އިންޑޮނީޝިޔާއަށް އައި ބިންހެލުމުގައި ގިނަ އަދެއްގެ ސްކޫލް ކުދިން މަރުވެފައިވޭ

އިންޑޮނީޝިޔާގެ ޖާވާއަށް ހޯމަދުވަހު އައި ބާރުގަދަ ބިންހެލުމުގައި މަރުވި މީހުންގެ ތެރޭގައި ގިނަ އަދަދެއްގެ ސްކޫލް ކުދިން ހިމެނޭ ކަމަށް ޚަބަރު ލިބިއްޖެއެވެ. ބިންހެލުން އައީ މެންދުރު ފަހު 1.30ހާއިރު ކަމަށް ވުމުން، އެވަގުތަކީ ކުދިން ސްކޫލްތަކުގައި ތިބި ވަގުތެވެ.

5.6ގެ ބާރުމިނުގައި ބިންހެލުން އައިސްފައިވަނީ ޖާވާގެ އަޑިގުޑަން ބޮޑު ހިސާބަކަށެވެ. މިއީ ފަރުބަދަމަތީ ހިސާބަކަށް ވާއިރު، ބިންހެލުން އައުމާއެކު ފަސްގަނޑު ފައިބައިގަނެ އެތައް އިމާރާތެއް ވަޅުލެވިގެން ދިޔަކަމަށް ޚަބަރުތައް ބުނެއެވެ.

ބިންހެލުން އައި ސަރަހައްދު، ހުޅަނގު ޖާވާގެ ސިއަންޖޫރުގެ ވެރިން މައުލޫމާތު ދީފައިވާގޮތުގައި، އިއްޔެގެ ބިންހެލުމުގައި މަރުވި މީހުންގެ އަދަދު މިހާރު ވަނީ 252ށް އަރާފައެވެ. އަދި ތިރީސް މީހުން ގެއްލިފައިވާ ކަމަށްވެސް ޚަބަރުތައް ބުނެއެވެ. ގިނަ މީހުންނާއި ކުދިން މަރުވެފައިވަނީ ވެއްޓުނު ފާރުތަކުގެ ދަށުވެގެންނެވެ.

ބިންހެލުން އައިސްފައިވަނީ ބިމުގެ 10 ވަރަކަށް ކިލޯމީޓަރު އަޑިންނެވެ.  

ކަމާބެހޭ އިދާރާތަކުން ބުނެފައިވާ ގޮތުގައި ބިންހެލުމުގައި 2،200 ގެ ވަނީ ބިމާހަމަވެފައެވެ. އަދި 13،000 މީހުން ސަލާމަތްކޮށް ވަގުތީ ހިޔާތަކަށް ވަނީ ގެންދެވިފައެވެ.

އިންޑޮނީޝިޔާގެ ރައީސް ޖޯކޯ ވިޑޯޑޯ ވަނީ ބިންހެލުން އައި ހިސާބަށް މިއަދު ވަޑައިގެން އެހީގެ މަސައްކަތުގައި ހަރަކާތްތެރިވި ޓީމުތަކާ ބައްދަލުކުރައްވައި، ޓީމް ތަކަށް ހިތްވަރު ދެއްވާފައެވެ. އަދި އެހީގެ މަސައްކަތަށް ގިނައަދެއްގެ ފުލުހުންނާއި ސިފައިން ވަނީ ނެރެފައެވެ.

ބިންހެލުން އައުމަކީ އިންޑޮނީޝިޔާއަށް އާންމު ކަމެކެވެ. 2018 ވަނަ އަހަރު ސުލަވޭސީ ޖަޒީރާއަށް އައި ބިންހެލުމުގައިވެސް ދެހާހަށް ވުރެގިނަ މީހުން މަރުވެފައި ވެއެވެ.