ހަމައެކަނި މޮޑްރިޗަށް ފޯކަސްކޮށްފި ނަމަ އެއީ ބޮޑު ގޯހެއް: ވަލީދު

ފީފާ ވޯލްޑް ކަޕްގައި ކްރޮއޭޝިއާއާ ދެކޮޅަށް ނިކުންނައިރު ހަމައެކަނި ލޫކާ މޮޑްރިޗަށް ފޯކަސް ކޮށްފި ނަމަ، އެއީ ކުޅުންތެރިންނަށް ހެދޭނެ ބޮޑު ގޯހެއް ކަމަށް މޮރޮކޯގެ ކޯޗު ވަލީދު ބުނެފިއެވެ.

ކްރޮއޭޝިއާ މެޗުގެ ކުރިން އޮތް ޕްރެސް ކޮންފަރެންސްގައި ވާހާކަ ދައްކަމުން ވަލީދު ބުނީ، ބޮޑު މުބާރާތުގައި އެ މެޗު ވެގެންދާނީ މޮރޮކޯ އަށް އެންމެ އުނދަގޫ މެޗު ކަމަށެވެ. އޭނާ ބުނީ މޮރޮކޯ އިން ކުޅެން ޖެހެނީ އެންމެ ފަހުން ބޭއްވި ވޯލްޑް ކަޕްގެ ދެ ވަނަ ޓީމާ ދެކޮޅަށް ކަމަށާއި، އެ ޓީމުގައިި ދުނިޔޭގެ ފެންވަރުގެ މޮޅެތި ކުޅުންތެރިން ތިބި ކަމަށެވެ. ވަލީދު ބުނީ މޮރޮކޯ އިން ވެސް މެޗަށް ތައްޔާރުވީ ފުރިހަމަ އަށް ކަމަށާއި، މެޗަށް ހުރިހާ ކުޅުންތެރިން ވެސް ފިޓު ކަމަށެވެ. އޭނާ ބުނީ މުޅި ޓީމު އޮތީ މެޗަށް ދައްކަން ޖެހޭ އެންމެ ފުރިހަމަ ކުޅުން ދެެއްކުމަށް ތައްޔާރަށް ކަމަށެވެ.

އިތުރަށް ވާހަކަ ދައްކަމުން ވަލީދު ބުނީ އެ މެޗުގެ ފޭވަރިޓުންނަކީ ކޮރޮއޭޝިއާ ކަމަށް އޭނާ ވެސް ޤަބޫލުކުރާ ކަމަށެވެ. އޭނާ ބުނީ ވޯލްޑް ކަޕްގެ ފައިނަލް ކުޅެ، އެމުބާރާތުގެ މޮޅު ކުޅުންތެރިޔާގެ މަގާމު ހޯދި ކުޅުންތެރިޔާގެ އިތުރުން ދުނިޔޭގެ ފެންވަރުގައި ފާހަގަކޮށްލެވޭ އެހެން ކުޅުންތެރިން އިދިކޮޅު ޓީމުގައި ތިބި ކަމަށެވެ. ވަލީދު ބުނީ މޮރޮކޯގައި އޭނާއާއެކު ވެސް މޮޅެތި ކުޅުންތެރިން ތިބި ކަމަށެވެ. އޭގެ ތެރޭގައި އަޝްރަފް ހަކީމީ އާއި ހަކީމް ޒިޔެޗުގެ ނަން އޭނާ ވަނީ ފާހަގަކޮށްފައެވެ. ނިންމާލަމުން އޭނާ ބުނީ މޮރޮކޯގެ ކުޅުންތެރިން ހަމައެކަނި މޮޑްރިޗަށް ފޯކަސްކޮށްފި ނަމަ، އެއީ ގޯހެއް ކަމަށެވެ.

މޮރޮކޯ އިން ކްރޮއޭޝިއާއާ ދެކޮޅަށް ނިކުންނާނީ ބުދަ ދުވަހުގެ 15:00 ގައެވެ.