2023 ވަނަ އަހަރުގެ ބަޖެޓުގައިވެސް ކުންފުނިތަކަށް ދޭ ސަބްސިޑީ ބޮޑު

2023 ވަނަ އަހަރުގެ ބަޖެޓުގައިވެސް، ކުންފުނިތަކަށް ދޭ ސަބްސިޑީ ބޮޑު އިންސައްތައެއް ހިއްސާކުރެއެވެ.

2023 ވަނަ އަހަރަށް ލަފާކޮށް ހުށަހަޅާފައިވާ ބަޖެޓަށް ބަލާއިރު، އިންޑައިރެކްޓް ސަބްސިޑީގެ ގޮތުގައި 2022 ވަނަ އަހަރުގެ ނިޔަލަށް 7 ބާވަތުގެ ސަބްސިޑީއަކަށް ޚަރަދުކުރަމުންދާއިރު، 2023 ވަނަ އަހަރުން ފެށިގެން އިތުރު ސަބްސިޑީއެއް ކަމުގައިވާ ނަރުދަމާ ޚިދުމަތުގެ ސަބްސިޑީއާއި މަސްވެރިންނަށްދޭ ސަބްސިޑީ ވަނީ ބަޖެޓުގައި ހިމަނާފައެވެ. ނަރުދަމާގެ ޚިދުމަތުގެ ސަބްސިޑީއަކީ، ފެނަކައިން ނަރުދަމާގެ ޚިދުމަތްދޭ ރަށްރަށުގައި (މި ޚިދުމަތަކީ މިހާރު އަގުނުނެގޭ ޚިދުމަތަކަށް ވުމުން) ޚިދުމަތް ފޯރުކޮށްދިނުމަށްދޭ ސަބްސިޑީއެކެވެ. އަދި މަސްވެރިންނަށްދޭ ސަބްސިޑީއަކީ މާކެޓް ރޭޓަށްވުރެ އަގު ބޮޑުކޮށް މަސްވެރިންގެ އަތުން މަސްގަތުމުގެ ސަބަބުން މިފްކޯއަށް ލިބޭ ގެއްލުމުގެ ބަދަލުގައިދޭ ސަބްސިޑީއެކެވެ.

2017 ވަނަ އަހަރުން ފެށިގެން އެކިއެކި އިންޑައިރެކްޓް ސަބްސިޑީއަށް ކުރާ ޚަރަދު އަހަރުން އަހަރަށް ދަނީ ވަރަށް ބޮޑުތަން އިތުރުވަމުންކަން ފާހަގަކޮށްލެވެއެވެ. ސަބްސިޑީތަކަށް ކުރާ ޚަރަދު އިތުރުވާ ސަބަބުތަކުގެ ތެރޭގައި، ދުނިޔޭގެ ބާޒާރުގައި ތަކެތީގެ އަގުބޮޑުވުމާއި، ސަބްސިޑީ ދޭ މުދަލާއި ޚިދުމަތްތައް ބޭނުންކުރާ މިންވަރު އިތުރުވުން ހިމެނެއެވެ. އެގޮތުން ގޭބިސީތައް ގިނަވެ، ގޭބިސީތަކުން ކަރަންޓު ބޭނުންކުރާ މިންވަރު އިތުރުވުމުން ކަރަންޓު އަގުހެޔޮކުރުމަށްދޭ ސަބްސިޑީ އިތުރުވެގެންދާކަން ފާހަގަކޮށްލެވެއެވެ. އޭގެސަބަބުން ފިއުލް ސަބްސިޑީއަށް ކުރާ ޚަރަދު ބޮޑުވެއެވެ.

މީގެ އިތުރުން ފާއިތުވި އަހަރުތަކުގެ ތެރޭގައި ސަރުކާރުން ވަނީ އެކިފަހަރު މަތިން ސަބްސިޑީގެ ކަވަރޭޖް އިތުރުކޮށްފައެވެ. އެގޮތުން 2019 ވަނަ އަހަރު ފިއުލް ސަބްސިޑީ އިތުރުކުރުމާއި ކަރަންޓުގެ އަގުތައް ހަރމަނައިޒްކުރުމުގެ ސިޔާސަތުގެ ދަށުން ކަރަންޓު ސަބްސިޑީ ލިބޭ މިންވަރު ވަނީ އިތުރުކޮށްފައެވެ. އިންޑައިރެކްޓް ސަބްސިޑީގެ ގޮތުގައި ޚަރަދުކުރެވޭ ގިނަ ސަބްސިޑީތަކަކީ ސަރުކާރުން ހިއްސާވާ ކުންފުނިތަކުން ސަރުކާރުގެ ސިޔާސަތުތަކުގެ ތެރެއިން، މާކެޓް ރޭޓަށްވުރެ އަގުހެޔޮކޮށް ޚިދުމަތްތަށް ދިނުމުން، އެ ކުންފުނިތަކަށް ލިބޭ ގެއްލުމުގެ ބަދަލުގައިދޭ ސަބްސިޑީތަކެކެވެ. ފާއިތުވި އަހަރުތަކުގައި މިފަދައިން ސަރުކާރުގެ ސިޔާސަތުގެ ދަށުން މި ކުންފުނިތަކުން ދޭ ޚިދުމަތްތަކުން ލިބޭ ގެއްލުމުގެ ބަދަލު ދީފައިވަނީ ކެޕިޓަލް ކޮންޓިބިއުޝަން ނުވަތަ އެހެނިހެން ގޮތްގޮތުންދޭ ކޭޝްފްލޯ އެހީގެ ގޮތުގައެވެ.

އެހެންނަމަވެސް، މި ފަދަ އެހީތައް ސަބްސިޑީގެގޮތުގައި ރެކޯޑްކުރުމަކީ ހިސާބުތަކުގެ ސައްހަކަމާއި، އެހީދެވޭ ކަންކަން ސާފުވާނެ ކަމަކަށްވާތީ، 2023 ވަނަ އަހަރުން ފެށިގެން މިފަދަ ޚަރަދުތައް ރިކޯޑުކުރެވިފައިވާނީ އިންޑައިރެކްޓް ސަބްސިޑީގެ ގޮތުގައެވެ. އެހެންކަމުން އަންނަ އަހަރުން ފެށިގެން ސަބްސިޑީގެ ގޮތުގައި ބަޖެޓުގައި ރިކޯޑުކުރެވޭ ސަބްސިޑީތަކަކީ މަސްވެރިންނަށްދޭ ސަބްސިޑީއާއި ނަރުދަމާގެ ޚިދުމަތަށް ދޭ ސަބްސިޑީއެވެ.

2023 ވަނަ އަހަރުން ފެށިގެން މި ބައިގައި ހިމެނޭ ސަބްސިޑީތަކުގެ ތެރެއިން އެންމެ ބޮޑު ބަދަލެއް ފެނިގެންދާނީ ފިއުލް ސަބްސިޑީއާއި ޓްރާންސްޕޯޓް ސަބްސިޑީންނެވެ. ދުނިޔޭގެ ބާޒާރުގައި ތެލުގެ އަގު ބޮޑުވުމުގެ ސަބަބުން ފިއުލް ސަބްސިޑީއަށް ކުރާ ޚަރަދު އިންތިހާއަށް ބޮޑުވެގެން ދިއުމުން ފިއުލް ސަބްސިޑީ ޑައިރެކްޓް ސަބްސިޑީއަކަށް ބަދަލުކުރުމަށް ސަރުކާރުން ދަނީ މަސައްކަތްކުރަމުންނެވެ.