"ގާނޫނު އަސާސީގެ ދިފާއުގައި" ޖަލްސާއަށް ދާ މީހުންނަށް ހުރަސް އަޅަން ސަރުކާރުން އިވެންޓްތައް ބާއްވާ އެތަނަށް ދާން މަޖުބޫރުކުރަނީ
ސަރުކާރު ހިއްސާވާ ކުންފުނިތަކުން އަންނަނީ ހަރަކާތްތައް ރާވާ މުވައްޒަފުންނަށް އަންނަން މަޖުބޫރުކުރަމުން
ގާނޫނު އަސާސީގެ ދިފާއުގައި ބާއްވާ ޖަލްސާއަށް މުވައްޒަފުންނާއި ބެލެނިވެރިންނަށް ނުދެވޭނެހެން ސަރުކާރުން ރާވަމުންދާ ހަރަކާތްތަކަށް އަންނަން އަންގާ ފޮނުވާފައިވާ މެސެޖްތައް
މިރޭ ބޭއްވުމަށް ހަމަޖެހިފައިވާ "ޤާނޫނުއަސާސީގެ ދިފާއުގައި" އެއްވުމަށް ސަރުކާރު މުވައްޒަފުން ގޮސްދާނެތީ، ސަރުކާރުން އިވެންޓްތައް ބާއްވާ އެ އިވެންޓްތަކަށް ދިއުމަށް މަޖުބޫރުކުރަން ފަށައިފިއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި، ސަރުކާރާއި، ސަރުކާރު ހިއްސާވާ ކުންފުނިތަކުގެ އިތުރުން، ސްކޫލްތަކުގެ ދަރިވަރުންގެ ބެލެނިވެރިންނަށް ހާއްސަކޮށްގެން ކަންކަން ދަނީ ރާވަމުންނެވެ.
އެގޮތުން އެމްޕީއެލްއިން މުވައްޒަފުންނަށް ފޮނުވާފައިވާ މެސެޖެއްގައި ބުނެފައިވަނީ މިރޭ 8:00ށް ހުރިހާ މުވައްޒަފުން މެނޭޖްމަންޓުން ކުރިއަށް ގެންދާ ހަރަކާތަކަށް ހުރިހާ މުވައްޒަފުން އޮފީހަށް އައުމަށް އަންގާ ކަމަށެވެ. އަދި ޗުއްޓީގައި ތިބި މުވައްޒަފުުން ނޫން ހުރިހާ މުވައްޒަފުން މި ހަރަކާތުގައި ބައިވެރުވުމަށް އެދޭ ކަމަށާއި، އޮފް ގައި ތިބި މުވައްޒަފުން ވެސް ބައިވެރިވާން ޖެހޭނެ ކަމަށް އަންގާފައިވެއެވެ.
މީގެ އިތުރުން މުވައްޒަފުންގެ ހާޒިރީ ބެލޭނެ ކަމަށާއި، ޔުނީފޯމްގައި ތިބޭ މުވައްޒަފުން ޔުނިފޯމްގައި އިވެންޓަށް އައުމަށް އެމްޕީއެލްއިން ފޮނުވި މެސެޖުގައި ވަނީ އަންގާފައެވެ. ނަމަވެސް އެއީ ކޮންކަމަކާއި ގުޅޭ އިވެންޓެއް ކަމަށް ހާމައެއް ނުކުރެއެވެ.
މީގެ އިތުރުން އިސްކަންދަރު ސްކޫލުން ކްލާސް މަންދޫބުންނަށް ފޮނުވި މެސެޖެއްގައި ބުނެފައިވަނީ އިސްކަންދަރު ފެއަރ ސްޓޯލްސްއާއި ބެހޭ ގޮތުން ބޭއްވާ ވަރަށް މުހިންމު ބައްދަލުވުމެއް އަންގާރަ ދުވަހުގެ ރޭ ބޭއްވުމަށް ހަމަޖެހިފައިވާ ކަމަށެވެ. އެހެންކަމުން ހުރިހާ މަންދޫބުން 8:15ށް ސްކޫލް ހޯލްއަށް އައުމަށް އަންގާ ކަމަށެވެ.
މީގެ އިތުރުން ވެސް ސިވިލް ސަރވިސް މުވައްޒަފުންނަށްވެސް ދަނީ "ގާނޫނު އަސާސީގެ ދިފާއުގައި" ޖަލްސާއަށް ނުދިއުމަށް އަންގާ މަޖުބޫރުކުރަމުންނެވެ.
ގާނޫނު އަސާސީގެ ދިފާއުގައި އެމްޑީޕީން ބާއްވާ އެއްވުމަށް މީހުން ދިޔަ ނުދިނުމަށް ސަރުކާރުން އެކި ސިފަ ސިފައިގައި މަސައްކަތް ކުރާ ކަަމަށް އެމްޑީޕީން ވަނީ ބުނެފައެވެ. އެގޮތުން މަޤާމުގެ ބިރު ދެއްކުމާއި، ރަށުން ބޭރަށް ފޮނުވާލުން ފަދަ ކަންކަން ކުރާ ކަމަށް ވަނީ ބުނެފައެވެ. ހަމައެހެންމެ މި އެއްވުމަކީ ޤާނޫނާއި ޚިލާފު އަނިޔާވެރިކަމަށް ހިތްވަރުދޭ އެއްވުމެއް ކަމަށް ބުނެ އާއްމުންގެ ހިތުގައި ބިރުވެރިކަން އުފައްދާ އެއްވުމަށް މީހުން ނުދާނެ ފަދަ ދޮގު މައުލޫމާތުތައް ސަރުކާރުން ފަތުރަމުންދާ ކަމަށް އެމްޑީޕިން ވަނީ ބުނެފައެވެ.
