ފީފާ ވޯލްޑް ކަޕް 2022 ވެގެން ގޮސްފައި މިވަނީ ޗައިނާގެ އުފެއްދުންތައް ދައްކާލުމަށް އެގައުމަށް ލިބިގެންގޮސްފައިވާ ރަނުގެ ފުރުސަތަކަށެވެ. ފުޓުބޯޅަ ސްޓޭޑިއަމްތަކުން ފެށިގެން، ކޮންޓެއިނަރތަކުގައި ތައްޔާރުކޮށްފައިވާ ކޮޓަރިތަކާއި އިލެކްޓްރިކް ބަސްތަކުންވެސް ފެނިގެންދަނީ ޗައިނާގެ އުފެއްދުންތަކެވެ.

އާދިއްތަ ދުވަހު ފެށުނު ވޯލްޑް ކަޕް މުބާރާތުގެ މައި ސްޓޭޑިއަމް ކަމަށްވާ، ލުސައިލް ސްޓޭޑިއަމް އަކީ ޗައިނާ ރެއިލްވޭ ކޮންސްޓްރަކްޝަން ކޯޕަރޭޝަންއާ ގުޅިގެން އިމާރާތްކޮށްފައިވާ ސްޓޭޑިއަމްއެކެވެ. މިއީ މިއަހަރުގެ ވޯލްޑް ކަޕްގެ ފައިނަލް މެޗު ކުޅުމަށް ހަމަޖެހިފައިވާ ސްޓޭޑިއަމެވެ.

ޤަތަރުގެ އައު 10 ރިޔާލް ފައިސާ ނޫޓުގައި ލުސައިލް ސްޓޭޑިއަމްގެ ފޮޓޯ ބޭނުންކޮށްފައިވާއިރު، މިއީ ޗައިނާގެ ކުންފުންޏަކުން ވޯލްޑް ކަޕްގެ ސްޓޭޑިއަމެއް އިމާރާތްކުރި ފުރަތަމަ ފަހަރެވެ. އަދި 80،000 ސަޕޯޓަރުންނަށް އެއްފަހަރާ ވަދެވޭގޮތަށް ފަރުމާކޮށްފައިވާ މިސްޓޭޑިއަމް އަކީ މިއަހަރުގެ ވޯލްޑް ކަޕްގައި ބޭނުންކުރާ އެންމެ ބޮޑު ސްޓޭޑިއަމްއެވެ.

ލުސައިލް ސްޓޭޑިއަމްގެ އިތުރުން އެހެން ސްޓޭޑިއަމްތައް ފަރުމާކުރުމުގައިވެސް ޗައިނާގެ ކުންފުނިތަކުން ވަނީ ހަރަކާތްތެރިވެފައެވެ.

މީގެ އިތުރުން ޤަތަރުގައި ގާއިމުކޮށްފައިވާ "ފޭން ވިލެޖް" ގާއިމުކުރުމުގައިވެސް ޗައިނާގެ ކުންފުނިތަކުން ވަނީ ހަރަކާތްތެރިވެފައެވެ. ޤަތަރުގެ ވެރިރަށް ދޯހާގެ ދެކުނުގައި ގާއިމުކޮށްފައިވާ ފޭން ވިލެޖުގައި ވަނީ ކޮންޓެއިނަރު ބޭނުންކޮށްގެން 6،000 ގެ އިމާރާތްކޮށްފައެވެ. މިއިން ކޮންމެ ގެއެއްގައި 2 މީހުންނަށް ތިބުމުގެ ޖާގަ އޮވެއެވެ. އެހެން ކަމުން ފޭން ވިލެޖުގައި ތިބުމުގެ ފުރުސަތު 12،000 ސަޕޯޓަރުންނަށް ލިބޭނެއެވެ.

މިކޮންޓެއިނަރު ގެތައް އިމާރާތްކޮށްފައި ވަނީ ޗައިނާގެ ކުންފުނިތަކުންނެވެ. ފެންވަރު ރަނގަޅު ކޮން ފަރުމާކޮށްފައިވާ ކޮންޓެއިނަރު ގެތަކުގައި ފާހަނާއަކާއި އޭސީ އަދި ފަންކާ ވަނީ ހަރުކޮށްފައެވެ.

މުބާރާތް ކުރިއަށްދާއިރު، ސަޕޯޓަރުންނަށް ދަތުރުފަތުރުގެ ހިދުމަތް ފޯރުކޮށް ދިނުމަށް ޤަތަރުން ވަނީ ޗައިނާގެ 1،500 ބަސް އިމްޕޯޓުކޮށްފައެވެ. މީގެ ތެރޭގައި 888 އިލެކްޓްރިކް ބަސް ހިމެނެއެވެ.

އެހެން ކަމުން މިފަހަރުގެ ވޯލްޑް ކަޕްގައި އެންމެ ގަދަޔަށް ވިދާލާނެ ކަމަށް ބެލެވޭ އެކައްޗަކީ ޗައިނާގެ ތަފާތު އުފެއްދުންތަކެވެ.