ފީފާ ވޯލްޑް ކަޕް ގްރޫޕް ސްޓޭޖުގެ ދެ ވަނަ މެޗުގައި އާޖެންޓީނާއާ ދެކޮޅަށް ނުކުންނައިރު، މެކްސިކޯއަށް އޮތް ހަމައެކަނި ގޮތަކީ މޮޅުވުންކަމަށް އެ ޓީމުގެ ކޯޗު ޖެރާޑޯ މާޓިނޯ ބުނެފިއެވެ.

އޭނާ މިހެން ބުނީ އާޖެންޓީނާ މެޗުގެ ކުރިން އޮތް ޕްރެސް ކޮންފަރެންސްގައި ވާހަަކަ ދައްކަމުންނެވެ. އުމުރުން މިހާރު 60 އަހަރުވެފައިވާ މާޓިނޯއަކީ އާޖެންޓީނާއަށް އުފަން، އެ ގައުމުގެ ރައްޔިތެކެވެ. ނޫސްވެރިޔަކު ކުރި ސުވާލަކާ ގުޅިގެން މާޓިނޯ ވަނީ، އެ ނޫސްވެރިޔާއަށްވެސް ސުވާލެއް އަމާޒުކޮށްފައެވެ. މާޓިނޯ އެހީ އޭނާ ހުރި މަގާމުގައި އެ ނޫސްވެރިޔާ ހުރިނަމަ ކަންތައްކުރާނީ ކިހިނެއްތޯއެވެ. އެއަށްފަހު މާޓިނޯ ބުނީ މެކްސިކޯއަށް އޮތް ހަމައެކަނި ގޮތަކީ މެޗުން މޮޅުވުން ކަމަށެވެ. މެޗު ކާމިޔާބުކުރުމަށް މެކްސިކޯއަށް ކުރެވެހެންހުރި ހުރިހާ ކަމެއް ކުރާނެ ކަމަށާއި، އެ ސުވާލަށް ދޭނެ އިތުރު ޖަވާބެއް ނެތްކަމަށެވެ.

މީގެ އިތުރުން އޭނާ ވަނީ އާޖެންޓީނާގެ ކެޕްޓަން ލިއޮނެލް މެސީ އަށް ވަރަށް ބޮޑަށް ތައުރީފުކޮށް، މެސީގެ މޮޅުވާހަކަ ދައްކާފައެވެ. މާޓިނޯ ބުނީ، މެސީއާ ކުރިމަތިލާފައިވާ މީހަކުވެސް ދޭނީ އޭނާ ދޭ ޖަވާބު ކަމަށެވެ. އެއީ މެސީ ހުއްޓުވުމާއި ނުހުއްޓުވުން ބިނާވެގެންދަނީ މެސީގެ ކުޅުމުގެ މައްޗަށް ކަމަށްވާތީއެވެ. އޭނާ ބުނީ މެސީއަށް ރަނގަޅަަށް ކުޅެވޭ ދުވަހަކު އޭނާ ހުއްޓުވުމަކީ "އިންސާނަކަށް" ކުޅަދާނެ ކަމެއް ނޫން ކަމަށެވެ. ނަމަވެސް މެސީ ދަށްކޮށް ދާ ދުވަހެއްނަމަ، ވަރަށް ފަސޭހައިން އޭނާ ހުއްޓުވޭނެ ކަމަށެވެ. އޭނާ ބުނީ، އާޖެންޓީނާއާ އެއް ގްރޫޕެއްގައި ލައްވާލުމުން އެ މެޗުގައި ވާނެ ގޮތެއް ޚިޔާލަށްވެސް ގެންނަން ނޭނގުނު ކަމަށެވެ.

މެކްސިކޯއިން އާޖެންޓީނާއާ ދެކޮޅަށް ކުޅޭނީ އާދީއްތަވިލޭރޭ ރާއްޖެ ގަޑިން 12 ޖަހާއިރުއެވެ.