މެސީގެ މި ކުޑަކުޑަ ފޭން، ލޯފަން ސަޕޯޓަރުންނަށް ހޯދާދިނީ ހީވެސް ނުކުރާ ފަދަ އުޖާލާ ކަމެއް!

ކޮންމެ 4 އަހަރަކުން 1 އަހަރު، ދުނިޔޭގެ ތައްޓަށް ކުޅޭ ބައިނަލްއަޤުވާމީ ފުޓުބޯޅަ މުބާރާތް، ފީފާ ވޯލްޑްކަޕް ފުޓުބޯޅަ މުބާރާތާއެކު ވައިގައި ހިފާ އެއް ކަމަކީ ސްޓިކަރގެ ފޯރިއޭ ދެންނެވުމަކުން ދޮގަކަށް ނުވާނެއެވެ. ޑިޖިޓަލް ޓެކްނޮލޮޖީގެ ކުރިއެރުން ލިބިފައި ވާ އަދުގެ މި ޒަމާނުގައިވެސް ވޯލްޑްކަޕާއި ގުޅިގެން އުފެދޭ ސްޓިކަރގެ ފޯރިއާ ޖޯޝަކަށް ކުޑަ ނަމަވެސް ބަދަލެއް ނާދެއެވެ. އިހުނަށް ވުރެ ވަކިން، އެ ފޯރި ގަދަ ވަނީ، އެއް ގޮތަށް ވުރެ ގިނަ ގޮތުން، މުޖުތަމަޢުގެ އެކި ގިންތިތަކަށްވެސް އެކަން ހާއްސަ ކުރެވޭނެ އިންތިޒާމްތައް މިއަދު ހަމަޖެހެމުންދާތީ ކަމުގައިވެސް ވެދާނެއެވެ. މިއީވެސް އެފަދަ ޢުއްމީދީ ވާހަކައެކެވެ. މި ފަހަރު، ވޯލްޑްކަޕް ސްޓިކަރ ފޮތް މި ހާއްސަ ވަނީ، ލޮލުގެ ފެނުމުން މަޙްރޫމުވެފައިވާ ފޭނުންނަށެވެ.

ކުރިއަށް އޮތް 22 ވަނަ ފީފާ ވޯލްޑްކަޕް ފުޓުބޯޅަ މުބާރާތުގެ ފައިނަލް މެޗް ކީއްކުރަން، ކިކްއޯފް މެޗާ ހިސާބަށްވެސް ނުދެވި އުޅެނިކޮށް، ގިނަ ބައެއްގެ ހިތްތަކުން ޗެމްޕިއަންގެ ލަޤަބު ދިން އެކަކީ ވެނެޒުއޭލާއަށް ނިސްބަތްވާ، ޢުމުރުން އެންމެ 12 އަހަރުގެ ސަބޭޝީއަން ފިލޮރާމޯއެވެ. ސަބަބެއް ނެތިއެއް ނޫނެވެ. ސަބޭޝިއަން ވަނީ 2022 ޤަތަރު ވޯލްޑްކަޕްގެ ސްޓިކަރ ފޮތް، އޭނާ ފަދަ ލޯފާން ކުދިންނަށް ފަޙުމް ވާނެހެން، ބްރަޔަލްއަށް ތަރުޖަމާ ކޮށްފައެވެ. އެކަމުގެ ފަހަތުގައި ހުރި މޭސްތިރިއަކީ ސަބޭޝިއަންގެ ބައްޕައެވެ. އޭނާ އެކަން ކުރީ، ވޯލްޑްކަޕްގެ ސްޓިކަރ ފޯރި ގަދަވެގެން އަންނައިރު، އޭނާގެ ދަރިފުޅަށްވެސް އެކަމުގައި ބައިވެރިވުމުގެ ފުރުޞަތު ހޯދާ ދިނުމުގެ މަޤްޞަދުގައެވެ.

ލޯފާން ކުދިންނަށްވެސް ފަސޭހައިން ކިޔާލެވޭ ގޮތަށް، ވޯލްޑްކަޕް ސްޓިކަރ ފޮތް ތައްޔާރު ކުރުމަށްޓަކާ، ކުޅުންތެރިންގެ ނަންތަކާއި ނަމްބަރު އަދި ޤައުމުތައް، ބްރަޔަލް ޓައިޕްރައިޓަރު ބޭނުންކޮށްގެން، ތަތްލަވާ ކަރުދާހުގައި، ސަބޭޝަން ޓައިޕްކުރިއެވެ. އެއަށްފަހު އެ ކަރުދާސްތައް، އަލްބަމްގައި ހިއްޕީއެވެ. އަލްބަމްގައިވާ ގޮޅިތައް ވަކި ކުރުމުގެ ގޮތުން، ސިލިކޯން ފްރޯމް ހިއްޕާ ދިނީ ސަބޭޝަންގެ ބައްޕައެވެ. އެގޮތަށް އެކަން ކުރުމުން، ލޮފާން ކުދިން އަމިއްލައަށްވެސް އަލްބަމްގައި އަތް ހިންގައިގެން، އެ ސްޓިކަރއެއް ހިއްޕަން ވީ ގޮޅިއެއް ފާހަގަ ކުރެވެއެވެ.

ސަބޭޝަންގެ އިންސްޓަގްރާމް އެކައުންޓްގައި އޭނާ ވަނީ، ހުރިހާ އެންމެންނަށްވެސް އެ ފޯރީގައި ބައިވެރިވޭނެ ގޮތަށް ވޯލްޑްކަޕް ފޮތާއި ސްޓިކަރ ތައްޔާރު ކުރާނެ ގޮތް، އޭނާގެ އިންސްޓަގްރާމް އެކައުންޓްގައި ވަރަށް ތަފާސީލުކޮށް ކިޔާ ދީފައެވެ.

ރެޓިނޮޕަތީ އޮފް ޕްރީމެޗޫރިޓީއާއެކު ސަބޭޝަން އުފަންވީ އޭނާގެ މަންމަގެ ބަނޑަށް އެންމެ ހަތް މަހުގައެވެ. އެ ބަލީގެ ސަބަބުން، ސަބޭޝަންގެ ލޮލުގެ ފެނުން މުޅިން ގެއްލިދިޔައެވެ. ފެނުމުން މަހްރޫމް ވެފައިވީ ނަމަވެސް މިއަދު އޭނާއަކީ ހަޔާތް ފުރިހަމަ ގޮތުގައި ވޭތުކުރަން ނިންމައިގެން ހުރި އުންމީދީ ކުއްޖެކެވެ.