ފީފާ ވޯލްޑް ކަޕްގައި ބުދަ ދުވަހުގެ ރޭ ސްޕެއިންއާ ދެކޮޅަށް ކުޅޭ މެޗު އުނދަގޫވާނެ ކަމަށާއި، ނަމަވެސް ކޮސްޓަރިކާ އިން ދޫނުދޭނެ ކަމަށް އެ ޓީމުގެ ކޯޗު ލުއިސް ފެނާންޑޯ ސުއަރޭޒް ބުނެފިއެވެ.

މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން ފެނާންޑޯ ބުނީ ލޮޖިކަލީ ބުނާ ނަމަ، ސްޕެއިންއާ ދެކޮޅަށް ކުޅުމަމީ ވަރަށް އުނދަގޫ ކަމެއް ކަމަށެވެ. އޭނާ ބުނީ ޓެކްޓިކްސް އާއި ސްޓްރެޓެޖީގެ އިތުރުން މެޗަކީ ޓެންޝަން ބޮޑު މެޗަކަށްވާނެ ކަމަށެވެ. އޭނާ ބުނީ ކޮސްޓަރިކާއިން އަބަދުވެސް ކުޅެމުން އަންނަ ސްޓައިލަކީ އިދިކޮޅު ޓީމަށް އުނދަގޫކޮށް، އެމީހުންނަށް ބާރުބޮޑުކޮށްގެން ކަމަށެވެ. އެހެންކަމުން ސްޕެއިންގެ މެޗުގައި ވެސް އެންމެ ފުރަތަމަ އިސްކަމެއް ދޭނީ އެމަގުން ކުޅުމަށް ކަމަށް އޭނާ ބުންޏެވެ.

މި ޕްރެސްގައި ބައިވެރިވެ ވާހަކަ ދައްކަމުން ކޮސްޓަރިކާގެ މިޑްފީލްޑަރު ރުއިޒް ބުނީ ސްޕެއިންއާ ދެކޮޅަށް ކުޅެން ތައްޔާރުވާއިރު އެއީ ކިހާ ފެންވަރެއްގެ ޓީމެއްކަން ކުޅުންތެރިންނަށް އެނގޭ ކަމަށެވެ. އޭނާ ބުނީ އިދިކޮޅު ޓީމުގެ ކުޅުމުގެ ސްޓައިލާ އެ މީހުންގެ ކުޅުންތެރިންގެ ފެންވަރު ވެސް އެނގޭ ކަމަށެވެ. އޭނާ ބުނީ ކޮސްޓަރިކާ ގައި ވެސް ކޮލެޓީ ކުޅުންތެރިން ތިބި ކަމަށާއި، މަސައްކަތް ކުރާނީ ސްޕެއިން ބަލިކުރުމަށް ކަމަށެވެ. އޭނާ ބުނީ ސްޕެއިންގެ މެޗަކީ ފަސޭހަ މެޗަކަށް ނުވާނެ ކަމަށެވެ.

ގްރޫޕް އީ ގައި ކޮސްޓަރިކާ އިން ސްޕެއިންނާ ދެކޮޅަށް ނިކުންނާނީ ބުދަ ދުވަހުގެ ރޭ ރާއްޖެ ގަޑިން 21:00 ގައެވެ.