ޔޯގާ ހަމަނުޖެހުން: ދަނޑުގެ ގޭޓުގެ ތަޅު ހަލާކުކޮށްލީ ސީދާ ޙަސަން ކަމުގެ ހެއްކެއް ނެތް، އޭނާ ޝަރުތުތަކާއެކު ބަންދުން ދޫކޮށްލައިފި

ގަލޮޅު ދަނޑުގައި ކުރިއަށްދިޔަ ޔޯގާ ހަރަކާތަށް ހުރަސްއަޅައި ހަމަނުޖެހުން ހިންގި މައްސަލައިގައި ޕްރޮސެކިއުޓަރ ޖެނެރަލް (ޕީޖީ) އޮފީހުން ދައުވާ އުފުލާފައިވާ ޙަސަން ޝިފާޒު ޝަރުތުތަކާއެކު ބަންދުން ދޫކޮށްލައިފިއެވެ.

އޭނާގެ މައްޗަށް ދައުލަތުން އުފުލާފައިވަނީ ޓެރަރިޒަމްގެ އަމަލެއް ކުރުމާއި، ޤާނޫނު ތަންފީޒުކުރާ މުވައްޒަފެއްގެ މަސައްކަތަށް ޤަސްތުގައި ހުރަސް އެޅުމާއި، ހަތިޔާރެއް ބޭނުންކޮށްގެން މާރާމާރީ ހިންގުމުގެ ދައުވާއެވެ.

މި އަޑުއެހުމުގައި އޮތީ އޭނާގެ ބަންދާއި ގުޅޭގޮތުން ވާހަކަ ދެއްކުމާއި ލިއެކިއުންތަކާއި ގުޅޭގޮތުން ވާހަކަ ދެއްކުމެވެ. އެގޮތުން ދިފާއީ ވަކީލު ވިދާޅުވީ، މި މައްސަލައިގެ ލިއެކިއުންތައް ދިފާއަށް ލިބިފައިވާ ކަމަށެވެ.

ދައުލަތުން ޙަސަން ޝިފާޒުގެ ބަންދާމެދު ގޮތެއް ނިންމުމަށް އެދި ފޯމު ހުށައަޅާފައިވާއިރު، ދައުލަތުގެ ވަކީލު ވިދާޅުވީ، އޭނާގެ މައްޗަށް ތުހުމަތު ކުރެވޭ މިންވަރަށް އެކަށީގެންވާ ހެކި އެބަހުރިކަމަށެވެ.

ދައުލަތުގެ ވަކީލު ވިދާޅުވީ، އޭނާއަކީ ދީނީ ހަރުކަށި ފިކުރަށް ތާއީދުކުރާ އަދި މާލޭގައި ކުށްކުރާ ގޭންގެއްގައި އަމަލީ ގޮތުން ބައިވެރިވާ ފަރާތެއްކަމަށް ފުލުހުންގެ އިންޓެލިޖެންސްއަށް އެނގިފައިވާ ކަމަށެވެ.

އޭގެ އިތުރުން، ޓެރަރިޒަމްގެ ދައުވާވެސް މި މައްސަލައިގައި އުފުލާފައިވާ ކަމަށާއި، އޭނާއަކީ މީގެ ކުރިންވެސް މިފަދަ މައްސަލައެއްގައި ޝަރީއަތް ހިންގިފައިވާ ފަރާތެއްކަމަށް ދައުލަތުން ބުނެއެވެ.

މި މައްސަލައިގައި ދައުވާ އުފުލާފައިވާ 17 މީހުންވެސް ވަނީ އެކި ސަބަބުތަކާހުރެ ބަންދުން ވީއްލިފައެވެ. ވުމާއެކު ދައުލަތުގެ ވަކީލު ވަނީ ޝަރުތުތަކާއެކު ޙަސަން ޝިފާޒު ބަންދުން ވީއްލައިދިނުމަށް އެދިފައެވެ.އޭގެ ތެރޭގައި މައްސަލައާ ގުޅުންހުރި ފަރާތްތަކާ މުއާމަލާތު ނުކުރުމާއި، މައްސަލައިގެ ހެކިންނާ ބައްދަލު ނުކުރުމާއި، މުޒާހަރާ ފަދަ ޙަރަކާތްތަކުގައި ބައިވެރިނުވުމާއި، ކޯޓަށް ހާޒިރުވުން ފަދަ ޝަރުތުތައް ހިމެނެއެވެ.

ޙަސަން ޝިފާޒުގެ ވަކީލު ވަނީ އެ ޝަރުތުތަކަށް ދިފާއުން ބޯލަނބާނެކަމަށް ވިދާޅުވެފައެވެ.

އޭނާގެ ވަކީލު ވަނީ ޔާމީން ރަޝީދުގެ މަރުގެ މައްސަލައިގައި އޭނާގެ މައްޗަށް ކުށް ސާބިތުނުވާކަމަށް ނިންމައި، އަދި އެ ނިންމުން ދައުލަތުން އިސްތިއުނާފުވެސް ކޮށްފައިނުވާއިރު، އެ މައްސަލައާ ގުޅުވައި އޭނާއަކީ މުޖުތަމައުގެ ސަލާމަތަށް ނުރައްކާވާ މީހެއްކަމަށް ބުނާތީ އެކަމުގެ ކަންބޮޑުވުން ފާޅުކުރައްވާފައެވެ.

