ޓެކްސީ ސެންޓަރެއް ނަމަ 50 ޑްރައިވަރުންނާއި، 50 އުޅަނދު އޮންނަން ޖެހޭ، އެހެން ނޫން ނަމަ ރަޖިސްޓްރީ ބާތިލް ކުރާނަން: ޓްރާންސްޕޯޓު މިނިސްޓްރީ
މި ޝަރުތު ފުރިހަމަ ނުވާނަމަ 60 ދުވަހުގެ މުއްދަތު ދިނުމަށްފަހު ރަޖިސްޓްރީ ބާތިލުކުރާނެ ކަމަށް ބުނެފައިވޭ. ޓެކްސީ ސެންޓަރު ހިންގުމުގެ ގަވާއިދު ހަރުކަށިކޮށް ބަދަލު ކޮށްފައިވާއިރު، މިސަރުކާރުން ދަނީ ޓެކްސީ ވިޔަފާރީގެ ތެރެއަށް ވަނުމަށް މަސައްކަތް ކުރަމުން.
''ބޯކަނޑާލެވިދާނެ ކަމަށާއި، ބޯގުދު ނުކުރާނެ'' ކަމަށް ބުނެ، ގިނަ އަދަދެއްގެ ޓެކްސީ ޑްރައިވަރުން ރައީސް ޑރ.މުހައްމަދު މުއިއްޒުގެ ސަރުކާރާ ދެކޮޅަށް ކުރި މުޒާހަރާއެއްގެ ތެރެއިން
ގްރޭޓަރ މާލެ ސަރަހައްދުގައި އޮޕަރޭޓް ކުރާ ޓެކްސީ ސެންޓަރެއް ނަމަ، 50 ޑްރައިވަރުންނާއި، 50 އުޅަނދު އޮންނަން ޖެހޭ ކަމަށާއި، އެހެންނޫން ނަމަ ރަޖިސްޓްރީ ބާތިލް ކުރާނެ ކަމަށް ޓްރާންސްޕޯޓު މިނިސްޓްރީން ބުނެފި އެވެ.
ބުދަ ދުވަހު ޓްރާންސްޕޯޓު މިނިސްޓްރީން ވަނީ ޓެކްސީ ގަވާއިދަށް 4 ވަނަ އިސްލާހު ގެނައުމުގެ ގަވާއިދު ގެޒެޓް ކޮށްފަ އެވެ. މި ގަވާއިދުގައި ޓެކްސީ ސެންޓަރު ހިންގުމަށް ހުންނަން ޖެހޭ ޝަރުތުތައް ހިމަނާފައިވެ އެވެ.
ގަވާއިދުގައި ބުނެފައި ވަނީ ގްރޭޓަރ މާލެ ސަރަހައްދުގައި އޮޕަރޭޓްކުރަން ރަޖިސްޓަރީކުރާ ޓެކްސީ ސެންޓަރެއް ނަމަ، އެ ސެންޓަރުގައި ރަޖިސްޓަރީކުރުމަށް ލިސްޓުކޮށްފައިވާ ޓެކްސީ ކުރުމަށް ބޭނުންކުރެވޭނެ 50 އުޅަނދު އޮންނަން ޖެހޭ ކަމަށާއި، ޓެކްސީ ސެންޓަރުގައި ރަޖިސްޓަރީ ކުރުމަށް ލިސްޓުކޮށްފައިވާ ޓެކްސީ ކުރުމަށް ބޭނުންކުރެވޭ އުޅަނދު ދުއްވުމުގެ ލައިސަންސް ލިބިފައިވާ މަދުވެގެން 50 ޑްރައިވަރުން ތިބެން ޖެހޭ ކަމަށެވެ.
ޓެކްސީ ސެންޓަރުގެ ޝަރުތުތަކުގެ ތެރެއިން ޝަތުރެއް އުނިވެއްޖެނަމަ، އެ ޝަރުތު ފުރިހަމަކުރުމަށް އެ ޓެކްސީ ސެންޓަރަކަށް 60 ދުވަހުގެ މުއްދަތެއް ދޭނެ ކަމަށް ގަވާއިދުގައި ބުނެފައިވެ އެވެ.
ކަނޑައެޅިފައިވާ މުއްދަތުގެ ތެރޭގައި ޓެކްސީ ސެންޓަރުން އެ ޝަރުތެއް ފުރިހަމަ ނުކުރެވިއްޖެ ހާލަތެއްގައި އެފަދަ ސެންޓަރަކަށް ދޫކޮށްފައިވާ ޓެކްސީ ސެންޓަރ ލައިސަންސް ބާތިލް ކުރެވޭނެ ކަމަށް ވެސް ގަވާއިދުގައި ބުނެފައިވެ އެވެ.
