ކޮލަމްބިއާގައި ފަތުރުވެރިން ގޮވައިގެން ދަތުުކުރަމުން ދިޔަ ބޯޓެއް ފެތިއްޖެ

ކޮލަމްބިއާގައި ފަތުރުވެރިން ގޮވައިގެން ދަތުުކުރަމުން ދިޔަ ބޯޓެއް އަޑިއަށް ގޮސްފިއެެވެ.

ބީބީސީއިން ރިޕޯޓްކޮށްފައިވާ ގޮތުގައި 150 އަށްވުރެ ގިނަ ފަތުރުވެރިން ގޮވައިގެން ދަތުރުކުރަމުން ދަނިކޮށް މި ބޯޓު ފެތިފައިވަނީ، ކޮލަމްބިއާގެ ގުއަތާޕޭގައި އޮންނަ ޕީނޯލް ކޯރަށެވެ. ބޯޓުގައި ތިބީ ކޮން ޤައުމެއްގެ ފަތުރުވެރިންކަމާއި ބޯޓު އަޑިއަށް ދިއައީ ކޮން ސަބަބަކާއި ހުރެކަމެއް އަދި ސާފެއް ނުވެއެވެ.

ފެތިފައިވަނީ 4 ފަންގިފިލާއަށް ބަނދެފައިވާ "އެލް އަލްމިރާންތޭ" ކިޔާ ބޯޓެކެވެ. ޔޫޓިއުބުގައި އާންމުވެފައިވާ ވީޑިއޯއަކުން ފެންނަ ގޮތުގައި ބޯޓު އަޑިއަށްދާން ފެށުމުން، އެ ސަރަޙައްދުގައި އެވަގުތު ދަތުރުކުރަމުންދިޔަ އެހެން ފަތުރުވެރި ބޯޓުތައް ވަނީ މީހުން ސަލާމަތް ކުރުމުގެ މަސައްކަތް ފަށާފައެވެ.

މި ހާދިސާގައި އެއްވެސް މީހަކަށް ގެއްލުމެއް ލިބިފައިވާކަން ކަމާއިބެހޭ ފަރާތްތަކުން އަދި ހާމަކޮށްފައެއް ނުވެއެވެ.

މި ހާދިސާގައި މިހާރު ސަލާމަތް ކުރެވިފައިވާ މީހަކު މީޑިއާ އާއި ހިއްސާކޮށްފައިވާ ގޮތުގައި ބޯޓު ދަތުރުކުރަމުން ދިޔައީ ބޯޓަށް ނުތަކާވަރަށް މީހުން އަރުވައިގެންނެވެ. އަދި ބޯޓުގައި ދަތުރުކުރި މީހުންނަށް ލައިފްޖެކެޓުވެސް ދީފައި ނުވާކަމަށް އޭނާ ބުނެފައިވެއެވެ.

ހާދިސާ އާއި ގުޅިގެން ރެސްކިއު އޮޕަރޭޝަނެއް ފަށާފައިވާއިރު، އެއާފޯސް ހެލިކޮޕްޓަރެއް ދަނީ ވައިގެމަގުން އެ ސަރަޙައްދު މޮނިޓަރ ކުރަމުންނެވެ.