ސްޕެއިން އާއި ބާސެލޯނާގެ ޑިފެންޑަރު ޖެރާޑް ޕީކޭ ހޮނިހިރު ދުވަހުގެރޭ ކުޅުން ހުއްޓާލާކަން އިއުލާންކޮށްފިއެވެ.

35 އަހަރުގެ ޑިފެންޑަރު ޢާއްމުކުރި ވީޑިއޯގައި ބުނެފައިވަނީ އަބަދުވެސް ބުނަމުން އައި ފަދައިން ބާސެލޯނާއަށް ފަހު އޭނާ ކުޅޭނެ އެހެން ކްލަބެއް ނޯންނާނެކަމަށާއި, ހޮނިހިރު ދުވަހުގެ މެޗަކީ ފަހު މެޗުކަމަށެވެ. ބާސެލޯނާގައި ކާމިޔާބު ކެރިއަރެއް ހޭދަކުރި ޕީކޭ ވަނީ ބާސާއަށް ބަދަލުވުމުގެ ކުރިން މެންޗެސްޓަރ ޔުނައިޓެޑަށް ކުޅެފައެވެ. 2004 ވަނަ އަހަރު މެންޗެސްޓަރ ޔުނައިޓެޑަށް ބަދަލުވީ ބާސާގެ ޔޫތު ކުޅުންތެރިއެއްގެ ގޮތުގައި ހުރެއެވެ. މެންޗެސްޓަރ ޔުނައިޓެޑާ އެކު 2007-2008 ވަނަ އަހަރުގެ ސީޒަންގައި ޗެމްޕިއަންސް ލީގާއި ޕްރިމިއަރ ލީގު ކާމިޔާބުކުރިއެވެ.

ބާސެލޯނާއަށް ބަަދަލުވެ އެ ކްލަބަށް 600 އަށްވުރެ ގިނަ މެޗު ކުޅެ, 30 ތަށި އުފުލާލިއެވެ. އޭގެ ތެރޭގައި ތިން ޗެމްޕިއަންސް ލީގާއި, ލަލީގާ އަށް ފަހަރު ކާމިޔާބުކުރުން ހިމެނެއެވެ. އެކަމަކު މި ސީޒަންގައި ބާސެލޯނާ ވަނީ ޗެމްޕިއަންސް ލީގުގެ ގްރޫޕް ސްޓޭޖުން ކަޓާފައެވެ. ލަލީގާ ތާވަލްގައި އޮތީ ވާދަވެރި ރެއާލް މެޑްރިޑްގެ ފަހަތުން ދެ ވަނައިގައެވެ. ޕީކޭ ވަނީ 2018 ވަނަ އަހަރު ޤައުމީ ޓީމަށް ކުޅުން ހުއްޓާލާފައެވެ. ޤައުމީ ޓީމަށް 102 މެޗު ކުޅުނެވެ. އެ މުއްދަތުގައި ވޯލްޑް ކަޕާއި, ޔޫރަޕިއަން ޗެމްޕިއަންޝިޕް އުފުލާލިއެވެ.

ކުޅުން ހުއްޓާލާކަން އިއުލާންކުރަމުން ޕީކޭ ބުނީ އޭނާ އަށް ހުރިހާ އެއްޗެއް ވެސް ދިނީ ފުޓްބޯޅައިން ކަމަށެވެ. އަދި އެންމެ ބޮޑު ހިތްވަރެއް ދިނީ ބާސެލޯނާ އާއި އެކްލަބްގެ ސަޕޯޓަރުންކަމަށެވެ. އަދި ސަޕޯޓަރުންގެ ވެސް އޭނާ އަށް ހުރިހާ އެއްޗެއް ދީފިކަމަށެވެ. ނިންމާކަމުން އޭނާ ދިން ޔަޤީންކަމަކީ ކޮންމެ ވެސް ސިފައެއްގައި ބާސެލޯނާ އަށް އެނބުރި އަންނާނެކަމެވެ. ޖެރާޑް ޕީކޭގެ ފަހު މެޗަކަށް ވާނީ ހޮނިހިރު ދުވަހުގެރޭ ދަންވަރު ރާއްޖެ ގަޑިން 01:00 ގައި ބާސާގެ ދަނޑުގައި އަލްމެރިއާ އާ ވާދަކުރާ މެޗެވެ.