ބުދަ ދުވަހަކީ ސައޫދީ އަރަބިއްޔާއަށް ރަސްމީ ބަންދު ދުވަހެއްގެ ގޮތުގައި އެ ގައުމުގެ ސަރުކާރުން ހަމަޖައްސައިފިއެވެ.
ސައޫދީ ސަރުކާރުން މި ގޮތަށް ހަމަޖެއްސީ ފީފާ ވޯލްޑް ކަޕްގައި ވަރުގަދަ އާޖެންޓީނާ ބަލިކޮށް ސައޫދީ ޓީމުން ތާރީޚީ ކާމިޔާބެއް ހޯދުމާގުޅިގެންނެވެ. ބުދަ ދުވަހަކީ ބަންދު ދުވަހެއްގެ ގޮތުގައި ހަމަޖައްސައި، ސައޫދީން ނިންމީ އެ ގައުމަށް ލިބުނު ކާމިޔާބީ ކުލަގަދަކޮށް ފާހަގަކުރުމަށެވެ. ސައޫދީގެ މީޑިއާތަކުގައި ރިޕޯޓުކޮށްފައިވާ ގޮތުން، އުފާ ފާޅުކުރުމުގައި އެ ގައުމުގެ ސަރުކާރުގެ މުވައްޒަފުންނާއި، ސްކޫލް ދަރިވަރުންނަށް ބައިވެރިވެވޭނެއެެވެ.
މުބާރާތުގައި 2-1ން އާޖެންޓީނާ ބަލިކޮށް ސައޫދީން ވަނީ އެ އާޖެންޓީނާއިން ދަމަހައްޓަމުން އައި މޮޅުވުމުގެ ސިލްސިލާއަށް ނިމުން ގެނެސްފައެވެ. އާޖެންޓީނާ ސައޫދީ އަތުން ބަލިވީ މެޗަކުން ބަލިނުވެ ގިނަ ދުވަސްތަކެއް ފުރިހަމަ ކުރުމަށްފަހުއެވެ. އެ މެޗަށް ނުކުތްއިރު އެންމެ ފަހުން އާޖެންޓީނާ ބަލިވެފައިވަނީ 2019 ވަނަ އަހަރުގެ ކޮޕަރ އެމެރިކާގެ ސެމީ ފައިނަލްގައި ބްރެޒިލް އަތުންނެވެ.
