އެއްޗެއްގެ އަގު ވެއްޓި ދިއުމަށް ފަހު، އިހު އޮތް މަޤާމަށް އެ އެއްޗެއްގެ ޙައިސިއްޔަތު އަލުން އަނބުރާ އުފުލުމަށްޓަކާ ޙިކުމަތްތެރި ކަމާއެކު ގިނަ މަސައްކަތްތަކެއް ކުރެއެއެވެ. ކަން ކުރަން އޮންނަ ގޮތަށް އެކަން ކޮށްގެން، ބައެއް ފަހަރު ކާމިޔާބު ލިބުނު ކަމުގައި ވީ ނަމަވެސް، އަނެއް ބައި ފަހަރު ނަޞީބު އަތުގައި ހިފަނީ، އާދަޔާ ޚިލާފު އުކުޅުތަކެއްގެ ބޭނުން ހިފައިގެންނެވެ. މިއީވެސް އެކަހަލަ ކަމެއްގެ ވާހަކައެވެ. ވެއްޓިފައިވާ އާޖެންޓީނާގެ ފައިސާގެ އަގު، ފަންނުވެރިއެއްގެ ސަބަބުން އުފުލިގެން ދިޔަ ގޮތުގެ ވާހަކައެވެ. އޭނާ އެކަން ކުރީ، އިޤްތިޞާދީ އަދި މާލީ ސިޔާސަތުތަކުގައި އިނގިލި ކުރިވެސް ޖައްސާނުލާ ކަމީ، މި ވާހަކައިގެ އެންމެ ހައިރާން ކުރަނިވި ކަމެވެ.

ދައްކަމުން މި ދަނީ އާޖެންޓީނާގެ ކުރެހުންތެރި ފަންނުވެރިއެއް ކަމަށް ވާ ސަރްޖިއޯ ގިލެރްމޯ ދިއާޒްގެ ވާހަކައެވެ. ބާޒާރުގައި ތަކެތީގެ އަގުތައް އުފުލެމުންދާ އޮއެވަރު ނުވަތަ އިންފްލޭޝަން ރޭޓް އިތުރުވުމުގެ ތަކުލީފުތަކާ ކުރިމަތިވެ، ވެއްޓެމުންދާ އާޖެންޓިނާގެ ފައިސާ ނުވަތަ ޕޭސޯގެ އަގު ހިފެހެއްޓުމަށް ދިއާޒް ބޭނުން ކުރީ އޭނާގެ ފަންނުވެރި ކަމުގެ އުކުޅެވެ. އޭނާ އެކަން ކުރަނީ، ހުސްވި ޑިސެމްބަރު މަހު ނިމިގެން ދިޔަ 22 ވަނަ ފީފާ ވޯލްޑްކަޕް ފުޓުބޯޅަ މުބާރާތުގެ އެންމެ ކާމިޔާބު ކުޅުންތެރިޔާ އަދި އާޖެންޓީނާގެ ޤައުމީ ޓީމުގެ ކެޕްޓަން، ލިއޮނަލް މެސީގެ ފޮޓޯ، ފައިސާ ނޫޓުގައި ކުރަހައިގެންނެވެ.

ރެކޯޑް އިންފްލޭޝަންއާއެކު އިންތިހާއަށް އަގު ވެއްޓިފައިވާ ޕޭސޯއަކީ މިއަދު ދިއާޒްގެ ކެންވަސްއެވެ. ނުތަވަ އޭނާ ކުރަހަން ބޭނުން ކުރާ ކަރުދާހެވެ. އޭނާގެ ސޯލްޓާ ވޯކްޝޮޕްގައި ހުރެ، ރޮއިޓަރޒްއާ ވާހަކަދައްކަމުން ދިއާޒް ބުނީ، ޕޭސޯގައި މެސީގެ ތަސްވީރު ކުރަހައިގެން އޭނާ ކުރާ މަސައްކަތް ކޮށް ނިންމާލުމުން، ޙަޤީޤީ ނަގުދު ފައިސާގެ އަގަށް ވުރެ ބޮޑު އަގެއް އެ ނޫޓަށް ޖެހޭ ކަމަށެވެ.

އަގު ވެއްޓިފައިވާ އާޖެންޓީނާގެ ފައިސާގެ ނޫޓުތަކުގައި ދިއާޒް ކުރަހަމުން ދަނީ ހަމަ އެކަނި މެސީގެ ތަސްވީރެއް ނޫނެވެ. ތިމާވެށި ހިމާޔަތް ކުރުމަށް ވަކާލާތު ކުރުމުގެ ނަމުގައި، ދުނިޔޭގެ އެކި ކަންކޮޅުތަކަށް އޭނާގެ ނަން ގުގުމާލި، ގްރިއެއްތާ ޓުންބަރގް ފަދަ މީހުންގެ ތަސްވީރުވެސް ދިއާޒް ކުރަހައެވެ.

ދިއާޒް ބުނާ ގޮތުގައި އާޖެންޓީނާގެ ފައިސާގެ ނޫޓުގައި އޭނާ އަޅަމުންދާ ކުރެހުންތަކަކީ، ގޮންޖެހުންތަކާ ކުރިމަތިލާން ޖެހިފައިވާ އާޖެންޓީނާގެ އިޤްތިޞާދާ މެދު އޭނާ އިއްވާ ސާފު ބަޔާނެކެވެ.

އިންތިހާއަށް ދިގުލާ ގޮސްފައިވާ މާލީ ކާރިޘާއާއެކު އާޖެންޓީނާގެ އިންފްލޭޝަން ރޭޓް އުޅެނީ 100 ޕަސެންޓްއާ ގާތް ކުރާ ހިސާބެއްގައެވެ. ނަތީޖާއެއްގެ ގޮތުން، މިއަދު އެ ޤައުމުގެ އާބާދީގެ 40 ޕަސެންޓް މީހުންނަށް ދިރިއުޅުން ކަޑަތު ކުރަން މަޖުބޫރު ވެފައި ވަނީ، އިންތިހާ ފަޤީރުކަމަށް ވުރެވެސް ދަށު ދަރަޖައެއްގައެވެ.