ޤަތަރު ވޯލްޑްކަޕް 2022: ހުޅުވުމުގެ ރަސްމިއްޔާތުގައި މޯގަން ފްރީމަންއާއެކު ސްޓޭޖުން ފެނުނު ޒުވާން ބަޠަލް ދަންނަންތަ؟

ފަހުގެ ތާރީޚު ދެކެފައި ނުވާ ފަދަ ބޮޑު ބަލިމަޑުކަމަކާއި، 3 ވަނަ ބޮޑު ހަނގުރާމައެއްގެ ނާމާން ރަނގަބީލާއި، މޫސުމީ ނޭދެވޭ ބަދަލުތަކުގެ ކާރިޘާތަކާއި އެނޫންވެސް ދޭދޭ ދެބަސްވުންތަކާއި ހަމަނުޖެހުންތަކުގައި މުޅި ދުނިޔެއަށް ނުތަނަވަސްކަން ވެރިވެފައި ވާ މި ދަނޑިވަޅުގައި، ހިތްތަކަށް ހަމަޖެހުމާއި އުފާވެރިކަން ގެނެސްދީ، މުޅި ދުނިޔެއަށް އުފާވެރިކަމުގެ ޢީދެއް ގެނެސްދިން އެއް ކަމަކީ ނޮވެމްބަރު 20 ވަނަ ދުވަހުގެ ރޭ، ޤަތަރުގައި ފެށި 22 ވަނަ ފީފާ ވޯލްޑްކަޕް ފުޓުބޯޅަ މުބާރާތެވެ. ފީފާ ވޯލްޑްކަޕް ފުޓުބޯޅައިގެ ދިގު ތާރީޚުގައިވެސް ފުރަތަމަ ފަހަރަށް، ޢަރަބި އިސްލާމީ ޤައުމެއްގައި މުބާރާތް ކުރިއަށް ގެންދާއިރު، މުބާރާތް ހުޅުވުމުގެ ރަސްމިއްޔާތަށް އެތައް ބައެއްގެ ސަމާލުކަން ހުއްޓުވާލި އެކަކީ، ހޮލީވުޑްގެ ތަރި މޯގަން ފްރީމަންއާއެކު ސްޓޭޖް ހިއްސާ ކުރި ޒުވާނެކެވެ.

އެއީ މެއި 5، 2002 ވަނަ ދުވަހު މި ދުނިޔެއަށް އުފަންވި ޣާނިމް އަލް-މުފްތާހްއެވެ. ޣާނިމް އުފަންވިއިރުވެސް އެހެން ކުދިންނާ ތަފާތެވެ. ކޯޑަލް ރިގްރެޝަން ސިންޑްރޯމް (ސީޑީއެސް)އާއެކު މި ދުނިޔެއަށް ޣާނިމް އުފަންވިއިރުވެސް ޖިސްމާނީ ގޮތުން، އޭނާގެ ހަށިގަނޑުގައި އައިބުތަކެއް ހުއްޓެވެ. އުނަގަނޑުން ތިރީގެ އައިބުކަމެވެ. ނަމަވެސް، އެއީ އެއްވެސް ކަމަކީ، ދިރިއުޅުމައިގެން ކުރިއަށް ދިއުމަށް އޮތް ހުރަހެއް ކަމުގައި އޭނާ ނުދެކެއެވެ. ކުރިމަތިލާން ޖެހޭ ކޮންމެ ގޮންޖެހުމެއް ހުރަސް ކުރަނީ، އިސް ނަގާ، ކެރި ހުރެގެންނެވެ. ޢުއްމީދީ ރޫޙެއްގައެވެ.

ޖިސްމާނީ ގޮތުން އައިބުތަކެއް ހުރި ކަމުގައި ވީ ނަމަވެސް، ޣާނިމްއަކީ ކުޅިވަރުގެ މައިދާނާ ރައްޓެހި، އަދި އެ މައިދާނަށް އަހުލުވެރި ޒުވާނެއްވެސްމެއެވެ. އެކްސްޓްރީމް ސްޕޯރޓްސްގެ ތެރޭގައި ގުނާލެވޭ ސްކޫބާ ޑައިވިންގް، ސްކޭޓްބޯޑިންގްއަދި ރޮކް ކްލައިމްބިންގް ފަދަ ކުޅިވަރުތަކަކީ، ޣާނިމް ކުޅެ އުޅޭ ކުޅިވަރުތަކެކެވެ. މި ކަންކަމަކީ ޖިސްމާނީ ފުރިހަމަ ސިއްހަތަކާއެކު، ކުޅެދޭ މީހުންނަށްވެސް ގިނަ ފަހަރު ނުކުރެވި އޮންނަ ކަން ކަމެވެ. ގަލްފް ސަރަޙައްދުގެ އެންމެ އުސް ފަރުބަދަތަކުގެ ތެރޭގައި ހިމެނޭ ޖަބަލުއް ޝަމްސަށް އަރާފައިވާ ޣާނިމް އަމާޒު ހިފާފައި ވަނީ ދުނިޔޭގެ އެންމެ އުސް ސަރަޙައްދު ކަމުގައިވާ މައުންޓް އެވަރެސްޓަށްވެސް އަރާށެވެ.

