މެސީގެ ފަހު ވޯލްޑްކަޕާއެކު އާޖެންޓީނާގެ ދިދަ ހަދާ މީހުން ބަސްހުއްޓިފައި!

ނިމުމަކާ ގާތްވެފައިވާ ޤަޠަރު ފީފާ ވޯލްޑްކަޕް 2022 އަކީ ހައިރާން ކުރަނިވި އެތައް މަންޒަރެއް އެ މުބާރާތެއްގެ ތެރެއިން ފެނިގެންދާ މުބާރާތެއް ކަމަށް ދަންނަވަން ޖެހެނީ ސަބަބެއް ނެތިއެއް ނޫނެވެ. މީހުންގެ ސަމާލުކަން ދަމައިގަންނަ އެތައް ކަމެއް، މެޗުތަކުގެ ހަވާސާއިން ތާ އަބަދުމެ ފެންނަމުން ދެއެވެ. އެފަދަ އެއް މަންޒަރަކީ، ޤަޠަރުގައި ވިހުރަމުންދާ އާޖެންޓީނާގެ ދިދަތަކެވެ.

މުބާރާތުގެ ފައިނަލަށް ދަތުރު ކޮށްފައިވާ އާޖެންޓީނާގެ ދިދަތައް މި ފަހަރު ފަރުމާ ކޮށްފައި ވަނީ އޭނާގެ ފަހު ވޯލްޑްކަޕް މެޗަށް ނުކުންނަ، ދުނިޔޭގެ 1 ނަމްބަރު ކުޅުން ތެރިޔާ ކަމަށް ގިނަ ބަޔަކު އިއްތިފާޤުވާ ލައޮނެލް މެސީއާއި، ފުޓުބޯޅައިގެ މައިދާނުގައި އެފަދަ ދެވަނައެއް ނެތް ކަމަށް ބުނާ ލެޖެންޑް، ޑިއެގޯ މަރަޑޯނާގެ ތަސްވީރުތަކާއެކީގައެވެ.

މި ހާއްސަ ދިދަތައް ފަރުމާކޮށް، ތައްޔާރު ކޮށްފައި ވަނީ އާޖެންޓީނާގެ ބޮއެނަސް އައިރީޒްގެ ލަ މަންތާޒާ ކައުންޓީގައި މަރުކަޒު ކޮށްގެން ހިންގާ ސްޓޫޑިއޯއެއް ކަމަށް ވާ އޭރޯގްރާފިއާ ޑެލް އޮއެސްޓޭއިންނެވެ.

އޭރޯގްރާފިއާ ޑެލް އޮއެސްޓޭގައި ދިދަ ހެދުމުގެ މަސައްކަތުގައި އުޅޭ ފަންނުވެރިއެއް ކަމަށް ވާ ފަކޫންޑޯ ޕެރާލްޓާ  ބުނި ގޮތުގައި އެ ސްޓޫޑިއޯއަކީ އާންމު ގޮތެއްގައިވެސް ބޮޑެތި އޯޑަރުތައް ލިބޭ ސްޓޫޑިއޯއެއް ކަމަށާ، ނަމަވެސް މި ފަހަރުގެ ވޯލްޑްކަޕާ ދިމާކޮށް، އެ ސްޓޫޑިއޯއަށް އޯޑަރުތައް ލިބުނީ "މޮޔަވާ" ވަރަށް ކަމަށެވެ.

މުބާރާތުގެ ފައިނަލުގައި ފަރަންސޭސިންނާ ދެކޮޅަށް އާޖެންޓީނާ ނުކުންނާނެކަން ކަށަވަރު ވުމާއެކު، އޭރޯގްރާފިއާ ޑެލް އޮއެސްޓޭއަށް ލިބެމުންދާ ފަހު މިނެޓްގެ އޯޑަރުތައްވެސް އުޅެނީ އޭގެ އެންމެ އިންތިހާއަށެވެ.

އޭރޯގްރާފިއާ ޑެލް އޮއެސްޓޭގެ ވޯކްޝޮޕްގައި އިވާން ކެސްޕޯން އަވަދިނެތި އުޅުނީ، ދިދަތަކުގެ ފަރުމާތަކަށް ގެންނަންޖެހޭ އެންމެ ފަހުގެ ފުރިހަމަ ކުރުންތައް ގެނައުމުގެ މަސައްކަތުގައެވެ. ކެސްޕޯން ބުނި ގޮތުގައި، އެ ސްޓޫޑިއޯއިން ފަރުމާކޮށްފައި ވާ ދިދަތައް، ސަޕޯޓަރުންގެ އަތުން ފެނުމުން އެ ކުރެވޭ އިޙްސާސަކީ ބަޔާން ކޮށްދޭންވެސް ދަތި އިޙްސާސްތަކެއް ކަމަށެވެ.

ވޯލްޑްކަޕް ތަށި އެންމެ ފަހުން އުފުލާލި ފަރަންސޭސިވިލާތުގެ ވަރުގަދަ ޓީމާ ދެކޮޅަށް، މެސީ، އޭނާގެ ހިތު ލޯބި ހިބަކޮށްފައި ވާ ޤައުމީ ޓީމު ގޮވައިގެން ނުކުންނާނީ ޑިސެމްބަރު 18 ވާ އާދީއްތަ ދުވަހުގެ ރެއެވެ.