އޭނާއަކީ ވަޒީފާއެއްގައި އުޅޭ ފަރާތަކަށްވާއިރު، މި މައްސަލައިގައި ބަންދު ކުރުމުގެ ސަބަބުން އޭނާގެ ވަޒީފާވެސް ގެއްލިފައިވާކަން ވަކީލު ފާހަގަ ކުރެއްވިއެވެ.

މައްސަލަ ބައްލަވާ ގާޒީވެސް ވަނީ އެ މައްސަލަ ވަކި ގޮތަކަށް ކަނޑައަޅައި ނިމިފައިވާކަން ފާހަގަ ކުރައްވައި މިހާރުގެ މައްސަލައިގެ ޙާދިސާއާ އެކަން ގުޅުވުމަކީ ރަނގަޅު ގޮތެއްކަމަށް ދެކިނުލައްވާކަމަށް ވިދާޅުވެފައެވެ.

ގާޒީ ވަނީ އޭނާއަކީ ވަޒީފާއެއްގައި އުޅޭ ފަރާތަކަށްވާއިރު، އަދި ދައުލަަތަށްވެސް އެ މައުލޫމާތު އެނގޭއިރު، މުޖުތަމައުގައި އޭނާ އަދާކުރާ ދައުރާ ގުޅޭގޮތުން ދައުލަތުން އެ މައުލޫމާތުތައް ހިމަނާފައިނުވަނީ ކީއްވެތޯ ސުވާލު ކުރައްވާފައެވެ. އަދި ގާޒީ ވަނީ ކުރިއަށް އޮތް ތަނުގައިވެސް ދައުލަތުން ހަގީގީ މައުލޫމާތު ފޯމުގައި ހިމެނުއްވުމަށް ސަމާލުކަން ދިނުމަށް ދަންނަވާފައެވެ.

އޭގެ އިތުރުން، ގަލޮޅު ގޭޓުގެ ތަޅު ހަލާކުކޮށްލީ ޙަސަން ޝިފާޒު ކަމަށް ދައުލަތުން ބުނާއިރު، އެކަން ކުރީ އޭނާކަން ޔަޤީންކަމާއެކު ދައުލަތަށް ދެންނެވިދާނެތޯ ގާޒީ ސުވާލު ކުރެއްވިއެވެ.

އެކަމާ ގުޅިގެން ދައުލަތުގެ ވަކީލު ވިދާޅުވީ، އެއީ ޖަމާއަތެއް ގޮތަށް އެންމެން އެކުގައި ހިންގި އަމަލެއް ކަމަށާއި، އެކަމުގައި އޭނާގެ ބައިވެރިވުންވެސް ހިމެނޭ ކަމަށެވެ.

ނަމަވެސް ޝަރީއަތުން ސާފު ކުރަން ބޭނުންވަނީ ޖުމުލަކޮށް ކަން ހިނގާދިޔަ ގޮތް ނޫން ކަމަށާއި، އެކަން ކުރީ ސީދާ އޭނާތޯ ދައުލަތަށް ދެންނެވިދާނެތޯކަމަށް ގާޒީ އަނެއްކާވެސް ސުވާލު ކުރެއްވިއެވެ. އެ ސުވާލުގެ ޖަވާބުގައި ދައުލަތުގެ ވަކީލު ވިދާޅުވީ، ތަޅު ހަލާކުކޮށްލީ ސީދާ ޙަސަން ޝިފާޒުކަމަށް ދައުލަތަށް ދެންނެވެން ނެތް ކަމަށެވެ.

މައްސަލަ ބައްލަވާ ގާޒީ ވިދާޅުވީ، ޙަސަން ޝިފާޒުއާ އެއް ހަމައެއްގައި ދައުވާތައް އުފުލާފައިވާ ފަރާތްތައް ބަންދުން ދޫވެފައިވާ ކަމަށާއި، އެކަން ދައުލަތުން އިސްތިއުނާފު ކޮށްފައި ނުވާ ކަމަށެވެ. އަދި ފޯމުގައި ބަޔާންކޮށްފައިވާ ބައެއް ސަބަބުތައްވެސް ދައުލަތަށް ސާފުކޮށް ނުދެވޭކަން ގާޒީ ފާހަގަ ކުރެއްވިއެވެ.

ގާޒީ ވަނީ ޝަރުތުތަކާއެކު އޭނާ ބަންދުން ދޫކޮށްލުމަށް އަމުރު ކުރައްވާފައެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ. މި މައްސަލައިގައި އިތުރު ބައެއްގެ މައްޗަށްވެސް ދައުވާ އުފުލާފައިވާއިރު، މައްސަލަ ބައްލަވާ ގާޒީ ވިދާޅުވީ އެ ފަރާތްތަކުގެ މައްޗަށް ކުރާ ދައުވާގެ އަޑުއެހުން އެހެން ދުވަހެއްގައި ކުރިއަަށް ގެންދަވާނެ ކަމަށެވެ.