ފީފާ ވޯލްޑް ކަޕް ގްރޫޕް ސްޓޭޖުގެ ފަހު މެޗުގައި ޖަޕާނާ ދެކޮޅަށް ނުކުންނައިރު ސްޕެއިންގެ ކުޅުންތެރިންނަށް އެއްވެސް ހަރުކަށި އުސޫލެއް ނޯންނާނެ ކަމަށާއި، ކުޅުންތެރިންނަށް މަޖާ ކުރެވޭނެ ކަމަށް އެ ޓީމުގެ ކޯޗު ލުއިސް އެންރީކޭ ބުނެފިއެވެ.

ޖަޕާން މެޗުގެ ކުރިން އޮތް ޕްރެސް ކޮންފަރެންސްގައި ވާހަަކަ ދައްކަމުން އެންރީކޭ ބުނީ، ބައެއް ކޭމްޕްތަކުގައި ވަރަށް ހަރުކަށި އުސޫލުތަކާއި ގޮތްތައް ގެންގުޅޭ ކަމަށެވެ. އޭނާ ބުނީ އެގޮތަށް އަމަލު ކުރަނީ ސީދާ ވަކި ކޮން ޓީމުތަކެއްކަން ނޭންގޭ ކަަމަަށާއި، ނަމަވެސް ކުޅުންތެރިންނަށް ވަރަށް ގިނަ ހުސް ވަގުތު ލިބޭނެ ކަމަށެވެ. އޭނާ ބުނީ ކުޅުންތެރިން ފޫހިވެގެން އުޅޭ ކަހަލަ ގިނަ ވަގުތު ވެސް ދާނެ ކަމަށާއި، އެހެންކަމުން އެ ކުޅުންތެރިންނަށް މަޖާކޮށްލަން ފުރުސަތު އޮންނަން ޖެހޭނެ ކަމަށެވެ. އޭނާ ބުނީ މުބާރާތް ފެށުމުގެ ކުރިން ވެސް ސްޕެއިންގެ ކުޅުންތެރިން ގާތު އެ ވާހަކަ ބުނެފައިވާނެ ކަމަށެވެ. އޭނާ ބުނީ މުބާރާތަށް އައިސް އުޅޭ އިރު ވެސް މަޖާކޮށް، އެކުގައި ހީ ސަމާސާ ކުރަން ވެސް ޖެހޭނެ ކަމަށެވެ.

ޖަޕާން ޓީމާ ގުޅޭ ގޮތުން ވާހަކަ ދައްކަމުން އެންރީކޭ ބުނީ އެ ޓީމުގައި ތިބީ ވަރަށް މަސައްކަތް ކުރާ ކުޅުންތެރިން ކަމަށެވެ. އޭނާ ބުނީ އޮލިމްޕިކް ފުޓުބޯޅަ މުބާރާތުގައި ވެސް ޖަޕާނާ ދެކޮޅަށް ކުޅުނު ކަމަށާއި، އެ ސްކޮޑުގައި ހިމެނޭ ގިނަ ކުޅުންތެރިން މިހާރުގެ ޓީމުގައި ވެސް ތިބި ކަމަށެވެ. ވަކިވަކި ކުޅުންތެރިންނަށް ބެލި ނަމަވެސް ޖަޕާނުގައި ފެންވަރު ރަނގަޅު ކުޅުންތެރިން ތިބިކަން ފާހަގަ ކުރަމުން އެންރީކޭ ބުނީ، އެ ޓީމުގެ ކުޅުންތެރިން ޔޫރަޕުގައި ވެސް މޮޅަށް ކުޅެމުން އަންނަ ކަމަށެވެ. އޭނާ ބުނީ އެއްވެސް ބަޔަކަށް ދެރަ ބަހެއް ބުނަން ބޭނުންނުވާ ކަމަށެވެ.

ގްރޫޕް ސްޓޭޖުގެ ފަހު މެޗުގައި ޖަޕާނާ ދެކޮޅަށް ނިކުންނައިރު މެޗު އެއްވަރުކޮށްލައިގެން ވެސް ސްޕެއިން އަށް ދެ ވަނަ ބުރަށް ދެވޭނެއެވެ. ނަމަވެސް މެޗުން މޮޅުވެއްޖެ ނަމަ ސްޕެއިން އަށް މި ގްރޫޕްގެ އެއް ވަނަ ލިބޭނެވެ. ސްޕެއިން ފުރަތަމަ ކުޅުނު މެޗުގައި 7-0 އިން ކޮސްޓަރިކާ ބަލި ކުރިއިރު، ދެ ވަނަ މެޗުގައި ޖަރުމަނާ އެއްވަރުވީ 1-1 އިންނެވެ.

ސްޕެއިން އަދި ޖަޕާން ކުޅޭ މެޗު ފަށާނީ ބުރާސްފަތު ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.