އަމީނީ މަގު ސެގްމެންޓް 1ގައި ތާރު އެޅުން ފިޔަވައި އެހެން މަސައްކަތްތައް ނިންމާލައިފި

އަމީނީމަގު ސެގްމެންޓް 1ގައި, ތާރުއެޅުން ފިޔަވައި އެހެން މަސައްކަތްތައް ނިންމާލާފައިވާކަމަށް, އެމަސައްކަތްކުރަމުން އަންނަ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)ން ބުނެފިއެވެ.

އާރުޑީސީން ބުނީ މިވަގުތު ކުރިއަށްދަނީ ދުވާރުގެ ބައެއް މަސައްކަތްތަކާއި، މަގު އެއްވަރުކޮށް ކޮމްޕެކްޓް ކުރުމުގެ މަސައްކަތްކަމަށެވެ. އަދި ދެވަނަ ސެގްމެންޓް މަސައްކަތް ފެށުމަށް އަންނަނީ ތައްޔާރުވަމުންކަމަށް އާރުޑީސީން ބުނެއެވެ. އާރުޑީސީން ކުރިން ބުނެފައިވަނީ ދެވަނަ ސެގްމެންޓްގެ މަސައްކަތް މިފެށޭ ހަފުތާގައި ފެށުމަށް ތައްޔާރުވަމުން އަންނަކަމަށެވެ. އެ މަސައްކަތް ފެށުމަށްޓަކައި އިރުދޭމާ ހިނގުމުން ފެށިގެން ކަލާފާނު ހިނގުމާއި އަމީނީ މަގު ގުޅޭ ކަންމައްޗަށް ބަންދުކުރުމަށް ނިންމާފައިވާކަމަށާއި، އެ ސަރަހައްދުގައި ޕާކުކޮށްފައި ހުރި އުޅަނދުތައް ނަގައިދިނުމަށް ފުލުހުންގެ ކިބައިން އެދިފައިވާކަމަށް އާރުޑީސީން ވަނީ ބުނެފައެވެ.

Advertisement

އެ ކުންފުނިން ބުނީ ދެވަނަ ސެގްމަންޓުގެ ދަށުން ތާރު އެޅުމަށް ހަމަޖެހިފައިވަނީ 136 މީޓަރުގެ ސަރަހައްދެއްގައިކަމަށެވެ.

އަމީނީ މަގު ޒަމާނީ ފެންވަރަށް ތަރައްގީކޮށް، ތާރުއެޅުމުގެ އަމަލީ މަސައްކަތް އާރުޑީސީން ފެށީ މިއަހަރުގެ ސެޕްޓެމްބަރ މަހުގެ 12 ވަނަ ދުވަހުއެވެ. އެ މަސައްކަތް ކުރިއަށްދިޔައިރު، އަމީނީ މަގަކީ ފެނާއި ނަރުދަމާގެ މައި ހޮޅިތަކުގެ އިތުރުން އެހެން ނެޓްވޯރކްތަކުގެވެސް މައި ހޮޅިތައް ވަޅުލާފައިވާ މަގަކަށްވުމުން، އެ މަގު ޒަމާނީ ފެންވަރަށް ތަރައްގީކުރަން ދަތިތައް ހުރިކަން އާރްޑީސީން ފާހަގަކުރިއެވެ. އެގޮތުން، މަގުގެ ފެން ފަށަލަ ތިލަވެފައި، މަގުގެ އަޑީގައި ހުރި، ފެނާއި ނަރުދަމާގެ އިތުރުން އެހެނިހެން ނެޓްވޯރކްތަކާ ގުޅޭގޮތުން ލިބިފައިހުރި ކުރެހުންތަކާއި މަގުގެ އަޑި އޮތްގޮތް ދިމާނުވުންފަދަ ގޮންޖެހުންތައް އެބަހުރިކަމަށް އެ ކުންފުނިން ބުނެއެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން އާރްޑީސީއާ މި މަސައްކަތް ހަވާލުކުރީ 210 ދުވަސް (ނުވަތަ 7 މަސް ދުވަސް) ތެރޭގައި ނިންމާ ގޮތަށެވެ. އެ ކުންފުންޏާ މި މަސައްކަތް ހަވާލުކުރީ 84.4 މިލިއަން ރުފިޔާއަށެވެ.

މި މަޝްރޫއުގެ ދަށުން އަމީނީމަގުގެ 1.7 ކިލޯމީޓަރުގެ ސަރަަހައްދެއްގައި ތާރު އެޅުމަށް ވަނީ ހަމަޖެހިފައެވެ. ބޮޑެތި ބަދަލުތަކާއެކު މި މަސަައްކަތް ކުރިއަށްގެންދާއިރު މިހާތަނަށް ވަނީ ޓޮޕޯ ގްރެފިކް ސަރވޭއާއި ޖިއޯޓެކްނިކަލް ސަރވޭއާއި އަދި ހައިޑްރޮޖިކަލް ސަރވޭގެ އިތުރުން އީއައިއޭ ހަދާފައެވެ.

އެންމެ ޒަމާނީ ފެންވަރަށް އަމީނީމަގު ޑިޒައިން ކުރެވިފައިވާއިރު، މަގުގެ ފެން ހިންދާ ނިޒާމް ޑިޒައިންކޮށްފައިވަނީ އަމީނީމަގުގެ ދެފަރާތުންވެސް މަގު ނިމެންދެން އެއްކޮޅުން އަނެއް ކޮޅަށް ކާނު އަޅާ ގޮތަށެވެ. އަދި ޑިޒައިންނަށް ރިއާޔަތްކޮށް، މަގުގައި ފެންބޮޑުވުމަށް ދާއިމީ ހައްލެއް ގެނައުމަށްޓަކައި އިތުރު ޕަމްޕް ސްޓޭޝަންތައް ބަހައްޓާނެއެވެ.

މީގެ އިތުރުން، އިމާރާތްކުރުމުގެ މަސައްކަތްތައް ކުރަމުންދާއިރު ބޭރުކުރާ ފެނަށް ޚާއްސަ ޑީވޯޓަރިންގ ނެޓްވޯކް އަޅާނެއެވެ. މީގެ ސަބަބުން ދުވާރު މަތީގައި ހޮޅި އަޅައިގެން އިމާރާތްތަކުން ފެން ބޭރުކުރުން ނިމުމަކަށް އަންނާނެއެވެ.

އަމީނީމަގު ތަރައްގީކުރުމުގެ މަޝްރޫއުގައި ނުކުޅެދުންތެރިކަން ހުންނަފަރާތްތަކަށް، ހިނގާބިގާވެ އުޅުމަށް ފަސޭހަވާނެގޮތަށް ދުވާރުގައި ބްރެއިލް ބްލޮކް ޖެހުމާއި ވީލްޗެއަރ އެކްސެސް ގާއިމްކުރުން ހިމެނެއެވެ. އަދި ސްޓޭކް ހޯލްޑަރުންގެ ކޭބަލްތައް އެޅުމަށްޓަކައި ކޭބަލްޓްރޭ މަގުގެ ދެފަޅީގައި އެޅުމާއެކު އެޗްވީ ކޭބަލަށް ޚާއްސަކޮށްގެން ޖަންގްޝަންތަކެއް ވެސް ބަހައްޓާނެއެވެ.