ޖިނާއީ އިޖުރާއަތުގެ ބިލާ ގުޅިގެން ސަރުކާރު މެމްބަރުންގެ މެދުގައި ބޮޑު ހަމަނުޖެހުންގަނޑެއް!
13 ޖޫން 2017 | އަންގާރަ 10:00ސަރުކާރުގެ ފަރާތުން މިއަދު ހުށަހެޅި ބިލް މިހާރު ވަނީ އަނބުރާ ގެންގޮސްފައި
ސަރުކާރަށް ނިސްބަތްވާ ބައެއް މެމްބަރުން
ސަރުކާރުގެ ފަރާތުން ހުށަހެޅި ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ބިލާ ގުޅިގެން ސަރުކާރަށް ނިސްބަތްވާ ރައްޔިތުންގެ މަޖިލީހުގެ މެމްބަރުންގެ މެދުގައި ބޮޑު ހަމަނުޖެހުންގަނޑެއް ހިނގައި އެންމެ ފަހުން އެ އެބިލް އަނބުރާ ގެންގޮއްސި އެވެ.
އެނގިފައިވާ ގޮތުގައި އެ ބިލް އަނބުރާ ގެންގޮސްފައިވަނީ މެންބަރުންނާ މަޝްވަރާ ކުރުމެއް ނެތި ކުއްލިއަކަށް އެހާ ގިނަ އިސްލާހުތަކެއް ޖިނައީ އިޖުރާއަތުގެ ގާނޫނަށް ހުށަހެޅުމުން ސަރުކާރަށް ނިސްބަތްވާ މެންބަރުން ހިތްހަމަނުޖެހުން ފާޅު ކުރުމުންނެވެ. ރާއްޖެއެމްވީއަށް މައުލޫމާތު ލިބިފައިވާ ގޮތުގައި ޖަލްސާ މެދުކަނޑާލި ވަގުތު ސަރުކާރަށް ނިސްބަތްވާ ބައެއް މެމްބަރުން ޒުވާބުކޮށް އަޑުގަދަކުރަން ފެށުމުން އެބިލް ޑްރާފްޓް ކުރެއްވި އަދި އެބިލް މެމްބަރު މުބީނު މެދުވެރިކޮށް މަޖިލީހަށް ހުށަހެޅުއްވި އެޓާރނީ ޖެނެރަލް މުހައްމަދު އަނިލް އާއި ސަރުކާރުގެ ޓޫރިޒަމް މިނިސްޓަރު މޫސާ ޒަމީރު ވަޑައިގެން މެމްބަރުން ހަމައަކަށް އެޅުއްވުމަށް މަސައްކަތް ކުރެއްވިއެވެ.
ރާއްޖެއެމްވީއަށް މައުލޫމާތު ދެއްވަމުން ޕީޕީއެމް ޕާލަމެންޓްރީ ގްރޫޕްގެ ނާއިބު ލީޑަރު ރިޔާޒު ރަޝީދު ވިދާޅުވީ އެބިލް މަޖިލީހުން މިހާރު ނަގާފައިވާ ކަމަށެވެ. އަދި އެބިލް އަނބުރާ ނެގީ އެބިލްގައި ކުދިކުދި މައްސަލަތައް އުޅޭތީ އިސްލާހު ކުރުމަށް ކަމަށް ރިޔާޒު ވިދާޅުވި އެވެ. އެކަމާ ގުޅޭ އިތުރު މައުލޫމާތެއް ރިޔާޒުގެ ފަރާތުން ލިބިފައިނުވާއިރު، އެބިލް މަޖިލީހަށް ހުށަޅުއްވި މުބީންގެ ބަހެއް ލިބޭގޮތް ވެސް ވަނީ ނުވެފަ އެވެ.
އެބިލްގައި 99 މާއްދާ ހިމެނެއެވެ. ޖިނާއީ އިޖުރާއަތުގެ ގާނޫނުގައި ހިމެނެނީ 213 މާއްދާ އެވެ.
މީގެ ކުރިން އެގާނޫނަށް އަމަލު ކުރުން ފަސްކުރަމުން އައިސް، މިއަހަރުގެ ޖެނުއަރީ މަހުގެ ދެ ވަނަ ދުވަހު އަމަލުކުރަން ފަށާ ގޮތަށް އޮތްއޮތުން ބަދަލުކޮށް ޖުލައި މަހުގެ ދެވަނަ ދުވަހަށް އަމަލުކުރަން ފަށާ ގޮތަށް މަޖިލީހަށް ހުށަހެޅުމަށް ފަހު ވަނީ ފާސްކޮށްފަ އެވެ.
