ކޮންމެ ގޮތަކަށް ކަންތައް ވެގެންދިޔަ ނަމަވެސް ކޮންމެ ބަޔަކު ވެސް ބޭނުންވަނީ ވޯލްޑް ކަޕް ކާމިޔާބުކުރުން ކަމަށް ގާނާގެ ކޯޗު އޮޓޫ އަޑޫ ބުނެފިއެވެ.

އަޑޫ މިހެން ބުނީ މިއަހަރުގެ ފީފާ ވޯލްޑް ކަޕް މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި ޕޯޗުގަލާ ދެކޮޅަށް ނުކުތުމުގެ ކުރިން ވާހަކަ ދައްކަމުންނެވެ. ޕްރެސްގައި ނޫސްވެރިޔަކު އޭނާއާ ސުވާލު ކުރީ މެންވެސްޓަރ ޔުނައިޓެޑުން ކްރިސްޓިއާނޯ ރޮނާލްޑޯ ދޫކޮށްލަން ނިންމުނު އެކަމުގެ އަސަރު އެއްވެސް ވަރަކަށް މެޗުން ފެނިދާނެތޯއެވެ. އެ ސުވާލުގެ ޖަވާބުގައި އަޑޫ ބުނީ އޭނާ އަށް އެކަމާ ބުނާނެ އެއްޗެއް ނޭންގޭ ކަމަށާއި، ތެދުތެދަށް ބުނާނަމަ އެއީ އޭނާއާ ބެހޭވެސް ކަމެއް ނޫން ކަމަށެވެ. އޭނާ ބުނީ އެކަމަކީ އެމީހުންގެ މައްސަލައެއް ނޫން ކަމަށާއި، އޭނާ އަށް ހީވާ ގޮތުން އެކަމަކީ މައްސަލައެއް ވެސް ނޫން ކަމަށެވެ.

އޭނާ ބުނީ ކޮންމެ ހާލަތަކު ކޮންމެ ގޮތަަކަށް ކަންތައްވީ ނަމަވެސް ކޮންމެ ބަޔަކު ވެސް ބޭނުންވަނީ ވޯލްޑް ކަޕް ކާމިޔާބު ކުރަން ކަމަށެވެ. އޭނާ ބުނީ ވޯލްޑް ކަޕަކީ އެތައް ޤައުމަކުން އެ ތައްޓަކަށް ވާދަކުރާ ބޮޑު، ވަރުގަދަ މުބާރާތެއް ކަމަށެވެ. އެހެންކަމުން އެކަމުގެ އަސަރު މެޗުގައި ފެންނާނެ ކަމަށް ޤަބޫލު ނުކުރާ ކަމަށެވެ.

މި ޕްރެސްގައި ވާހަކަ ދައްކަމުން ގާނާގެ ކެޕްޓަން އެންޑްރީ އާޔޭ ބުނީ ޕޯޗުގަލް އަކީ މަތީ ފަންތީގެ ޓީމެއް ކަމަށާއި، އެމީހުން އެކަން ސާބިތުކޮށްދީފައިވާ ކަމަށެވެ. އޭނާ ބުނީ ޕޯޗުގަލް އޮންނާނީ ވޯލްޑް ކަޕަށް ވަރަށް ބޮޑަށް ތައްޔާރުވެގެން ކަމަށާއި، އެމީހުންނަކީ ނުރައްކާތެރު ބަޔަކަށް ވާނެ ކަމަށެވެ. އަދި މެޗުގައި ފޭވަރިޓުންގެ ވާހަކަ ދައްކަން ވެއްޖެ ނަމަ، ގާނާ ޓީމަށް މެޗުގެ ސީރިއަސްކަން ގެއްލިދާނެ ކަމަށެވެ. އޭނާ ބުނީ ކަރުދާހުގައި ޕޯޗުގަލް އަކީ ފޭވަރިޓުން ކަމަށާއި، ނަމަވެސް ދަނޑުމަތީގައި އެއީ ތަފާތުކަމެއް ކަން ސާބިތުކޮށްދެވޭނެ ކަމަށެވެ.

ޕޯޗުގަލް އާއި ގާނާ ބައްދަލު ކުރާ މެޗު އޮންނާނީ ބުރާސްފަތި ދުވަހުގެ ރޭ ރާއްޖެ ގަޑިން 21:00 ގައެވެ.