އަބަހާނީ މެޗު ކޮންމެހެން ހަދާފަވެސް ކާމިޔާބުކުރުން ވަރަށް މުހިންމު: ސެކުލޮވްސްކީ

އޭއެފްސީ ކަޕްގެ ގްރޫޕް ސްޓޭޖުގައި ޑާކާ އަބަހާނީއާ ދެކޮޅަށް މާޒިޔާ ކުޅޭ މެޗުން ކޮންމެހެން ހަދާފަވެސް މާޒިޔާ މޮޅުވުން މުހިންމުކަމަށް އެޓީމުގެ ކޯޗު ސެކުލޮވްސްކީ ބުނެފި އެވެ.

މެޗުގެ ކުރިން ގަލޮޅު ދަނޑުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސެކުލޮވްސްކީ ބުނީ ބުދަ ދުވަހު އަބާނީއާ ދެކޮޅަށް މާޒިޔާ ނިކުންނަ މެޗަކީ އެޓީމު ވޭތުވެ ދިޔަ 30 ދުވަހު ތެރޭގައި ކުޅޭ 8 ވަނަ މެޗު ކަމަށާއި، އެހެންނަމަވެސް އަބާނީ މެޗު ހުރިހާ ގޮތަކުން ބަލާއިރުވެސް ވަރަށް މުހިންމު ކަމަށެވެ. އެގޮތުން ސެކުލޮވްސްކީ ބުނީ ހުރިހާ ކުޅުންތެރިންވެސް ތިބީ މެޗަށް ވަރަށް ރަނގަޅަށް ތައްޔާރުވެގެން ކަމަށާއި، އެހެން އެއްވެސް މެޗެއްގައި ނުދައްކާ މޮޅު ކުޅުން އަބާނީ މެޗުގައި ދައްކާ މެޗު ކާމިޔާބުކުރަން އަމާޒު ހިފަންޖެހޭ ކަމަށްވެސް އޭނާ ވަނީ ބުނެފައެވެ.

މީގެއިތުރުން ސެކުލޮވްސްކީ ބުނީ ދެވަނަ ބުރަށް ދިޔުމަށް މާޒިޔާ އިން ކުރަން ޖެހޭ މަސައްކަތް ހަގީގަތުގައި ފެށޭނީ އަބާނީއާ ދެކޮޅާށް ބުދަ ދުވަހު ކުޅޭ މެޗުން ކަމަށާއި، ކުޅުންތެރިންނަށް ފުރިހަމައަށް އިތުބާރު ކުރާ ކަމަށެވެ. އެގޮތުން އޭނާ ބުނީ ކައިރިކައިރީގައި މެޗުތައް ކުޅެން ޖެހުމުންވެސް ކުޅުންތެރިން ވަރަށް ހިތްވަރާއެކު މަސައްކަތްކޮށް މޮޅުވުމަށް އަބަދުވެސް މަސައްކަތްކުރާ ކަމަށާއި، އެގޮތުން ޓީމުގެ ހުރިހާ ކުޅުންތެރިންދެކެވެސް ފަހުރުވެރިވާ ކަމަށް އޭނާ ވަނީ ބުނެފައެވެ.

ކައިރިކައިރީގައި މެޗުތައް ކުޅެން ޖެހުމުން ފައިދާތަކެއްވެސް ލިބޭކަން ފާހަގަކުރަމުން ސެކުލޮވްސްކީ ބުނީ އޭނާ ޓީމާ ހަވާލުވިއިރާ ބަލާއިރު، ޓީމުގެ ގިނަ ކުޅުންތެރިން އަންނަނީ ކުރިއެރުން ހޯދަމުން ކަމަށާއި، ޓީމްވޯކްވެސް ވަރަށް ރަނގަޅު ކަމަށެވެ.

އޭއެފްސީކަޕްގައި މާޒިޔާ ހިމެނޭ ގްރޫޕަށް ބަލާއިރު، އެޓީމު އޮތީ ނުވަ ޕޮއިންޓާއެކު ގްރޫޕްގެ ދެވަނައިގަ އެވެ. އެޓީމު މުބާރާތުގައި ކުޅުނު ހަތަރު މެޗުގެ ތެރެއިން ތިން މެޗުން މޮޅުވެފައިވާއިރު، އެއް މެޗުން ވަނީ ބަލިވެފައެވެ.