ކޮންމެ ކަހަލަ ކާމިޔާބީއެއް ލިބުނު ނަމަވެސް އެކަމާއި ބޮޑާނުވެ، އެހެންކުދިންނާއިމެދު އިސްކަންދޭ ކުދި ބަޔަކަށްވާންވާނެ: ނައިބު ރައީސް ފައިސަލް
11 އޮކްޓޯބަރު 2023 | ބުދަ 18:26ގައުމަށް ހިދުމަތްކުރެވޭނީ، ކޮން ކަންތައްތަކެއް ދަސްކޮށްގެންކަން ބަލާ ހޯދަންޖެހޭ
ނައިބުރައީސް ފައިސަލް ނަސީމް
އިސްކަންދަރު ސްކޫލްގެ "ޕޯސްޓް އެވޯޑިންގ ސެރިމަނީ 2023" ގައި ވާހަކަފުޅު ދައްކަވަމުން ނައިބު ރައީސް ފައިސަލް ނަސީމް ވިދާޅުވީ، އިސްކަންދަރު ސްކޫލަކީ ނަމޫނާ ދަރިވަރުންތަކެއް ބިނާކުރުމަށް މަސައްކަތްކުރަމުންދާ ނަމޫނާ ސްކޫލެއްކަމަށެވެ.
ކޮންމެ ކުއްޖަކުވެސް އެ ކުއްޖެއްގެ ހުންނަ ހުނަރު ދެނެގަނެ އެ ހުނަރު ތަރައްގީކުރުމަށް މަސައްކަތްކުރަންޖެހޭކަމަށް ނައިބު ރައީސް ފާހަގަކުރެއްވިއެވެ. އެންމެ ބޮޑު ސަމާލުކަމެއް ދޭންވީ މަސައްކަތްތަކެއް ދަސްކުރަންކަމަށާއި ހުނަރުވެރި ބަޔަކަށްވުމަށް ގަދައަޅާ މަސައްކަތްކުރަންޖެހޭކަމަށް ނައިބު ރައީސް ވިދާޅުވިއެވެ. އަދި ގައުމަށް ހިދުމަތްކުރެވޭނީ، ކޮން ކަންތައްތަކެއް ދަސްކޮށްގެންކަން ބަލާ ހޯދަންޖެހޭކަމަށް ނައިބު ރައީސް ފާހަގަކުރެއްވިއެވެ.
މީގެއިތުރުން، ކޮންމެ ކަހަލަ ކާމިޔާބީއެއް ލިބުނަސް އެކަމާއި ބޮޑާނުވެ، އެހެންކުދިންނާއިމެދު އިސްކަންދޭ ކުދި ބަޔަކަށްވުމަށް ގަދައަޅާ މަސައްކަތްކުރަންޖެހޭކަމަށް ނައިބު ރައީސް ވިދާޅުވިއެވެ.
ނައިބު ރައީސް އިތުރަށް ވިދާޅުވީ، ދުނިޔޭގެ އެކިކަންކޮޅުތަކުގައި ހިނގަމުންދާ ކަންކަން ހޯދާބަލައި އެކަމާއިމެދު ވިސްނާ އެކަންކަމަށް ހައްލު ހޯދާދެވޭނެ ގޮތާއި މެދު ވިސްނުން މުހިއްމުކަމަށެވެ.
ބަސްއަހައި، ކިޔަމަންތެރި، ވަގުތުގެ ބޭނުން އެންމެ ހެޔޮގުތުގައި ހިފައި ކުދި ބަޔަކަށްވުމަށް ނައިބު ރައީސް ވަނީ ގޮވާލައްވާފައެވެ.
ނައިބު ރައީސް އިތުރަށް ވިދާޅުވީ، ކޮންމެ ކުއްޖަކުވެސް ގައުމާއި ދޭތެރޭ ވިސްނައި، ގައުމަށް ބޭނުންތެރި ބަޔަކަށް ވާންޖެހޭކަމަށެވެ. އަދި ގައުމިއްޔަތު ދިރުވާ އާލާ ކުރާބަޔަކަށްވުމަށް ގަދައަޅައި މަސައްކަތްކުރުމަށް ނައިބު ރައީސް ވަނީ އިލްތިމާސްކުރައްވާފައެވެ.
