ޚިޔާނާތުގައި 13 މިލިއަން ހިމެނޭ ކަމަށް ތުހުމަތު ކުރެވޭ '' މާލެ ޓެކްސީ އެޕް" ހެދުމާ ގުޅޭ މައުލޫމާތު ލިބުނީ ނުރަސްމީ ކޮށް: ރައީސް މުއިއްޒު
އެމްޓީސީސީގެ "މާލެ ޓެކްސީ އެޕް" އާ ގުޅޭގޮތުން ފެންމަތިވެފައިވާ ކޮރަޕްޝަންގެ މައްސަލަތައް ޓްރާންސްޕޯޓް މިނިސްޓްރީ މެދުވެރިކޮށް ބައްލަވާނެ ކަމަށް ރައީސް މުއިއްޒު ވިދާޅުވި. ގާނޫނާ ޚިލާފަށް އެއްވެސް ކަމެއް ކުރުމަށް ފުރުސަތު ނުދެއްވާނެ ކަމަށާއި، ނުރަނގަޅު ކަމެއް ހިނގާފައިވާނަމަ އެކަމަށް ފިޔަވަޅު އެޅުމަށް ކަމާބެހޭ މުއައްސަސާތަކަށް އަންގަވާފައިވާނެ ކަމަށްވެސް އެމަނިކުފާނު ވިދާޅުވި. މި އެޕްލިކޭޝަން ތަރައްގީކުރުމުގައި ބޮޑެތި ޚިޔާނާތްތަކެއް ހިމެނޭ ކަމަށް ތުހުމަތު ކުރެވޭއިރު، އެޕް ރަނގަޅަށް މަސައްކަތް ނުކުރާކަމުގެ ޝަކުވާތައް ވަނީ ބޮޑުވެފައި.
އެމްޓީސީސީ ޓެކްސީ ލައިންގެ ޓެކްސީތައް. 03.04.2026 | އެމްޓީސީސީ
13 މިލިއަން ހިޔާނާތް ހިމެނޭ ކަމަށް ތުހުމަތު ކުރެވޭ ''މާލެ ޓެކްސީ އެޕް" ހެދުމުގެ މަސައްކަތް ކުރިއަށްދާކަން އެނގިވަޑައިގަތީ ނުރަސްމީ ކޮށް ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެ އެވެ.
ހޯމަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ރައީސް މުއިއްޒު ވިދާޅުވީ އެމްޓީސީސީން "މާލެ ޓެކްސީ އެޕް" ރަނގަޅަށް ފަންގްޝަން ނުކުރާ ކަމުގެ މައުލޫމާތު ލިބިފައިވާ ކަމަށާއި، އެޕްލިކޭޝަން ހެދުމުގެ މަސައްކަތް ކުރިއަށްދާކަން އެނގުނީ ނުރަސްމީކޮށް ކަމަށެވެ.
ކޮރަޕްޝަންގެ ތުހުމަތަށް އިޝާރާތް ކުރައްވައި ރައީސް މުއިއްޒު ވިދާޅުވީ، ޓްރާންސްޕޯޓު މިނިސްޓްރީ މެދުވެރިކޮށް އެހުރިހާ ކަމެއް ބަލާނެ ކަމަށާއި، ރަނގަޅު މަގުން ކަންކަން ކުރިއަށް ގެންދާނެ ކަމަށެވެ. އަދި އެއްވެސް ފަރާތަކަށް ގާނޫނާ ގަވާއިދާ ހިލާފަށް ނުވަތަ އެއްވެސް ކަހަލަ ނުފޫޒެއް ފޯރުވަައިގެން ނުރަނގަޅު ކަމެއް ކުރުމުގެ ފުރުސަތު ނުދޭނެ ކަމަށް އެމަނިކުފާނު ވިދާޅުވި އެވެ.
އަޅުގަނޑުމެން އޮންނާނީ ރައީސް އޮފީހުން އޮންނާނީ އަންގާފައި އެމްޓީސީސީއަށް ޓްރާސްޕޯޓު މިނިސްޓްރީއަށް މިކަން ރަނގަޅަށް ބައްލަވާ އެއްވެސް ކަހަލަ ކަމެއް ނުރަނގަޅު ކަމެއް ހިނގާ ކަމަށްވަންޏާ ވަގުތުން އެކަމަށް އެޓެންޑްވެ ފިޔަވަޅުތައް އެޅުމަށް މަސައްކަތްތައް ކުރުމަށް. އެހެންވީމަ ކޮންމެ ގޮތެއް ވިޔަސް ގާނޫނާ ގަވާއިދާ ހިލާފަށް އުސޫލުން ބޭރުން ކަމެއް ކުރުމަކަށް ސަރުކާރުން އެއްވެސް ވަރަކަށް ފުރުސަތު ނުދޭނަން. އެކަހަލަ ކަމެއް ކުރާ ބައެއް ވެއްޖެއްޔާ އެބަޔަކަށް އަޅަން ޖެހޭ ފިޔަވަޅެއް އެބަޔަކަށް އެޅުމަށް ވަރަށް ބޮޑަށް ބާރު އަޅާނަން. އެހެންވީމަ އެއީ ޓޮލަރޭޓް ކުރާނެ ކަމެއް ނޫން. ނުރަނގަަޅު ކަމެއް ހިނގަންޏާ. އެހެނެއް ނޫން އެޕްލިކޭޝަން ނުހެދިގެން ލަސް ވެގެން ނޫނިއްޔާ އެހެން ކަމެއް ވެގެން ރައްޔިތުންނަށް ޓެކްސީ ސަރވިސް ވޯކް ނުކުރެވި މިކަހަލަ ކަމެއް ދިމާވުމަކީ އެއްގޮތަކަށް ވުމަކީ ވެގެންވާނެ ކަމެއް ނޫން ކަމަށް އަޅުގަނޑު ވާނީ ދަންނަވާފައި،. ދެން އަޅުގަނޑު ހިތުން ދެ ހަފްތާއެއްހާ ދުވަސް ފްރީ ކޮށް ދުއްވުމުގެ ފުރުސަތު ވެސް އެބޭފުޅުން ދެއްވި. ދެން މިހާރު ވެބް މެދުވެރިކޮށް ބުކް ކުރުމުގެ މަސައްކަތް އެބަ ކުރެވޭ.
ރައީސް މުއިއްޒު މިމޭރުމުން ވާހަކަ ދެއްކެވިއިރު، އެމްޓީސީސީން "މާލެ ޓެކްސީ އެޕް" ތަރައްގީ ކުރުމަށް 13 މިލިއަން ރުފިޔާއަށް ތަޖުރިބާއެއް ނެތް ކުންފުންޏަކާ ހަވާލުކޮށް ކޮރަޕްޝަންގެ ބޮޑެތި އަމަލުތަކެއް ހިންގާފައިވާ ކަމުގެ ތުހުމަތު ވަނީ ކުރެވިފަ އެވެ. އިތުބާރު ހުރި ފަރާތަކުން މައުލޫމާތު ދޭ ގޮތުގައި ޓެކްސީގެ ޚިދުމަތް ފެށި އިރު މަސައްކަތް ނުކުރާ އެޕަށް 34 މިލިއަން އޮތީ ދޫކޮށްފަ އެވެ.
އެޕްލިކޭޝަނަށް ވާނުވާ ނޭނގޭއިރު، 18 އޭޕްރީލް 2026 ގައި މާލޭ ޓެކްސީ ލައިންގެ ވެބްސައިޓް ތައާރަފުކޮށް، އަގު ނަގަން ވަނީ ފަށާފަ އެވެ.
