އީކޯ ޓުއަރިޒަމްއާއި ސަރފް ޓޫރިޒަމްއަށް ރާއްޖޭގައި މުސްތަގުބަލު އެބަ އޮތް - ޝައުނާ
24 ނޮވެމްބަރު 2022 | ބުރާސްފަތި 07:01ރާއްޖެ އަކީ މޫދުގެ ސަރަހައްދު ބޮޑު ތަނަކަށް ވާއިރު ރާއްޖޭގެ ތިމާވެށީގެ ދުޅަހެޔޮކަން ވަނީ ވަރަށް ބޮޑަށް މޫދާއި ގުޅިފައި ކަމަށް މިނިސްޓަރު ވިދާޅުވި
އީޔޫ- މޯލްޑިވްސް ބިޒްނަސް ރައުންޑް ޓޭބަލްގެ ތެރެއިން
އީކޯ ޓޫރިޒަމް އާއި ސަރފް ޓޫރިޒަމް އަށް ރާއްޖޭގައި މުސްތަގުބަލު އެބަ އޮތްކަމަށް ޤަބޫލުކުރައްވާ ކަމަށް މިނިސްޓަރ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވިދާޅުވެއްޖެއެވެ.
އީޔޫ- މޯލްޑިވްސް ބިޒްނަސް ރައުންޑް ޓޭބަލްގައި ވާހަކަދައްކަވަމުން މިނިސްޓަރު ވިދާޅުވީ ރާއްޖެއަށް ގިނަ އަދަދެއްގެ ފަތުރުވެރިން ޒިޔާރަތްކުރަމުންދާ އެއް ސަބަބަކީ ރާއްޖޭގެ ގުދުރަތީ ރީތިކަން ކަމަށެވެ. އެގޮތުން ރާއްޖޭގެ ފަޅުތަކާއި މޫދުގެ އިތުރުން، ރާއްޖޭގެ ބައޮސްފިއަރގެ ތަފާތުކަމަކީ ރާއްޖެ ޚާއްސަކޮށްދޭ އެއް ސަބަބުކަމަށް މިނިސްޓަރު ފާހަގަކުރެއްވިއެވެ. އެހެންކަމުން ރާއްޖޭގެ ގުދުރަތީ ވެށި ހިމާޔަތްކޮށް އާ ދާއިރާތަކުން ރާއްޖެ އަށް ވިޔަފާރީގެ ފުރުސަތުތައް ހޯދިދާނެ ކަމަށް މިނިސްޓަރު ފާހަގަކުރެއްވިއެވެ.
ހަމައެހެންމެ ރާއްޖެ އަކީ މޫދުގެ ސަރަހައްދު ބޮޑު ތަނަކަށް ވާއިރު ރާއްޖޭގެ ތިމާވެށީގެ ދުޅަހެޔޮކަން ވަނީ ވަރަށް ބޮޑަށް މޫދާއި ގުޅިފައި ކަމަށް މިނިސްޓަރު ވިދާޅުވިއެވެ. އަދި މޫދާއި ފަރުތަކަކީ ރާއްޖޭގެ ރައުސުލްމާލުތައް ކަމަށް ސިފަކުރައްވާ މިނިސްޓަރު ވިދާޅުވީ އެ ވަސީލަތައް ރާއްކާތެރިކޮށް އެއިން ދެމެހެއްޓެނެވި ގޮތެއްގައި މަންފާ ލިބޭނެ މަގު ފަހިކުރުމަކީ މުހިންމު ކަމެއް ކަމަށް ޝައުނާ ވަނީ ވިދާޅުވެފައެވެ. މީގެއިތުރުން މޫސުމަށް އަންނަ ބަދަލުތަކުން ކުރާ ނޭދެވޭ އަސަރު ކުޑަ ކުރުމަށް އުމްރާނީ ގޮތުން ގެންނަން ޖެހޭ ބަދަލިތަކާއި، އިއާދަކުރުވަނިވި ހަކަތައަށް ކުރާ ހޭދަ އިތުރުކޮށް ރަނގަޅަށް ކުނި މެނޭޖް ކުރުން ފަދަ ކަންކަން ރަނގަޅަށް ކުރަން ޖެހޭ ކަމަށް ޝައުނާ ވިދާޅުވިއެވެ.
މީގެ އިތުރުން ރާއްޖެ އިން ބައެއް އާ ކަންކަމުގައި އިންވެސްޓް ކުރަން ޖެހޭ ކަމަށާއި އޭގެ ތެރޭގައި ހައިޑްރޮޖެން އޯޝެން ޓެކްނޮލޮޖީ އާއި ލޯ އެމިޝަން ޓްރާންސްޕޯޓް ހިމެނޭ ކަމަށް މިނިސްޓަރު ވިދާޅުވިއެވެ. އަދި އެފަދަ ކަންކަމަށް އެކްސްޕެރިމެންޓް ކުރާ ތަނަކަށް ރާއްޖެ ހެދިދާނެ ކަމަށް ގަބޫލުކުރައްވާ ކަމަށް މިނިސްޓަރު ވިދާޅުވިއެވެ.
