އިސްކަންދަރު ސްކޫލްގެ "ޕޯސްޓް އެވޯޑިންގ ސެރިމަނީ 2023" ގައި ވާހަކަފުޅު ދައްކަވަމުން ނައިބު ރައީސް ފައިސަލް ނަސީމް ވިދާޅުވީ، އިސްކަންދަރު ސްކޫލަކީ ނަމޫނާ ދަރިވަރުންތަކެއް ބިނާކުރުމަށް މަސައްކަތްކުރަމުންދާ ނަމޫނާ ސްކޫލެއްކަމަށެވެ.
ކޮންމެ ކުއްޖަކުވެސް އެ ކުއްޖެއްގެ ހުންނަ ހުނަރު ދެނެގަނެ އެ ހުނަރު ތަރައްގީކުރުމަށް މަސައްކަތްކުރަންޖެހޭކަމަށް ނައިބު ރައީސް ފާހަގަކުރެއްވިއެވެ. އެންމެ ބޮޑު ސަމާލުކަމެއް ދޭންވީ މަސައްކަތްތަކެއް ދަސްކުރަންކަމަށާއި ހުނަރުވެރި ބަޔަކަށްވުމަށް ގަދައަޅާ މަސައްކަތްކުރަންޖެހޭކަމަށް ނައިބު ރައީސް ވިދާޅުވިއެވެ. އަދި ގައުމަށް ހިދުމަތްކުރެވޭނީ، ކޮން ކަންތައްތަކެއް ދަސްކޮށްގެންކަން ބަލާ ހޯދަންޖެހޭކަމަށް ނައިބު ރައީސް ފާހަގަކުރެއްވިއެވެ.
މީގެއިތުރުން، ކޮންމެ ކަހަލަ ކާމިޔާބީއެއް ލިބުނަސް އެކަމާއި ބޮޑާނުވެ، އެހެންކުދިންނާއިމެދު އިސްކަންދޭ ކުދި ބަޔަކަށްވުމަށް ގަދައަޅާ މަސައްކަތްކުރަންޖެހޭކަމަށް ނައިބު ރައީސް ވިދާޅުވިއެވެ.
އަބަދުވެސް އޯގާތެރި، ވަރަށް ހިޔުމިލިޓީ، ހަމްބަލް، އެހެން މީހުންނާއި ދޭތެރޭގައި އަބަދުވެސް، އެހެން މީހުންނަށް އިސްކަންދޭ، އެހެން ކުދިންގެ ކަންތައްތަކަށް ސަމާލުކަންދޭ، އިސްކަންދޭ ކުދިންތަކަކަށް ވާން އެބަޖެހޭ. އެއްވެސް ހާލެއްގައި ކޮންމެ ފަދަ ކާމިޔާބީއެއް ލިބުނަސް ކޮންމެ ކަހަަލަ މަގާމެއް ލިބުނަސް، ކޮންމެ ކަހަަލަ މާހައުލެއްގައި އުޅެންޖެހުނަސް ފޮނިކަމާއި، ކިބުރުވެރިކަން އިސްކޮށްގެން ނުވާނެ. ހަނދާންކުރަންވާނެ ކިތަންމެ ބޮޑު ކާމިޔާބީއެއް، ކިތަންމެ ރީތި ނަމެއް، ކޮންމެ ކަހަލަ މާހައުލެއްގައި އުޅެމުންދާ ކުއްޖަކުވެސް ކިބުރުވެރިކަމާއި، ފޮނިކަމާއި، އެހެން މީހުންނަކީ އެއީ ބައެއް ނޫންކަމަށް ދެކެން ފަށައިފިނަމަ ކާމިޔާބީ އަކީ ރީތި ނަމަކީ ވަކި ފަރާތަކުން ދެއްވާ އެއްޗެއް. އެހެންވީމަ އަބަދުވެސް ހަނދާނުގައި ބަހައްޓަންވާނެ ތިމާއަށް ލިބޭ ކޮންމެ އުނގެނޭ ކޮންމެ އެއްޗަކުން ލިބޭ ކޮންމެ ކާމިޔާބީއަކުން ދަސްވާ ކޮންމެ ފިލާވަޅަކުން އެހެން ކުދިންނަށް ކިޔާދޭންވާނެ. އެހެން ކުދިންނަށް އަބަދުވެސް އެހީތެރިވާންޖެހޭނެ. އެއީ އަބަދުވެސް ހަނދާނުގައި، ތިކުދިން ސިކުނޑީގައި ބަހައްޓަންޖެހޭނެ ކަމެއް.ނައިބު ރައީސް ފައިސަލް ނަސީމް
ނައިބު ރައީސް އިތުރަށް ވިދާޅުވީ، ދުނިޔޭގެ އެކިކަންކޮޅުތަކުގައި ހިނގަމުންދާ ކަންކަން ހޯދާބަލައި އެކަމާއިމެދު ވިސްނާ އެކަންކަމަށް ހައްލު ހޯދާދެވޭނެ ގޮތާއި މެދު ވިސްނުން މުހިއްމުކަމަށެވެ.
