ހުރިހާ މުސްލިމުންނަށް ޓްރަމްޕް އީދު ތަހުނިޔާ ފޮނުއްވައިފި

ބަރަކާތްތެރި ރަމަޟާން މަސް ނިމުން ފާހަގަކޮށް ފިތުރު އީދުގެ ތަހުނިޔާ ހުރިހާ މުސްލިމުންނަށް އެމެރިކާގެ ރައީސް ޑޮނަލްޑް ޓްރަމްޕް ފޮނުއްވައިފިއެވެ.

ޓްރަމްޕް އީދު ތަހްނިޔާ ފޮނުއްވިއިރު، ތަހުނިޔާ ފޮނުއްވާފައި މިވަނީ އެމެރިކާގެ އާދަކާދައާ އެއްގޮތައް ކޮންމެ ރައީސަކުވެސް ރޯދަމަހު ވައިޓް ހައުސްގައި މުސްލިމުންނަށް ބާއްވާ ޚާއްޞަ އިވެންޓް މިފަހަރު ނުބާއްވާ، ނެރުއްވި ބަޔާނެއްގައެވެ.

އެންމެހާ މުސްލިމުންނަށް އީދު ތަހުނިޔާ ފޮނުއްވުމުގެ ގޮތުން ޓްރަމްޕް ނެރުއްވި ބަޔާނުގައި ވިދާޅުވެފައިވަނީ މުސްލިމުން ފާހަގަ ކުރާ ފިތުރު އީދުގެ މުނާ ސަބަތުގައި އެމެރިކާގެ ރައްޔިތުންގެ ފަރާތުން ޓްރަމްޕާއި އަނބިކަނބަލުން މެލާނިއާ ގެ ފަރާތުން ހުރިހާ މުސްލިމުންނަށް ވަރަށް ހޫނު ތަހުނިޔާއެއް އަރިސް ކުރާ ކަމަށެވެ.

ޓްރަމްޕް ވިދާޅުވީ މިއީދުގެ ތެރޭގައި އެކަކު އަނެކަކަށް މައާފް ކުރުމަށާއި ހެޔޮއެދުމަށް އަދި އެއްބަޔަކު އަނެއް ބަޔަކަށް ރަނގަޅުގޮތް އެދުމަށް އެދިވަޑައިގެންފައެވެ.

"މުޅި ދުނިޔޭގެ ހުރިހާ މުސްލިމުންނާއެކު އެމެރިކާއިންވެސް އެއުސޫލުތައް ހިފަހައްޓާނެ ކަމުގެ ޔަޤީންކަން ދެން" ޓްރަމްޕް ވިދާޅުވިއެވެ.

އެމެރިކާގެ ކުރީގެ ރައީސް ބިލް ކްލިންޓަންގެ ދުވަސްވަރުން ފެށިގެން އެމެރިކާގެ ވައިޓް ހައުސްގައި އަންނަނީ މުސްލިމުންނަށްޓަކއި ރަމަޟާންމަސް ނިމުން ފާހަގަ ކުރުމުގެ ގޮތުން ޚާއްޞަ ރޯދަ ވީއްލުމެއް ބާއްވަމުންނެވެ.

އެކަމަކު އެމެރިކާގެ ސެކްރެޓަރީ އޮފް ސްޓޭޓް ރެކްސް ޓިލަރސަން ވިދާޅުވީ އެ ރޯދަވިއްލުން މިއަހަރު ނުބާއްވާނެ ކަމަށެވެ.

ޓްރަމްޕް ވެރިކަމަށް ވަޑައިގެންނެވީ ކެމްޕެއިންގައި ދެއްކެވި ވާހަކަ ތަކެއްގެ ސަބަބުން މުސްލިމުންނާ ދެކޮޅު ބޭފުޅެއްގެ ގޮތުގައެވެ.

ވެރިކަމަށް ވަޑައިގެންނެވުނުތާ ފުރަތަމަ ހަފުތާއަށްފަހު ޓްރަމްޕަވަނީ މުސްލިމް ބައެއް ޤައުމުތަކުގެ މީހުން އެޤައުމަށް އެރުން މަނާ ކޮށްފައެވެ.