2024 ގައި ފަށަން ބުނި ހެލިކޮޕްޓަރުގެ ހިދުމަތް ދޭނެ ބަޔަކު ހޯދަން ތިންވަނަ ފަހަރަށް އިއުލާން ކޮށްފި
ހެލިކޮޕްޓަރުގެ ހިދުމަތް ދޭން ބޭނުންވާ ފަރާތްތަކުން އެކަމަށް އެދި ޕްރޮޕޯސަލް ހުށަހަޅަން ހުޅުވާލާފައިވާއިރު ޓްރާންސްޕޯޓް މިނިސްޓްރީ އިން ބުނީ މިއަހަރު ގެ ޖެނުއަރީ މަހުގެ 25 ގެ ކުރިން ފޯމު ހުށަހެޅުމަށް.
މިނިސްޓަރު އަމީނު އާއި ރައީސް މުޢިއްޒު | ރާއްޖެ އެމްވީ
ނިމުނު 2024 ވަނަ އަހަރުގެ މާޗު މަހު ހެލިކޮޕްޓަރުގެ ޚިދުމަށް ފަށާނެ ކަމަށް ބުނި ނަމަވެސް އެއް އަހަރާއި ދިހަ މަސް ވެގެންދިޔައިރު ވެސް އެކަން ނުވެ އުޅެނިކޮށް އެ ޚިދުމަތް ދޭނެ ބަޔަކު ހޯދަން ތިންވަނަ ފަހަރަށް އިއުލާން ކޮށްފި އެވެ.
މިދިޔަ ޑިސެމްބަރު މަހު ޓްރާންސްޕޯޓް މިނިސްޓްރީ އިން ކުރި އިއުލާނުގައި ބުނީ، ރާއްޖޭގައި ހެލިކޮޕްޓަރުގެ ހިދުމަތް ފެށުމަށްޓަކައި އެ ހިދުމަތް ދޭނެ ބަޔަކު ހޯދަން ބޭނުންވާ ކަމަށެވެ. މިއީ އެ މިނިސްޓްރީން ހެލިކޮޕްޓަރު ޚިދުމަތް ފެށުމަށްޓަކައި، އެ ޚިދުމަތް ދޭނެ ބަޔަކު ހޯދަން އިއުލާންކުރި ތިންވަނަ ފަހަރެވެ.
އަދި އެ ހިދުމަތް ދޭން ބޭނުންވާ ފަރާތްތަކުން އެކަމަށް އެދި ޕްރޮޕޯސަލް ހުށަހަޅަން ހުޅުވާލާފައިވާއިރު ޓްރާންސްޕޯޓް މިނިސްޓްރީ އިން ބުނީ މިއަހަރު ގެ ޖެނުއަރީ މަހުގެ 25 ގެ ކުރިން ފޯމު ހުށަހެޅުމަށެވެ.
ފާހަގަކޮށްލެވޭ ގޮތުގައި 2024 ވަނަ އަހަރުގެ އޮގަސްޓު މަހުގެ ފަސް ވަނަ ދުވަހު މިނިސްޓްރީން ވަނީ ރާއްޖޭގައި ފަތުރުވެރިން އުފުލުން ހިމެނޭ ގޮތަށް، ހެލިކޮޕްޓަރު ޚިދުމަތް ދޭން ފަށަން ފުރުސަތު ހުޅުވާލައިފަ އެވެ. އޭގެފަހުން، ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވީ، ރާއްޖޭގައި އެ ޚިދުމަތް ފަށަން އިނގިރޭސިވިލާތުގެ ސިވިލް އޭވިއޭޝަން އޮތޯރިޓީ (ސީއެއޭ)ގެ ލަފާގެ މަތިން ތަހުލީލު ހެދި ކަމަށާއި ޚިދުމަތުގައި ބޭނުން ކުރާނީ ސަލާމަތީ ގޮތުން އޮޕަރޭޓު ކުރަން އެންމެ ރަނގަޅު ހެލިކޮޕްޓަރު ކަމަށް ވިދާޅުވެފަ އެވެ.
ރާއްޖޭގައި ހެލިކޮޕްޓަރުގެ ހިދުމަތް ފަށަން ބުނި ތާރީހު ފަހަނައަޅާދިޔައިރު ވެސް އެ ޚިދުމަތް ފެށިފައެއް ނުވެ އެވެ.