ލީޑަރެއް ކަމަށްވަންޏާ ނަމޫނާއެއް ގޮތުގައި މީހުން ބަލައިގަންނާނީ މަސައްކަތްތެރި ކަންތައްތައް ދަންނަ ބައެއް. ތި އުމުރަކީ ކަންކަން ބަލާ ހޯދާ ފޮތްތައް ކިޔާ ދުނިޔޭގެ އެހެން ގައުމުތަކާއި އަދި ރާއްޖޭގައިވެސް ހިނގާ ކަންކަން ހޯދާ ބަލާ އެކަންތައްތަކާއިމެދު ފުންކޮށް ވިސްނާ އަދި ތިމާގެ ނަޒަރުގައި އެކަންތައްތަކަށް ހޯދޭނެ އެންމެ ރަނގަޅު ހައްލަކީވެސް ކޮބާތޯ ބަލައި އެކަންތައްތައްވެސް ކުރާ މީހެއް.ނައިބު ރައީސް ފައިސަލް ނަސީމް
ބަސްއަހައި، ކިޔަމަންތެރި، ވަގުތުގެ ބޭނުން އެންމެ ހެޔޮގުތުގައި ހިފައި ކުދި ބަޔަކަށްވުމަށް ނައިބު ރައީސް ވަނީ ގޮވާލައްވާފައެވެ.
ކޮންމެ ކުއްޖަކީ މި ގައުމަށް ބޭނުންވާ ކުއްޖެއް. ނަމޫނާ ކުއްޖަކަށް ވުމަށް އެންމެ އަހްލާގު ރަނގަޅު މީހާއަށް، ތިމާ އަކީ އެންމެ ރަނގަޅު މީހާއަށްވުމުގެ ކޮމްޕެޓިޝަންގައި ވާދަކުރޭ. އެންމެ އަހްލާގު ރަނގަޅު، އެންމެ ރަނގަޅު، އެންމެ ހިތްތިރި، އެންމެ މީހުންނަށް އަޅާލާ، ބަސްއަހާ، ކިޔަމަންތެރި ކުދިންނަށްވުމަށްޓަކައި ގަދައަޅައި މަސައްކަތްކުރޭ. އެއްގޮތަކަށްވެސް ވަގުތު ބޭކާރުނުކޮށް، ބޭކާރު ކަންތައްތަކައި ދޭތެރޭ ވިސްނުން އެއީ މިއަދު ކުރިއެރުން ލިބެންއޮތް ގޮތެއް ނޫން. އެހެންކަމުން ސްކޫލްގެ ވަގުތުތަކާއި، ގޭގައި ހޭދަކުރާ ވަގުތުތަކާއި އަދި ރައްޓެހިން ވަރަށް މުހިއްމު ބައެއް. ހޭދަކުރާ ކޮންމެ ވަގުތަކީ ޕްރޮޑްކްޓިވް ވަގުތަކަށް ހަދަންވާނެ.ނައިބު ރައީސް ފައިސަލް ނަސީމް
ނައިބު ރައީސް އިތުރަށް ވިދާޅުވީ، ކޮންމެ ކުއްޖަކުވެސް ގައުމާއި ދޭތެރޭ ވިސްނައި، ގައުމަށް ބޭނުންތެރި ބަޔަކަށް ވާންޖެހޭކަމަށެވެ. އަދި ގައުމިއްޔަތު ދިރުވާ އާލާ ކުރާބަޔަކަށްވުމަށް ގަދައަޅައި މަސައްކަތްކުރުމަށް ނައިބު ރައީސް ވަނީ އިލްތިމާސްކުރައްވާފައެވެ.
