މާފުށީ ޖަލުގައި ހަމަނުޖެހުން، ގައިދީން ބަނޑުހައި ހޫނުކަމުގައި
މި މައްސަލައިގައި އެ މުއައްސަސާގެ ރަސްމީ ބަހެއް ނުލިބޭ
މާފުށީ ޖަލު
މާފުށީ ޖަލުގެ ބައެއް ގައިދީން ބަނޑުހައި ހޫނުކަމުގެ ހަޅުތާލެއް ކުރަމުންދާ ކަމަށާއި ޖަލުގައި ހަމަނުޖެހުންތަކެއް ހިންގާފައިވާ ކަމަށް އަޑުތައް ފެތުރެން ފަށައިފި އެވެ.
މޯލްޑިވްސް ކަރެކްޝަނަލް ސާވިސްގެ މީޑިއާ އޮފިޝަލް ފޯން ނުނަންގަވާތީ، މި މައްސަލައިގައި އެ މުއައްސަސާގެ ރަސްމީ ބަހެއް ނުލިބެ އެވެ.
ކަރެކްޝަނަލް ސާވިސްގެ ސީނިއާ އޮފިޝަލަކު ވިދާޅުވި ގޮތުގައި ޖަލުގެ ކަންކަން ހުރީ އާންމު ހާލަތުގަ އެވެ.
"ތިޔަ ވިދާޅުވި ކަމުގެ އެއްވެސް ކަމެއް ނެތް،" އޭނާ ވިދާޅުވި އެވެ.
ރާއްޖެއެމްވީއަށް އެނގިފައިވާ ގޮތުގައި ޖަލުގެ ބައެއް ގޮޅިތަކުގައި ތިބި ގައިދީން ބަނޑުހައިހޫނުކަމުގެ ހަޅުތާލު ކުރަމުންދާތާ ދެ ދުވަސްވެއްޖެ އެވެ. އަދި ޖަލުގެ ތެރޭގައި ހިނގި ހަމަނުޖެހުންތަކާ ގުޅިގެން ބައެއް ގައިދީންނަށް އަނިޔާވެފައިވާ ކަމަށްވެ އެވެ.
މާފުށީ ޖަލުގައި ހުކުމް ތަންފީޒުކުރަމުން ދިޔަ ކުރީގެ ނައިބު ރައީސް އަހްމަދު އަދީބު ވަނީ، ނިމިގެން ދިޔަ ހަފުތާތެރޭގައި ދޫނިދޫ ޖަލަށް ބަދަލުކޮށްފަ އެވެ. ފުލުހުންގެ ބެލުމުގެ ދަށަށް އަދީބު ބަދަލުކުރީ ކީއްވެގެން ކަމަށް ހާމައެއް ނުކުރެ އެވެ.
