ކޮލަމްބިއާގައި ބިންގަނޑު ކަނޑައިގެންދިޔަ ހާދިސާގެ ތަހުގީގެއް ކުރަނީ

ކޮލަމްބިއާގެ ދެކުނުގެ ސިޓީއެއް ކަމަށްވާ މޮކޯއާގައި ހިނގި ބިންގަޑު ކަނޑައިގެން ދިއުމުގެ ހާދިސާ ތަހުގީގުކުރުމަށް ކަމާބެހޭ އިދާރާތަކަށް އެގައުމުގެ ސަރުކާރުން އަންގައިފިއެވެ.

ކޮލަމްބިއާގެ މީޑިއާއިން ބުދަ ދުވަހު ބުނި ގޮތުގައި އިތުރު ތަހުގީގެއް ހިންގަނީ ސަރަހައްދުގެ ގަވަރުނަރާއި، މޭޔަރާއި އެބޭފުޅުންގެ ކުރިން އެ މަގާމުތައް ފުރުއްވާފައިވާ ފަރާތްތަކަަށް އަމާޒުކޮށްގެންނެވެ.

މީހުން ސަލާމަތްކުރުމުގެ މަސައްކަތް ކުރަމުންދާ ފަރާތްތަކުން މިހާރު ވެސް ދަނީ ކުނިބުނީގެ ދަށުވެފައިވާ މީހުން ހޯދުމުގެ މަސައްކަތް ކުރަމުންނެވެ.

އެ ގައުމުގައި ބިންގަޑު ކަނޑައިގެން ދިއައީ އެއްރޭ އެއްކޮށް ބޯކޮށް ވާރޭވެހި މޮކޯއާ ކޯރާއި ކޯރާ ގުޅިފައިވާ އިތުރު ތިން ކޯރެއް ބަންޑުން ވުމުންނެވެ.

ފެންބޮޑުވުމުގެ ސަބަބުން އަވަށްތެރެއަށް ކިސަޑާއި އޮއްގާ ފައިބާ މުޅި އަވަށްވަނީ ފޮރުވާލާފައެވެ.

މީހުން ސަލާމަތްކުރުމުގެ މަސައްކަތް އެކަށީގެންވާ އަވަސްމިނެއްގައި ނުގެންދާ ކަމަށް ބުނެ ސަރުކާރަށް އަންނަނީ ފާޑުކިއުން އަމާޒުވަމުންނެވެ.

ރައީސް ހުއާން މެނުއެލް ސަންޓޯސް ވަނީ އެވާހަކަތައް ދޮގުކުރައްވާފައެވެ. އޭނާ ވިދާޅުވީ 2010 ވަނަ އަހަރު ކުރިމަތިވި ކާރިސާއަށް ފަހު ސިސްޓަމެއް ގާއިމްކޮށްފައިވާ ކަމަށާއި ހާދިސާ ހިނގިތާ އިރުކޮޅެއްގެ ތެރޭގައި މީހުން ސަލާމަތްކުރުމުގެ މަސައްކަތްކުރާ އެޖެންސީތަކުން މަސައްކަތް ފަށާފައިވާ ކަމަށެވެ.

މި ތަހުގީގުގައި ބަލާނީ އިމާރާތްކުރުމުގެ ގަވާއިދުތައް ތަންފީޒުކޮށްފައިވޭތޯ އާއި ގުދުރަތީ ކާރިސާއެއްގެ ދަނޑިވަޅުގައި އަމަލުކުރާނެ ޕްލޭން އޮފިޝލުން ތައްޔާރު ކޮށްފައިވޭތޯއެވެ.

ހޮނިހިރު ދުވަހު ކޮލަމްބިއާގައި ހިނގި ބިންގަޑު ކަނޑައިގެންދިއުމުގެ ކާރިސާގައި މަދުވެގެން 290 މީހުން މަރުވެ 300 މީހުން އަދިވެސް ވަނީ ނުފެނިއެވެ.

މީގެ އިތުރުން 2،700 އެއްހާ މީހުން ވަނީ ވަގުތީ ހިޔާތަކުގައެވެ.

ބައެއް ސަރަހައްދުތަކަށް އަދިވެސް ކަރަންޓާ ބޯފެެނެއް ނުލިބެއެވެ.