"ޗާޓައިމް" ގެ ފްރެންޗައިޒް ރާއްޖޭގައި ރަސްމީކޮށް ހުޅުވައިފި
"ޗާޓައިމް" ރަސްމީކޮށް ހުޅުވާފައިވަނީ ޖޫން 26 ގައި
"ޗާޓައިމް" ގެ ފްރެންޗައިޒް
ދުނިޔޭގެ އެންމެ މަޝްހޫރު ބަބުލް ޓީ ފްރެންޗައިޒް ކަމަށްވާ "ޗާޓައިމް" ރާއްޖޭގައި ހުޅުވައިފިއެވެ.
ޗާޓައިމް މޯލްޑިވްސްގެ އޮފިޝަލަކު ރާއްޖެއެމްވީއާ ވާހަކަ ދައްކަވަމުން ބުނީ އެފްރަންޗައިޒް ރަސްމީކޮށް ހުޅުވާފައި ވަނީ ހޯމަ ދުވަހު (އިއްޔެ) ކަމަށެވެ. އަދި ކޮންމެ ދުވަހެއްގެ ވެސް ހެނދުނު 11 އިން ފެށިގެން ރޭގަނޑު 12 ޖަހަންދެން އެތަން ހުޅުވާފައި ހުންނާނެ ކަމަށް އޭނާ ވިދާޅުވިއެވެ.. ރަސްމީކޮށް އިއްޔެ ހުޅުވި ނަމަވެސް މީގެ ދުވަސްކޮޅެއް ކުރިން އެތަނުން ވަނީ ޚިދުމަތް ފަށައިފައެވެ.
ޗައިނާ-މޯލްޑިވްސް ފްރެންޑްޝިޕް ބްރިޖް ވިއުއިން ޕްލެޓްފޯމްގެ ތިރީގައި ހުންނަ "ޗާޓައިމް" އިން ޚިދުމަތްދޭން ފަށާފައިވާއިރު މުޅިދުނިޔޭގައި "ޗާޓައިމް" ގެ ފްރެންޗައިޒް 30 ގައުމެއްގައި އަދި 1002 ޚިދުމަތް ދޭ ތަން ހުރެއެވެ.
އޭގެ ތެރޭގައި ޗައިނާ، މެލޭޝިއާ، ކެނެޑާ، ފިލިޕީންސް، އިންޑިއާ، ތައިލޭންޑް ހިމެނެއެވެ.
"ޗާޓައިމް" އިން އުފައްދަނީ އެކި ވައްތަރުގެ ބުއިންތަކެވެ.
ތަފާތު އެކިވައްތަރުގެ "ފްލޭވާ ޓީ"އާ އެކު ފެށި "ޗާޓައިމް" އިން މިހާރު ވަނީ ތަފާތު ޖޫސް، ކޮފީ އަދި ސްމޫތީސްގެ ޚިދުމަތް ދޭން ފަށާފައެވެ. "ޗާޓައިމް" ގެ ހެޑްކުއާޓާ ހުންނަނީ ތައިވާނުގެ ޒޫބެއިގައެވެ. 2005 ވަނަ އަހަރު އުފެއްދި "ޗާޓައިމް" ގެ ފައުންޑާއަކީ ހެންރީ ވެންގެވެ.
ރާއްޖޭގައި "ޗާޓައިމް" ތައާރަފް ކުރަނީ ނިއުޕޯޓާ ގުޅިގެންނެވެ.
