މަޖިލީހުގައި ތަޅު އެޅުވުމަކީ ކުށެއް: މަހްލޫފް
މަޖިލީހުގައި ތަޅު އެޅުވީ ސަލާމަތީ ސަބަބުތަކަށްޓަކައި ކަމަށް އަމީން އާންމު ވިދާޅުވި
މަޖިލީހުގައި ތަޅު އަޅުވާފައި
އެއްވެސް ބަޔަކަށް މަޖިލީހުގައި ތަޅެއް ނޭޅުވޭނެ ކަމަށާއި އެއީ ގާނޫނާ ހިލާފު ކަމެއް ކަމަށް، ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފު ވިދާޅުވެއްޖެ އެވެ.
ގުޅިފައިވާ ޕާޓީތަކުގެ ޕާލިމެންޓްރީ ގްރޫޕްގެ ތަރުޖަމާނު މަހްލޫފު ވިދާޅުވި ގޮތުގައި މަޖިލީހުގެ އިދާރާއަކީ މަޖިލީހުގެ މެމްބަރުންނަށް އަބަދު ވެސް ވަދެވޭނެ ތަނެއް ކަމަށެވެ.
"މިކަން ކުރި މީހުންނަށް ފަހުން ދައުވާކޮށް ޝަރީއަތް ކުރެވޭނެ، މިއީ ގާނޫނީ ކުށެއް،" މަހްލޫފު ވިދާޅުވި އެވެ.
މަޖިލީހުގެ އަމީން އާންމާ އަހްމަދު މުހައްމަދާ ހަވާލާ ދެއްވައި މަހްލޫފު ވިދާޅުވީ، މަޖިލީހުގައި ތަޅު އެޅުވީ ސަލާމަތީ ސަބަބުތަކަށްޓަކަ އެވެ.
"އަޅުގަނޑު ގުޅިން އަމީން އާންމަށް. އަމީން އާންމު ވިދާޅުވި ސަލާމަތީ ސަބަބުތަކަށްޓަކައި ކަމަށް ތަޅު އެޅުވީ. ނަމަވެސް އެއީ ކޮން ބައެއްގެ ސަލާމަތަށް ކަމެއް ނޭނގޭ،" މަހްލޫފު ވިދާޅުވި އެވެ.
މަޖިލީހުގެ ސަލާމަތީކަންކަން ބަލަހައްޓަނީ އެމްއެންޑީއެފުން ކަމަށް ވާތީ، ޗީފް އޮފް ޑިފެންސް ފޯސް މޭޖާ ޖެނެރަލް އަހްމަދު ޝިޔާމް އަށް ފޯނުން ގުޅުއްވި ކަމަށާއި ތަޅު އެޅުވުމަކީ ގާނޫނާ ހިލާފު ކަމެއް ކަމަށް އެ މަނިކުފާނަށް ދެންނެވި ކަމަށެވެ.
"ޗީފް ވިދާޅުވީ މަޖިލީހުގެ ކޮމިޓީއެއް ވެސް، ޖަލްސާއެއް ވެސް ނެތެއް ނޫންހޭ،" މަހްލޫފު ވިދާޅުވި އެވެ.
މެމްބަރުންނަށް މަޖިލީހުގެ އިދާރާއަށް ނުވަދެވޭނެ ގޮތަށް ހަމަ މިޖެއްސީ، ރައްޔިތުންގެ މަޖިލީހުގެ ރައީސް އަބްދުﷲ މަސީހު މަގާމުން ވަކިކުރަން މަޖިލީހުގެ އަޣުލަބިއްޔަތަށް ވުރެ ގިނަ މެމްބަރުން ސޮއިކުރައްވާ ހުށަހަޅުއްވާފައިވާ މައްސަލަ މަޖިލީހުން ބޭރުކޮށްލި ނަމަވެސް، މަޖިލީހުގެ ޖަލްސާއެއް މިއަދު ބާއްވާނެ ކަމަށް ގުޅިފައިވާ ޕާޓީތަކުގެ މެމްބަރުން ވިދާޅުވެފައި ވަނިކޮށެވެ.
ގުޅިފައިވާ ޕާޓީތަކުގެ މެމްބަރުން މިއަދު މެންދުރު މަޖިލީހަށް ވަޑައިގަންނަވާ ގޮތަށް ނިންމާފައިވާ ކަމަށާއި މެމްބަރުންނަށް ރައްޔިތުންގެ ތަރުހީބު ބޭނުންވާ ކަމަށް ޕާޓީތަކުން ވަނީ ބުނެފަ އެވެ.
ރައްޔިތުންގެ މަޖިލީހުގެ އިތުބާރު މަސީހަށް ގެއްލި، އަދި މަޖިލީހުގެ މެޖޯރިޓީ ސަރުކާރަށް ގެއްލުމާއެކު، މަސީހުގެ އިތުބާރު ނެތްކަމުގެ މައްސަލައިގައި ސޮއި ކުރެއްވި 45 މެމްބަރުންގެ ތެރެއިން ހަ މެމްބަރެއްގެ ގޮނޑި ވަނީ ގެއްލުވާލައިފަ އެވެ.
ސުޕްރީމް ކޯޓުން ކުރި ހުކުމަކާ ގުޅިގެން ގޮނޑި ގެއްލިއްޖެ ކަމަށް އިލެކްޝަންސް ކޮމިޝަނުން ކަނޑައަޅާފައިވަނީ، ތުލުސްދޫ ދާއިރާގެ މެންބަރު މުހައްމަދު ވަހީދު އިބްރާހިމާއި، މަޑުއްވަރީ ދާއިރާގެ މެންބަރު މުހައްމަދު އަމީތާއި، ދިއްދޫ ދާއިރާގެ މެންބަރު އަބްދުއްލަތީފާއި، ވިލިނގިލީ ދާއިރާގެ މެންބަރު ސައުދު ހުސެއިންއާއި، ދަނގެތީ ދާއިރާގެ މެންބަރު އިލްހާމް އަހުމަދުގެ އިތުރުން މައްޗަންގޯޅީ ދެކުނު ދާއިރާގެ މެންބަރު އަބްދުﷲ ޝިނާންގެ މެންބަރު ކަމުގެ ގޮނޑި އެވެ.