މުބީން ހުށަހެޅުއްވި އިސްލާހު ގެނައުމުގެ އެބިލްގައިވާ ގޮތުން ވެސް ޖިނާއީ އިޖުރާއަތުގެ ގާނޫނަށް މިހާރު އަމަލުކުރަށް އޮތް ދުވަހަށް ބަދަލުގެންނަށް ހުށަހަޅުއްވާފައެއް ނުވެއެވެ. މިހާރު ވެސް އޮތްގޮތަށް މުބީނު ހުށަހެޅުއްވި ބިލުގައި ވެސް ޖިނާއީ އިޖުރާއަތުގެ ގާނޫނަށް އަމަލުކުރުމަށް އޮތީ އަންނަ ޖުލައި މަހުގެ 2 ވަނަ ދުވަހެވެ.
އެބިލަށް ބަހުސް ކުރުމަށް ފެންނަ ކަމަށް 27 މެމްބަރުންގެ އިއްތިފާގުން ވަނީ ފާސްކޮށްފަ އެވެ. ނަމަވެސް ބަހުސްކުރެއްވުމަށް އެދިވަޑައިގަންނަވާ މެމްބަރުން އެކަމަށް އެދިވަޑައިގަތުމަށް ވަރަށް ކުޑަ ވަގުތުކޮޅެއް ދެއްވުމަށްފަހު، މަޖިލީހުގެ ރައީސް އަބްދުﷲ މަސީހު މުހައްމަދު ވަނީ އެއްވެސް މެމްބަރެއް އެ ބިލަށް ބަހުސްކުރައްވަން އެދިލައްވާފައިނުވާ ކަމަށް އިއުލާންކުރައްވައި ބަހުސްކުރުމުގެ މަރުހަލާ ނިންމާލައްވާފަ އެވެ. މަޖިލީހުގެ ރައީސް އެ ގޮތަށް އަމަލުކުރެއްވުމުން އިދިކޮޅު މެންބަރުން ވަނީ އެކަމާ ދެކޮޅަށް އަޑުއުފުލާފައެވެ.
އެހެންކަމުން ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ އެބިލަށް އެއްވެސް މެމްބަރަކު ބަހުސް ކުރައްވާފައިނުވާކަން ފާހަގަ ކުރެވުނުއިރު، މިއީ ޖިނާއީ އަދުލްގެ ނިޒާމުގައި ވަރަށް މުހިއްމު ބިލެކެވެ. މީގެ ކުރިން މަޖިލީހަށް ޖިނާއީ އިޖުރާއަތުގެ ބިލު ހުށަހެޅުނުއިރު، ގިނަ މެމްބަރުން އެ ބިލްގެ މުހިއްމު ކަމާ މެދު ވާހަކަ ދައްކެވި ނަމަވެސް އަންގާރަ ދުވަހުގެ ޖަލްސާގައި އެކަމެއް ނުފެނެއެވެ.
އަންގާރަ ދުވަހުގެ ޖަލްސާ ފެށިއިރު، ހާޒިރުވެވަޑައިގަންވާފައި ވަނީ ވެސް ކިރިޔާ ކޯރަމް ހަމަވާވަރަށް މެމްބަރުން ތިއްބަވައިގެންނެވެ.
ޖިނާއީ އިޖުރާއަތުގެ ގާނޫނާ ގުޅިގެން އެޓާރނީ ޖެނެރަލް މުހައްމަދު އަނިލް އާއި ޕްރޮސެކިއުޓަރ ޖެނެރަލް އާއިޝަތު ބިޝަމް ވިދާޅުވެފައި ވަނީ އެގާނޫނަށް ބައެއް ބަދަލުތައް ގެންނަންޖެހޭ ކަމަށެވެ. ނަމަވެސް އެ ދެ ބޭފުޅުން ގެންނަންޖެހޭ ބަދަލުތަކުގެ މާބޮޑު ތަފްސީލެއް އޭރު ނުދެއްވި ނަމަވަސް މިހާރު މަޖިލީހަށް ހުށަހަޅާފައިވާ އިސްލާހު ގެނައުމުގެ އެބިލަށް ވަރަށް ގިނަ އިސްލާހުތައް ހުށަހަޅާފައިވާކަން ފާހަގަ ކުރެވެއެވެ.
އެ ގާނޫނަށް އަމަލުކުރަން ފެށުމާއެކު މީހުން ހިފާ ހައްޔަރުކުރުމާއި ތަހްގީގު ހިންގުމާއި ދައުވާ އުފުލުމުގެ އިތުރުން ޝަރީއަތް ކުރުމުގައި މިހާރު ގެންގުޅޭ ބައެއް އުސޫލުތައް ބަދަލުވާނެއެވެ. އެގާނޫނުގައިވާ ގޮތުން، މައްސަލަތައް ތަހްގީގު ކުރުމަށް ފުލުހުންނަށް ލިބޭ މުއްދަތުތަކާއި ދައުވާކުރުމަށް ޕީޖީއަށް ލިބޭ މުއްދަތާއި މައްސަލަ ނިންމަން ކޯޓަށް ލިބޭ މުއްދަތުތައް ބަޔާން ކުރެވިފައިވެއެވެ.