ޣާނިމްގެ ބަލީގެ ގޮތުން، މާ ގިނަ ދުވަހު ދުނިޔޭގައި ހުންނާނެ ކަމުގެ ޢުއްމީދެއް ޑޮކްޓަރުންނަކަށް ނޯވެއެވެ. ކޮންމެ އަހަރަކުވެސް ސިއްހީ ތަޖުރިބާކާރުންގެ ވަރުގަދަ ޓީމެއްގެ އެހީ ހޯދަން ޖެހެއެވެ. ނަމަވެސް ޣާނިމްގެ ހިތްވަރު، އެއަށްވުރެ މާ ގަދައެވެ. ޣާނިމްގެ ވާހަކަ އަހައިފި ކޮންމެ މީހަކަށް ހިތްވަރަކަށް ވެއެވެ. އެފަދަ ޒުވާނެއްގެ ގޮތުގައި ޣާނިމް ބޮޑު ކުރުމުގެ ބުރަ މައްސޫލިއްޔަތު އުފުލަމުން ދަނީ އޭނާގެ މައިންބަފައިންނެވެ. އާންމު ދިރިއުޅުމެއް އުޅުމަށް ޣާނިމްއަށް އެންމެ ގާތުން ހިތްވަރު ދެމުން ދަނީވެސް އޭނާގެ މައިންބަފައިންނެވެ.

އޭނާގެ ނުގުޑާ ފަދަ ވަރުގަދަ ޢަޒުމާއެކު، މިއަދު ޣާނިމްއަކީ ޤަތަރުގައި ހުރި އެންމެ ހަގު ވިޔަފާރިވެރިޔާވެސްމެއެވެ. ޣާނިމްއަކީ ޣަރިއްސާ އައިސްކްރީމް ކުންފުނީގެ ވެރިޔާއެވެ. 6 ބްރާންޗެއްގައި 60 މުވައްޒަފުން ގެންގުޅޭ ޣާނިމް އަމާޒު ހިފާފައި ހުރީ، މުޅި ގަލްފަށް އޭނާގެ ވިޔަފާރި ފަތުރާލުމަށެވެ. ތަނަވަސްކަމާ އެއްވަރަށް، ޣާނިމްއަކީ މީހުންނަށް އެހީވުމުގައިވެސް ނަމޫނާއެކެވެ. ޣާނިމް އެސޯސިއޭޝަންގެ ނަމުގައި އޭނާ ދަނީ، ހާއްސަ އެހީއަށް ބޭނުންވާ މީހުންނަށް ފުރޮޅުލީ ގޮނޑި ފޯރުކޮށްދެމުންނެވެ.

ކުޅިވަރުގެ މައިދާނުން ބަލާއިރު، ޣާނިމް އަމާޒު ހިފާފައި ވަނީ، ޕެރަލިމްޕިއަންއަކަށް ވުމަށެވެ. ކަން މިހެން އޮތް އިރު، ޣާނިމްއާއި ފުޓުބޯޅައާ އޮތީ ކޮން ގުޅުމެއްތޯ ބަލަމާ ހިނގާށެވެ. ޣާނިމްއަކީ ފީފާގެ އެމްބެސެޑަރެކެވެ. ޣާނިމްއަކީ ފުޓުބޯޅަ ކުޅޭ ޒުވާނެކެވެ. އޭނާއާއެކީގައި އުޅޭ އެކުވެރިންނާއެކު ފުޓުބޯޅަ ކުޅުމުގައި ޣާނިމް ހަރަކާތްތެރިވަނީ ބޫޓު އަތަށް ލައްވައިގެންނެވެ.

ފީފާ ވޯލްޑްކަޕް ޤަތަރު 2022 ހުޅުވުމުގެ ރަސްމިއްޔާތުގައި ފްރީމަންއާއެކު ސްޓޭޖު ހިއްސާ ކުރަމުން ޣާނިމް ދިޔައީ ކީރިތި ޤުރުއާންގެ ޢާޔަތްތައް، އޭނާގެ ހިތްގައިމު އަޑުން އިއްވަމުންނެވެ. ސިންދަފާތުކަމާއި ބަލައިގަތުމުގެ ވަރުގަދަ މެސެޖެއް ދެމުންނެވެ.

އެތައް ބައެއްގެ ލޮލުގެ ފިނިކަން ކަމުގައިވި ޣާނިމްއަކީ މިއަދު، ޕޮލިޓިކަލް ސައެންސްގެ ރޮނގުން، ޔުނިވަރސިޓީގައި ފުރަތަމަ ޑިގްރީ ހާސިލު ކުރަމުންދާ ހިތްވަރުގަދަ ޒުވާނެކެވެ. ޑިޕްލޮމެޓަކަށް ވުމުގެ ފޮނި ހުވަފެންތައް ދެކެމުންދާ، ޢަޒުމް ވަރުގަދަ ބަޠަލެކެވެ. އެންމެ އުސް ހަރުފަތުގައި އޮތީ ޤަތަރުގެ ބޮޑުވަޒީރުކަން ކުރުމުގެ ޢަޒުމެވެ.