އާރްޑީސީ އިން ބުނީ ކާޓިއުންސް އަށް ދައްކަން ޖެހޭ 7.1 މިލިއަން ރުފިޔާ ނުދެއްކުނީ ކުންފުނީގެ މާލީ ހާލަތުގެ ސަބަބުން ކަމަށް
މި މައްސަލައިގައި އާރްޑީސީ އިން ވަނީ ދައުވާގެ ބަޔަކަށް އެއްބަސްވެ، ދިފާއުވާން ބޭނުންވާ ބަޔަށް ރައްދު ހުށަހަޅާފަ އެވެ. އެގޮތުން ދައުވާ އިން އެއްބަސް ވެފައިވާ ބަޔާމެދު އެ ކުންފުނިން ބުނީ ކާޓިއުންސް އަށް ދައްކަން ޖެހޭ 7.1 މިލިއަން ރުފިޔާ އަކީ އާރްޑީސީ ގެ މާލީ ތަނަވަސްކަން ހުރިގޮތުން މިހާތަނަށް ދެއްކިފައި ނުވާ ފައިސާ ކަމަށެވެ.
ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)
އަމިއްލަ ކުންފުންޏެއް ކަމަށްވާ ކާޓިއުންސް އިންޓަރނޭޝަނަލް ޕްރައިވެޓް ލިމިޓެޑް އަށް ދައްކަން ޖެހޭ ހަތް މިލިއަން ރުފިޔާ ދެއްކިފައި ނުވަނީ ކުންފުނީގެ މާލީ ތަނަވަސްކަން ހުރި ގޮތުން ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ބުނެފި އެވެ.
ކާޓިއުންސް ކުންފުނިން ފޯރުކޮށްދިން މުދަލާއި ހިދުމަތުގެ އަގަށްވާ 7.1 މިލިއަން ރުފިޔާ އާރްޑީސީ އިން ހޯދުމަށް އެ ކުންފުނިން ވަނީ ސިވިލް ކޯޓަށް ހުށަހަޅާފަ އެވެ.
މައްސަލައިގައި ކާޓިއުންސް އިން ވަނީ އެ ކުންފުންޏަށް ލިބެން ޖެހޭ 7.1 މިލިއަން ރުފިޔާ ގެ އިތުރުން އެ ފައިސާ އާރްޑީސީ އިން ދައްކަމުން ނުދާތީ ނޮމިނަލް ޑެމޭޖަސް (ގެއްލުމުގެ ބަދަލު) ގެ ގޮތުގައި އެއް މިލިއަން ރުފިޔާ އާއި ވަކީލު ހަރަދުގެ ގޮތުގައި 30،000 ރުފިޔާ ހޯދުމަށް ވެސް އެދިފަ އެވެ.
މި މައްސަލައިގައި އާރްޑީސީ އިން ވަނީ ދައުވާގެ ބަޔަކަށް އެއްބަސްވެ، ދިފާއުވާން ބޭނުންވާ ބަޔަށް ރައްދު ހުށަހަޅާފަ އެވެ. އެގޮތުން ދައުވާ އިން އެއްބަސް ވެފައިވާ ބަޔާމެދު އެ ކުންފުނިން ބުނީ ކާޓިއުންސް އަށް ދައްކަން ޖެހޭ 7.1 މިލިއަން ރުފިޔާ އަކީ އާރްޑީސީ ގެ މާލީ ތަނަވަސްކަން ހުރިގޮތުން މިހާތަނަށް ދެއްކިފައި ނުވާ ފައިސާ ކަމަށެވެ.
ދައުވާގެި ވަކި ބަޔަކަށް އާރްޑީސީ އިން އެއްބަސް ވުމާއެކު ކާޓިއުންސް އިން އެދުނީ ތިން މަސް ދުވަހުގެ ތެރޭގައި ދައްކަން ޖެހޭ ފައިސާ ދައްކަން އަމުރުކޮށް ދިނުމަށެވެ. މި މުއްދަތު އިތުރު ކޮށްދިނުމަށް އާރުޑީސީ އިން ބޭނުންވި ނަމަވެސް ކާޓިއުންސް އިން ވަނީ އެ ފުރުސަތު ދިނުމަށް ދެކޮޅު ހަދާފަ އެވެ.
މި މައްސަލައިގައި ސިވިލް ކޯޓުން ވަނީ އާރުޑީސީ އާއި ކާޓިއުންސް އިން މަޝްވަރާކޮށްގެން ހައްލެއް ހޯދުމުގެ ފުރުސަތު ފަހިކޮށްދީފަ އެވެ. ނަމަވެސް މަޝްވަރާ ކޮށްގެން ވެސް ހައްލެއް ނުލިބުނު ކަމަށް ހުކުމުގައި ބަޔާންކޮށްފައިވެ އެވެ.
އެެހެން ކަމުން ކޯޓުން ވެސް ކަނޑައަޅާފައި ވަނީ އާރުޑީސީ އިން އެދުނު ގޮތަށް މުއްދަތު އިތުރުކޮށްދެވެން ނެތް ކަމަށެވެ. މި މައްސަލަ ބެއްލެވި ސިވިލް ކޯޓުގެ ގާޒީ ފައިސަލް އާދަމް ވަނީ ޑިސެމްބަރު 15 ވަނަ ދުވަހުން ފެށިގެން ތިން މަސް ދުވަހުގެ ތެރޭގައި އެ ފައިސާ ކާޓިއުންސް އަށް ދައްކައި ޚަލާސްކުރަން އާރުޑީސީ ގެ މައްޗަށް އަމުރު ކޮށްފަ އެވެ.
އާރްޑީސީ ގެ މާލީ ހާލަތުގެ ސަބަބުން ކުންފުނިތަކަށް ދޭންޖެހޭ ފައިސާ ނުދެވޭ ކަމަށް އެ ކުންފުނިން ކޯޓުގައި ބުނެފައިވާއިރު މި ހިނގާ 2025 ވަނަ އަހަރުގެ ފުރަތަމަ ކުއަރޓަރުގައި އެންމެ ބޮޑު ގެއްލުމެއް ވީ ވެސް އާރްޑީސީ އަށް ކަމަށް ޕީސީބީ ގެ ރިޕޯޓަކުން ވަނީ ހާމަ ވެފަ އެވެ. ރިޕޯޓުން އެނގޭ ގޮތުގައި އެ ކުންފުންޏަށް ވަނީ 113.73 މިލިއަން ރުފިޔާގެ ގެއްލުން ވެފަ އެވެ.
އެ ރިޕޯޓުން ހާމަވެފައިވާ ގޮތުގައި 2022، 2023 އަދި 2024 ވަނަ އަހަރުގެ އޮޑިޓު ނިންމާފައި ނުވާ ކުންފުނިތަކުގެ ތެރޭގައި ވެސް އާރްޑީސީ ހިމެނެ އެވެ.
