ރަޖިސްޓްރީ ކުރަން ހުށަހަޅާ އުޅަނދުތަކުގެ ރަޖިސްޓްރީ ނަންބަރު އާންމުކުރަން ފަށައިފި
ޑިސެމްބަރ 13 ވަނަ ދުވަހުން ފެށިގެން މިނިސްޓްރީގެ ވެބްސައިޓްގައި ރަޖިސްޓްރީ ކުރާ ރަޖިސްޓްރީ ނަންބަރުތައް ޢާންމުކުރަމުންދާނެ
މާލޭގެ މަގުމަތި
މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ރަޖިސްޓްރީ ކުރާ އެންމެހާ އެއްގަމު އުޅަނދުތަކުގެ ރަޖިސްޓްރީ ނަންބަރު އެމިނިސްޓްރީން އާންމުކުރަން ފަށައިފިއެވެ.
އެކަމާއި ގުޅިގެން ޓްރާންސްޕޯޓް މިނިސްޓްރީން ބުނީ މިނިސްޓްރީން ރަޖިސްޓްރީ ކުރަމުންދާ އެންމެހާ އުޅަނދުތަކުގެ ޞައްޙަކަން ކަށަވަރުކުރުމުގެ ގޮތުންނާއި، ކޮރަޕްޝަނަށް މަގުފަހި ނުވާނޭހެން ވީހާވެސް ހާމަކަން ބޮޑު ގޮތެއްގައި މަސައްކަތްކުރުމަށާއި، އަދި އެއްވެސް ފަރާތަކަށް ގަވާއިދާ ޚިލާފު ޢަމަލުތައް ހިންގުނަ ނުދިނުމުގެ ގޮތުން މި މިނިސްޓްރީން ރަޖިސްޓްރީ ކުރާ އެންމެހާ އެއްގަމު އުޅަނދުތަކުގެ ރަޖިސްޓްރީ ނަންބަރު ޢާންމުނަށް ފެންނަން ހުންނާނެހެން އިއުލާންކުރަމުން ގެންދާނެކަމަށެވެ. އެގޮތުން ޑިސެމްބަރު 13 ވަނަ ދުވަހުން ފެށިގެން މިނިސްޓްރީގެ ވެބްސައިޓްގައި ރަޖިސްޓްރީ ކުރާ ރަޖިސްޓްރީ ނަންބަރުތައް ޢާންމުކުރަމުން ގެންދިޔުމަށް ނިންމާފައިވާކަމަށް އެމިނިސްޓްރީން ބުނެއެވެ.
ޓްރާންސްޕޯޓް މިނިސްޓްރީގައި ރަޖިސްޓްރީކުރާ ހުރިހާ އުޅަނދުތަކެއްގެ ރަޖިސްޓްރީ ނަންބަރު ޢާންމުކުރަން ނިންމާފައި މިވަނީ، އުޅަނދުތައް ރަޖިސްޓްރީކުރުމުގައި ކޮރަޕްޝަނަށް މަގުފަހިވާ ކަންކަން ހުރިކަމަށް ބައެއް ފަރާތްތަކުން ތުހުމަތުކުރާތީއެވެ. އެފަދަ ބައެއް މައްސަލަތައް އެންޓި ކޮރަޕްޝަން ކޮމިޝަނަށްވެސް ވަނީ ހުށައަޅާފައެވެ.
އުޅަނދު ރަޖިސްޓްރީ ނަންބަރުތައް އާއްމުކުރުމަށް ޓްރާންސްޕޯޓް މިނިސްޓްރީން ނިންމާފައިވާއިރު، ޤަވާއިދާއި ޚިލާފަށް އެއްގަމު އުޅަނދު ރަޖިސްޓްރީކުރާ މައްސަލާގައި ފަސްޖެހުމެއް ނެތި ފިޔަވަޅު އަޅާނެކަމުގެ އިންޒާރު މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން ޢާއިޝަތު ނަހުލާ ވަނީ މީގެ ކުރިން ދެއްވާފައެވެ. ޓްރާންސްޕޯޓު މިނިސްޓްރީގެ މަސައްކަތްތައް ހަރުދަނާ ކުރުމަށް ކުރަމުންދާ މަސައްކަތްތަކުގެ ތެރެއިންނާއި ހަދަމުންދާ އޮޑިޓުގެ ތެރެއިން އޮޅުވާލައިގެން ރަޖިސްޓްރީ ކޮށްފައިވާ އުޅަނދުތައް ފެންނަމުންދާ ކަމަށް މިނިސްޓަރު ނަހުލާ ވެސް ވަނީ ވިދާޅުވެފައެވެ. އަދި ގަވާއިދާ ހިލާފަށް ރަޖިސްޓްރީ ކޮށްފައިވާ އުޅަނދުތަކުގެ ރަޖިސްޓްރީ ބާތިލު ކުރާނެ ކަމަށް ވެސް ވިދާޅުވިއެވެ. ޓްރާންސްޕޯޓު މިނިސްޓަރު ނަހުލާ ވަނީ ގަވާއިދާ އެއްގޮތަށް އުޅަނދުތައް ރަޖިސްޓްރީ ކުރުމަށް އިލްތިމާސް ކުރައްވާފައެވެ.
ޒީރޯ ޓޮލެރެންސް ޓު ކޮރަޕްޝަނަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ވައުދުފުޅެއް ކަމަށާއި ވަކި މީހަކަށް ބެލުމެއް ނެތި ކޮރަޕްޝަން ހުއްޓުވުމަށް އަޅަންޖެހޭ ކޮންމެ ފިޔަވަޅެއް އަޅުއްވާނެ ކަމަށް ޓްރާންސްޕޯޓު މިނިސްޓަރު ނަހުލާ ވިދާޅުވިއެވެ. އަދި އެ ކަންތައްތައް ހަމަ މަގަށް އެޅުމުގައި އެއްވެސް ފަސްޖެހުމެއް ނެތި މަސައްކަތް ކުރައްވާނެ ކަމަށް ވެސް ވިދާޅުވިއެވެ.
ޓްރާންސްޕޯޓް މިނިސްޓްރީން ދަނީ ގަވާއިދާ ހިލާފަށް ރަޖިސްޓްރީ ކޮށްފައިވާ އުޅަނދުތަކުގެ ރަޖިސްޓްރީ ބާތިލުކޮށް، އެކަން އާންމުކޮށް އަންގާ އިއުލާން ކުރަމުންނެވެ. އެގޮތަށް ރަޖިސްޓްރީ ބާތިލުކުރާ އުޅަނދުތަކުގެ ތެރޭގައި ރާއްޖޭގައި ރަޖިސްޓްރީ ކުރެވޭ އުމުރު ހަމަވެފައިވާ ވެހިކަލްތަކާއި، ގަވާއިދާ ހިލާފަށް މާލޭ ޒޯނަށް ރަޖިސްޓްރީ ބަދަލުކޮށްފައިވާ ވެހިކަލްތައް ހިމެނެއެވެ.
