ރާއްޖޭ ފުޓުބޯޅަ ކުރިނާރާ ކަންތައްތައް ފެނިއްޖެ ކަމަށް ނިއުރޭޑިއަންޓް ސްޕޯޓްސް ކްލަބްގެ ކޯޗު ޓަވަރޭޒް ބުނެފި އެވެ.

މެޗަށްފަހު ނޫސްވެރިންނަށް މައުލޫމާތު ދެމުން ޓަވަރޭޒް ބުނީ ގްރީން އަދި ނިއު ބައްދަލުކުރި މެޗުގައި ރާއްޖޭގެ ފުޓުބޯޅަ ކުރިނާރާނެފަދަ ކަންތައްތައް ފެނިފައިވާ ކަމަށާއި، އެކަހަލަ ކަންތައްތައް ތަކުރާރުނުވާ ގޮތަށް ކަންތައްތައްކުރަން ޖެހޭ ކަމަށެވެ.

ޓަވަރޭޒް ބުނީ ދަނޑުމަތީގައި ކުޅުންތެރިން ތިބެންޖެހޭނީ ސަލާމަތާއެކުކަން ކަށަވަރުކުރަންޖެހޭ ކަމަށާއި، ދަނޑަށް އެންމެ އަންނަނީ ފުޓުބޯޅަ ކުޅެން ކަމަށެވެ. އެގޮތުން ކުޅިވަރުގެ ރޫހާ ހިލާފުކަންތައްތައް ފެނިގެންނުވާނެ ކަމަށްވެސް އޭނާ ވަނީ ބުނެފައެވެ.

މެޗާ ބެހޭގޮތުން ޓަވަރޭޒް ބުނީ ފުރަތަމަ ހާފްގައި ނިއުއަށް އަދި ގްރީން އަށްވެސް ލަނޑު ޖަހަން ފުރުސަތު ލިބުނު ކަމަށާއި، ނިއު އަށް ހަތަރު ލަނޑު ޖަހަން ފުރުސަތު ލިބިފައިވާ ކަމަށެވެ.

އެހެންނަމަވެސް ދެވަނަ ހާފްގައި ލަނޑު ޖަހަން ލިބުނު ފުރުސަތުތައް ގިނަ ކަމަށްވެސް އޭނާ ވަނީ ބުނެފައެވެ. އެގޮތުން އޭނާ ބުނީ ގްރީން އަކީވެސް ވަރުގަދަ ޓީމެއް ކަމަށާއި، އެޓީމު މި ކުޅުން އެހެން ކްލަބްތަކާ ދެކޮޅަށް ދައްކައިފިނަމަ މޮޅުވާނެކަން އޭނާއަށް އެގޭކަމަށެވެ.

ލިބުނު ފުރުސަތުތަކުގެ ބޭނުން ނުހިފުނު ނަމަވެސް ކުޅުންތެރިން ދެއްކި ކުޅުމާމެދު ހިތްހަމަޖެހޭކަމަށް ޓަވަރޭޒް ވަނީ ބުނެފައެވެ. އޭނާ ބުނީ މެޗުން ބޭނުންވީ ތިން ޕޮއިންޓް ކަމަށާއި، ތިން ޕޮއިންޓް ލިބުމުން އެކަމާ ހިތްހަމަޖެހޭ ކަމަށެވެ.

ނިއުރޭޑިއަންޓް ވަނީ އެޓީމު ކުޅުނު ހަ މެޗުގެ ތެރެއިން ފަސް މެޗުކާމިޔާބުކޮށްފައެވެ. އެހެންނަމަވެސް އެއް މެޗުން އެޓީމު ވަނީ ބަލިވެފައެވެ.