެއެވެ.  

ނަމަވެސް ތަހުގީގުގައި ފުލުހުން ސުވާލު ކުރުމުންވެސް އޭނާ އެ ވާހަކަތައް ދައްކާފައިނުވާކަން ދައުލަތުން ފާހަގަ ކުރިއެވެ.

އެއަށްފަހު ދެ ފަރާތުން ވަނީ ހެކި ހާމަކޮށްފައެވެ. ދިފާއުން ވަނީ ދައުވާލިބޭ ފަރާތް ބްލެކްމެއިލް ކުރިކަން ސާބިތު ކުރުމަށްޓަކައި ބޭނުންވާ ވީޑިއޯއެއް ހެކީގެ ގޮތުގައި ހުށައަޅާނެކަމަށް ބުނެފައެވެ.

މި މައްސަލައިގައި ޝަރީއަތުގެ ކުރީގެ ހުށައެޅުމެއް ނެތުމުން، ދެން އޮންނާނީ މި މައްސަލައިގެ އިފްތިތާޙީ ބަޔާން އިއްވުމެވެ. މައްސަލަ ބައްލަވާ ގާޒީ ވިދާޅުވީ، ޖެނުއަރީ މަހު އެކަމާ ގުޅޭ އަޑުއެހުން ބާއްވަވާނެ ކަމަށެވެ.

ގާޒީ ވަނީ މިއީ މަދަނީ މިންގަނޑުން ކުރިއަށް ގެންދެވޭނެ ދައުވާއެއްކަމަށް ކަނޑައަޅުއްވާފައެވެ.

ދިފާއުން ވަނީ އޭނާ ދުވަހަކުވެސް އަނބުރާ ރާއްޖެއަށް ނާދެވޭ ގޮތަށް ޑީޕޯޓު ކޮށްލުމަށް ޕީޖީ އޮފީހުގައިވެސް އެދިފައެވެ. ނަމަވެސް އެގޮތުގެ މަތިން ޑީޕޯޓު ކޮށްލެވެން ނެތްކަމަށް ޕީޖީ އޮފީހުން ވަނީ އަންގާފައެވެ.