މީގެ އިތުރުން ޓެކްސީ ސެންޓަރަކަށް ދޫކޮށްފައިވާ ލައިސަންސް ބާޠިލުކުރެވޭ ހާލަތުގައި އެ ސެންޓަރެއްގައި ރަޖިސްޓަރީކޮށްފައިވާ ނުވަތަ ލިސްޓުކޮށްފައިވާ ޓެކްސީތަކަށް ދޫކޮށްފައިވާ ކާރު ޓެކްސީ ލައިސަންސް ބާތިލުވާނެ ކަމަށާއި، ލައިސަންސް ބާތިލުވާ އުޅަނދުތައް އެހެން ސެންޓަރެއްގައި ރަޖިސްޓަރިވުމަށް ހުށަހެޅުމުން މި ގަވާއިދުގައި ބަޔާންކޮށްފައިވާ ޝަރުތުތައް އެފަދަ އުޅަނދުތަކުގައި ފުރިހަމަވާ ނަމަ ރަސްމީ 10 ދުވަހުގެ ތެރޭގައި ކާރު ޓެކްސީ ލައިސަންސް ދޭނެ ކަމަށް ގަވާއިދުގައި ބުނެފައިވެ އެވެ.
މި ގަވާއިދުގެ ދަށުން ކާރު ޓެކްސީ ލައިސަންސް ލިބިފައިވާ އުޅަނދެއް ދުއްވޭނީ ކާރު ޓެކްސީ ޑްރައިވަރ ލައިސަންސް ލިބިފައިވާ ފަރާތްތަކަށް އެކަންޏެވެ. މިފަދަ ޑްރައިވަރުންނަށް އެއްފަހަރާ މަސައްކަތް ކުރެވޭނީ ގިނަވެގެން ދެ ޓެކްސީ ސެންޓަރުގައި ކަމަށް ބުނެފައިވެ އެވެ.
ކާރު ޓެކްސީ ޑްރައިވަރ ލައިސަންސް ދޫކުރެވޭނީ ޚިދުމަތުގެ އަގުގެ ގޮތުގައި 250 ރުފިޔާ ދެއްކުމުންނެވެ.
ޓެކްސީ ސެންޓަރު ހިންގުމުގެ ގަވާއިދު ހަރުކަށިކޮށް ބަދަލު ކޮށްފައިވާއިރު، މިސަރުކާރުން ދަނީ ޓެކްސީ ވިޔަފާރީގެ ތެރެއަށް ވަނުމަށް މަސައްކަތް ކުރަމުންނެވެ. މިފަހުން ގިނަ އަދަދެއްގެ ޑްރައިވަރުންނާ އެމްޓީސީސީން އިންޓަވިއު ކޮށްފައިވެ އެވެ.
މި މަސައްކަތް އޮތީ އެންމެފަހުގެ މަރުހަލާގައި ކަމަށް ސަރުކާރުން ބުނެ އެވެ.
މީގެ އިތުރުން މިދިޔަ ޑިސެންބަރު މަހުގެ ތެރޭގައި ޓްރާންސްޕޯޓު މިނިސްޓްރީ އަށް ހުށަހަޅާ ކަންކަން ހައްލު ނުވެ އެންމެ ފަހުން ޑްރައިވާރސް އެސޯސިއޭޝަނުން ރައީސް ޑރ. މުހައްމަދު މުއިއްޒުއާ ބައްދަލު ކުރައްވައި، މައްސަލަތަކަށް ހައްލު ހޯދައި ދިނުމަށް އެދިފައިވެ އެވެ.
ޑްރައިވަރސް އެސޯސިއޭޝަންގެ ރައީސް އިބްރާހީމް ނިޔާޒު ވިދާޅުވީ، ވަރަށް ގިނަ ދުވަސްވީ ކަންބޮޑުވުން ތަކެއް މަޝްވަރާ ނުކުރެވި، ހައްލުނުވެ ހުރި ކަންތައްތަކެއް ރައީސް މުއިއްޒު އާ ހިއްސާ ކުރެވުނު ކަމަށާއި، ރައީސް ވިދާޅުވި ގޮތަށް ކަންކަން އަވަސް ފުރުސަތެއްގެ ތެރޭގައި ހައްލުކޮށްދެއްވާނެ ކަމަށް އުއްމީދު ކުރާ ކަމަށެވެ. ނަމަވެސް މިއަދާ ހަމައަށް ޑްރައިވަރުންގެ ކަންބޮޑުވުންތަކަށް ކުރިއެރުން ނުލިބޭ ކަމަށް މައުލޫމާތު ލިބެ އެވެ.
